“O Jehova, tubtob san-o ako manawag sa imo, agod pamatian mo ako? Tubtob san-o ako mangayo sing bulig sa imo bangod sa pagpamintas, agod magpasilabot ka?” (Habacuc 1:2, 3) Amo ini ang ginsiling ni Habacuc, ang maayo nga tawo nga nahamut-an sang Dios. Kulang bala sia sing pagtuo? Indi gid! Ginpasalig sia sang Dios nga may gintangdo Sia nga tion para dulaon ang pag-antos.—Habacuc 2:2, 3.

Kon nagaantos ka ukon ang suod sa imo, mahapos lang magsiling nga kadugay maghulag ang Dios, nga dapat magpasilabot na sia subong. Pero ginapasalig kita sang Biblia: “Si Jehova indi mahinay may kaangtanan sa iya saad, kaangay sang ginahunahuna sang pila ka tawo, sa baylo mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.”—2 Pedro 3:9.

Dali na lang! Ginpahibalo ni Jesus nga may isa ka kaliwatan nga makasaksi sang pinasahi nga mga kahimtangan nga mangin tanda sang katapusan nga mga adlaw sang “sistema sang mga butang.” (Mateo 24:3-42) Ang katumanan sang tagna ni Jesus sa aton adlaw nagapakita nga madali na lang ang pagpasilabot sang Dios sa hilikuton sang katawhan. *

Pero paano dulaon sang Dios ang pag-antos? Sang si Jesus diri sa duta, gingamit niya ang gahom sang Dios para pahaganhaganon ang pag-antos. Binagbinaga ang pila ka halimbawa.

Mga Kalamidad: Sang nagpanakayon si Jesus kag ang iya mga apostoles sa Dagat sang Galilea, diutayan lang sila malunod bangod sang mabaskog nga unos. Pero ginpakita ni Jesus nga makontrol nila sang iya Amay ang tiempo. (Colosas 1:15, 16) Si Jesus nagsiling lang: “Hipos! Maglinong ka!” Ano ang natabo? “Nagtinong ang hangin, kag naglinong ini.”—Marcos 4:35-39.

Balatian: Bantog si Jesus kay naayo niya ang bulag, piang, kag pati na ang may kuyap, aro, ukon bisan ano nga balatian. “Gin-ayo niya ang tanan nga nagaantos.”—Mateo 4:23, 24; 8:16; 11:2-5.

Kakulang sing Pagkaon: Gingamit ni Jesus ang gahom nga halin sa iya Amay para mag-aman sing bastante nga pagkaon. Ang Biblia nagasiling nga duha ka beses nga ginpakaon niya ang linibo.—Mateo 14:14-21; 15:32-38.

Kamatayon: May gahom gid si Jehova nga dulaon ang kamatayon kay ginpakita ini ni Jesus sang nagbanhaw sia sing tatlo ka beses. Ang isa nga iya ginbanhaw apat na ka adlaw nga napatay.—Marcos 5:35-42; Lucas 7:11-16; Juan 11:3-44.