Magdiretso sa kaundan

Magdiretso sa listahan sang kaundan

Sin-o ang Balasulon?

Sin-o ang Balasulon?

Kon indi ang Dios ang nagapaantos, ngaa may tiggulutom, kaimulon, inaway, balatian, kag mga kalamidad? Ginapakita sang Pulong sang Dios, ang Biblia, ang tatlo ka rason sang pag-antos sang mga tawo:

  1. Pagkamaiyaiyahon, Kasakon kag Dumot. “Ginagamhan sang tawo ang iya isigkatawo sa iya kahalitan.” (Manugwali 8:9) Masami nga nagaantos ang mga tawo kay biktima sila sang indi perpekto, sakon, ukon mapintas nga mga tawo.

  2. Tion kag Wala Ginapaabot nga mga Hitabo. Nagaantos pirme ang mga tawo bangod “ang tion kag ang wala ginapaabot nga hitabo nagakatabo sa ila tanan.” (Manugwali 9:11) Buot silingon, ang mga tawo natabuan nga ara sila sa sina nga lugar kag tion, kon may aksidente, ukon kon wala sila nagahalong ukon nagsala sila.

  3. Ang Malaut nga Gumalahom Sini nga Kalibutan. Ginasugid sang Biblia ang panguna nga kabangdanan sang pag-antos. Ini nagasiling: “Ang bug-os nga kalibutan yara sa gahom sang isa nga malauton.” (1 Juan 5:19) Ining “isa nga malauton” amo si Satanas nga Yawa, isa ka gamhanan nga espiritu nga tinuga nga anghel sadto sang Dios pero “wala sia magpabilin sa kamatuoran.” (Juan 8:44) Ang iban pa nga espiritu nga tinuga nagrebelde sa Dios upod kay Satanas para matuman nila ang ila malain nga handum, amo nga nangin mga demonyo sila. (Genesis 6:1-5) Sugod sadto, gingamhan sing mapintas ni Satanas kag sang iya mga demonyo ang kalibutan. Ilabi na gid subong. Naakig gid ang Yawa amo nga ‘ginapatalang niya ang bug-os napuy-an nga duta,’ gani nangin “makaluluoy ang duta.” (Bugna 12:9, 12) Mapintas gid nga diktador si Satanas. Nalipay sia kon mag-antos ang mga tawo. Si Satanas ang nagapaantos sa mga tawo, indi ang Dios.

BINAGBINAGA: Ang wala lamang sing balatyagon kag malaut nga persona ang makapaantos sa mga inosente. Pero ang Biblia nagasiling: “Ang Dios gugma.” (1 Juan 4:8) Bangod mahigugmaon sia, “imposible nga ang matuod nga Dios maghimo sing malaut, nga ang Labing Gamhanan maghimo sing sayop!”—Job 34:10.

Pero basi mamangkot ka, ‘Asta san-o tugutan sang Labing Gamhanan nga Dios ang malaut nga paggahom ni Satanas?’ Suno sa nabinagbinag na, ginakaugtan sang Dios ang kalautan kag nasakitan gid sia bangod nagaantos kita. Dugang pa, ang iya Pulong nagasiling: “[Itugyan] ninyo sa iya ang tanan ninyo nga kabalaka, kay nagaulikid sia sa inyo.” (1 Pedro 5:7) Palangga kita sang Dios kag may gahom sia nga dulaon ang tanan nga pag-antos kag inhustisya, nga ipaathag sa masunod nga artikulo. *

^ par. 7 Para sa dugang nga impormasyon kon ngaa madamo ang nagaantos, tan-awa ang leksion 26 sang libro nga Magkabuhi sing Wala Katapusan! nga ginbalhag sang mga Saksi ni Jehova kag ma-download sing libre sa www.jw.org/hil.