2 Corinto 12:1-21
12 Masapul nga agpasindayagak. Saan a makagunggona; ngem umallatiwakto kadagiti karkarna a sirmata+ ken kadagiti paltiing ti Apo.
2 Adda ammok a tao a naikaykaysa ken Kristo a, sangapulo ket uppat a tawen ti napalabasen—no adda iti bagi diak ammo, wenno iti ruar ti bagi diak ammo; ammo ti Dios—narabsut+ a kastana a naipan iti maikatlo a langit.
3 Wen, adda ammok a kasta a tao—no adda iti bagi wenno naisina iti bagi,+ diak ammo, ammo ti Dios—
4 a narabsut a naipan idiay paraiso+ ket nakangngeg iti di maisawang a sasao a di maiparbeng a sawen ti tao.
5 No maipapan iti kasta a tao agpasindayagakto, ngem diakto agpasindayag maipapan iti bagik, malaksid iti maipapan kadagiti pagkapuyak.+
6 Ta uray no kayatko ti agpasindayag,+ saanakto nga agbalin a di nainkalintegan, ta sawekto ti kinapudno. Ngem liklikak, tapno awan mangpadayaw kaniak iti ad-adda pay ngem iti panagkitana kaniak wenno mangngegna manipud kaniak,
7 gapu laeng iti kinalabes dagiti paltiing.
Gapuna, tapno saanak a makarikna iti aglablabes a pannakaitan-ok,+ adda naited kaniak a siit iti lasag,+ maysa nga anghel ni Satanas, tapno agtultuloy a mangtungpa kaniak, tapno saanak a maitan-ok iti aglablabes.
8 Maigapu itoy namitlo+ a nagpakaasiak iti Apo tapno sumina koma kaniak dayta;
9 ket kaskasdi pudno a kinunana kaniak: “Umdasen kenka ti di kaikarian a kinamanangngaasik;+ ta ti pannakabalinko maan-anay iti pagkapuyan.”+ Siraragsak unay, ngarud, nga agpasindayagakto pay ketdi no maipapan kadagiti pagkapuyak,+ tapno ti pannakabalin ti Kristo agtalinaed koma kaniak kas iti maysa a tolda.
10 Gapuna pagragsakak dagiti kinakapuy, dagiti pannakainsulto, dagiti panagkasapulan, dagiti pannakaidadanes ken pakarigatan, maipaay ken Kristo. Ta inton nakapuyak, iti kasta nabilegak.+
11 Nagbalinak a di nainkalintegan. Pinilitdak,+ ta rebbeng koma nga inrekomendadak. Ta saanak a nagbalin a nababbaba ngem kadagiti nalabes ti laingna+ nga apostolyo iti uray maysa a banag, uray no awan kapapay-ak.+
12 Kinapudnona, dagiti pagilasinan iti maysa nga apostol+ napataudda kadakayo babaen ti isuamin a panagibtur,+ ken babaen kadagiti pagilasinan ken tanda ken mannakabalin nga ar-aramid.+
13 Ta iti ania a banag a nagbalinkayo a nanumnumo ngem ti dadduma kadagiti kongregasion, malaksid ti saanko a mismo a panagbalin a dadagsen kadakayo?+ Pangngaasiyo ta pakawanendak itoy a biddut.
14 Adtoy! Daytoy ti maikatlo a daras+ a sisasaganaak nga umay kadakayo, ket kaskasdi saanakto nga agbalin a dadagsen. Ta tartarigagayak, saan a dagiti sanikuayo,+ no di ket dakayo; ta ti annak+ saanda a rebbeng ti agurnong maipaay kadagiti nagannakda, no di ket dagiti nagannak maipaay iti annakda.+
15 Iti biangko siraragsakakto unay a mangbusbos ken naan-anay a mabusbos maipaay kadagiti kararuayo.+ No ayatenkayo nga ad-adda pay, basbassitto aya ti pannakaayatko?
16 Ngem uray pay agbalin a kasta, saankayo a pinadagsenan.+ Nupay kasta, kunayo, “nasikapak” ket tiniliwkayo “babaen ti panangallilaw.”+
17 No maipapan ti asinoman kadagidiay imbaonko kadakayo, ginundawayankayo aya babaen kenkuana?
18 Inallukoyko ni Tito ket imbaonko ti kabsat a kumuyog kenkuana. Ginunggundawayannakayo aya ni Tito?+ Saankami aya a nagna iti isu met laeng nga espiritu?+ Saan kadi a kadagiti isu met laeng nga addang?
19 Impagpagarupyo aya agingga ita a nagdepdepensakami kadakayo? Iti sanguanan ti Dios nga agsasaokami mainaig ken Kristo. Ngem, dungdungnguen, amin a bambanag ket agpaayda a pakapabilganyo.+
20 Ta maamakak di la ket ta, inton dumtengak,+ masarakankayo a saan a kas iti tarigagayak koma ket agbalinak kadakayo a saan a kas iti tarigagayanyo, ngem, imbes ketdi, di la ket ta adda ringgor, imon,+ panagung-unget, rinnupir, panangpadpadakes, panagdandanengdeng, panagtangtangsit, kibkibur.+
21 Nalabit, inton umayak manen, ti Diosko mabalin nga ipababanak iti tengngayo, ket mabalin a pagleddaangak ti adu kadagidiay nagbasol+ idi ngem saanda a nagbabawyan ti kinarugitda ken ti pannakiabig+ ken ti nalulok a kababalin+ nga inar-aramidda.
