2 Corinto 13:1-14
13 Daytoy ti maikatlo a daras+ nga umayak kadakayo. “Iti ngiwat ti dua a saksi wenno ti tallo masapul a mapatalgedan ti tunggal banag.”+
2 Imbagak idin ket, kasla addaak iti maikadua a daras ket kaskasdi nga awanak ita, ibagak a nasaksakbay kadagidiay nagbasol idi ken iti amin a sabsabali pay, a no umayak manen awanto ti labsak,+
3 yantangay sapsapulenyo ti pammaneknek a ni Kristo agsasao kaniak,+ ni Kristo a saan a nakapuy kadakayo no di ket mannakabalin iti tengngayo.
4 Pudno unay, isu nailansa+ maigapu iti kinakapuy,+ ngem sibibiag maigapu iti pannakabalin ti Dios.+ Pudno, met, nakapuykami a maikanunong kenkuana, ngem agbiagkaminto a sangsangkamaysa a maikanunong kenkuana+ maigapu iti pannakabalin ti Dios+ kadakayo.
5 Itultuloyyo a suboken no addakayo iti pammati, itultuloyyo a paneknekan no aniakayo.+ Wenno dikay aya mabigbig a ni Jesu-Kristo naikaykaysa kadakayo?+ Malaksid no dikay naanamongan.
6 Pudno a namnamaek a maammuanyonto a saankami a nagbalin a di naanamongan.
7 Ita ikararagmi+ iti Dios a dikay koma makaaramid iti aniaman a dakes, saan a tapno dakami agparangkami a naanamongan, no di ket tapno maaramidyo koma ti nasayaat, nupay dakami mabalin nga agparangkami a di naanamongan.
8 Ta awan ti maaramidanmi a maibusor iti kinapudno, no di ket maipaay laeng iti kinapudno.+
9 Pudno unay nga agrag-okami kaanoman a nakapuykami ngem nabilegkayo;+ ket maipaay itoy ikarkararagmi,+ ti pannakaaturyo.
10 Dayta ti makagapu nga isuratko dagitoy a banag bayat nga awanak, tapno, inton addaak, saanak koma nga agtignay a siiinget+ maitunos iti kinaturay nga inted kaniak ti Apo, tapno mangpabileg+ ket saan a tapno mangrakrak.
11 Kamaudiananna, kakabsat, itultuloyyo ti agrag-o, maatur, maliwliwa,+ agpanunot a sangsangkatunos,+ agbiag a sitatalna;+ ket ti Dios ti ayat ken ti talna+ maaddanto kadakayo.
12 Agkikinnablaawkayo iti nasantuan nga agep.+
13 Amin dagiti sasanto ipaw-itda dagiti kablaawda kadakayo.
14 Ti di kaikarian a kinamanangngaasi ni Apo Jesu-Kristo ken ti ayat ti Dios ken ti pannakiraman iti nasantuan nga espiritu maadda koma kadakayo amin.+
