Magdiretso sa kaundan

Magdiretso sa listahan sang kaundan

Ang Tanan Bala nga Relihion Nagkalainlain Lamang nga Dalan Padulong sa Dios?

Ang Tanan Bala nga Relihion Nagkalainlain Lamang nga Dalan Padulong sa Dios?

 Ang Pagtamod sang Biblia

Ang Tanan Bala nga Relihion Nagkalainlain Lamang nga Dalan Padulong sa Dios?

“HALOS indi ako makapati nga ang Dios sang bug-os nga uniberso namat-od nga makilala paagi sa isa ka relihioso nga tradisyon,” siling sang awtor nga si Marcus Borg. Ang dumalaug sang Nobel Peace Prize nga si Desmond Tutu nagsiling: “Wala sing relihion nga makapangangkon nga may bug-os nga kamatuoran tuhoy sa tanhaga” sang pagtuo. Ang bantog nga pagtamod sang mga Hindu amo ang “Jotto moth, totto poth,” nga kon badbaron sing pahapyaw nagakahulugan nga ang tanan nga relihion nagkalainlain lamang nga dalan padulong sa isa ka tulumuron. Amo man sini ang pagtamod sang mga Budhista. Sa pagkamatuod, minilyon ka tawo ang nagapati nga ang tanan nga relihion nagkalainlain lamang nga dalan padulong sa Dios.

Ang istoryador nga si Geoffrey Parrinder nagsiling: “Ginasiling kon kaisa nga ang tanan nga relihion may isa ka tulumuron, ukon magkapareho nga mga paagi padulong sa kamatuoran, ukon nga ang tanan nagatudlo pa gani sing palareho nga mga doktrina.” Ang mga panudlo, rituwal, kag mga diosdios sang mga relihion matuod nga magkaanggid. Ang kalabanan nga relihion nagahambal tuhoy sa gugma kag nagatudlo nga ang pagpatay, pagpangawat, kag pagbutig sala. Sa kalabanan nga relihion, ang pila nagapanikasog gid sa pagbulig sa iban. Kon amo, kon ang isa sinsero sa iya pagtuluuhan kag nagatinguha nga magkabuhi sing maayo, importante pa bala kon ano ang iya relihion? Ukon ang tanan bala nga relihion nagkalainlain lamang nga dalan padulong sa Dios?

Pagkasinsero Lamang​—⁠Tuman Na Bala Ini?

Binagbinaga ang kaso sang Judiyo nga lalaki sang unang siglo nga si Saulo, nga nangin ang Cristianong apostol nga si Pablo. Makugi gid sia nga manugsakdag sang Judaismo, kag bangod sini gintinguhaan niya nga dulaon ang pagsimba sang mga sumulunod ni Cristo, nga sa pagbanta niya indi nagakaigo nga pagsimba. (Binuhatan 8:​1-3; 9:​1, 2) Apang, paagi sa kaluoy sang Dios nahangpan ni Saulo nga ang relihioso kaayo nga mga tawo kaangay niya mahimo nga may kakugi sa Dios, apang, bangod wala sila sang tanan nga mga katunayan, mahimo nga magsayop sila. (Roma 10:⁠2) Sang natun-an ni Saulo ang madamo pa tuhoy sa kabubut-on kag mga pagpakig-angot  sang Dios, nagbag-o sia kag nagsimba upod sa mga tawo nga iya mismo ginhingabot​—⁠ang mga sumulunod ni Jesucristo.​—⁠1 Timoteo 1:​12-​16.

Ginasiling bala sang Biblia nga may ginatos ka pagtuluuhan nga mapilian kag kon ano man ang aton mapili mangin kalahamut-an ini sa Dios? Si apostol Pablo nakabaton sing mga instruksion gikan sa nabanhaw nga si Jesucristo nga nagsiling sing kabaliskaran gid. Ginpadala sia ni Jesus sa katawhan sang mga pungsod “sa pagpamuklat sang ila mga mata, sa pagpaliso sa ila gikan sa kadudulman pa kapawa kag gikan sa awtoridad ni Satanas pa Dios.” (Binuhatan 26:​17, 18) Sing maathag, ang aton ginapili nga relihion importante. Madamo sa mga tawo nga ginpadalhan kay Pablo ang may relihion na. Apang yara sila sa “kadudulman.” Sa pagkamatuod, kon ang tanan nga relihion nagkalainlain lamang nga dalan padulong sa kabuhi nga walay katapusan kag kahamuot sang Dios, indi na kuntani kinahanglan nga hanason pa ni Jesus ang iya mga sumulunod para sa paghimo-disipulo nga hilikuton nga ginsugo niya sa ila nga himuon nila.​—⁠Mateo 28:​19, 20.

Sa iya bantog nga Sermon sa Bukid, si Jesus nagsiling: “Magsulod kamo sa makitid nga gawang; bangod masangkad kag malapad ang dalan nga nagapadulong sa kalaglagan, kag madamo ang nagasulod sa sini; samtang makitid ang gawang kag masipot ang dalan nga nagapadulong sa kabuhi, kag pila lamang ang mga nakatultol sini.” (Mateo 7:​13, 14) Maathag nga ginasiling sang Biblia nga may yara “isa ka pagtuo.” (Efeso 4:⁠5) Maathag nga ang madamo nga yara sa “masangkad” nga dalan may relihion. Apang wala sila sing “isa ka pagtuo.” Sanglit may yara lamang isa ka matuod nga porma sang pagsimba, dapat pangitaon sang mga nagahandum nga masapwan inang matuod nga pagtuo tubtob makita nila ini.

Pagpangita sa Matuod nga Dios

Sugod gid sa pamuno sang maragtas sang tawo, ginsilingan sang Dios ang mga tawo kon ano ang luyag niya nga himuon nila. (Genesis 1:28; 2:​15-​17; 4:​3-5) Sa karon ang mga ginapatuman niya ginapaathag sing maayo sa Biblia. Bangod sini, posible nga makilala naton ang kinatuhayan sa ulot sang kalahamut-an nga pagsimba kag sang di-kalahamut-an nga pagsimba. (Mateo 15:​3-9) Ginpanubli sang iban ang ila relihion, samtang ang iban naman nagasunod lamang sa kadamuan sa komunidad. Para sa madamo, ang relihion nagadepende lamang sa kon san-o kag diin sila natawo. Apang, itugyan mo bala ang pagpili sang imo relihion sa kon ano ang natabuan lamang ukon tugutan mo bala ang iban nga magdesisyon para sa imo?

Ang pagpili mo sang relihion dapat may-ihibalo nga pagpili pasad sa mahalungon nga pag-usisa sa Kasulatan. Sang unang siglo, ang pila ka edukado nga mga tawo wala lamang nagbaton sang mga pinamulong ni apostol Pablo pasad sa kon ano ang ila nabatian. ‘Gin-usisa nila sing maayo ang Kasulatan adlaw-adlaw kon bala matuod gid ini nga mga butang.’ (Binuhatan 17:11; 1 Juan 4:⁠1) Ngaa indi mo man ini paghimuon?

Ginalaragway sang Biblia ang Dios sang uniberso subong nagapangita sing mga tawo nga magsimba sa iya sa kamatuoran. Subong narekord sa Juan 4:​23, 24, si Jesus nagpaathag: “Apang, ang oras nagaabot, kag karon amo na, nga ang matuod nga mga sumilimba magasimba sa Amay sa espiritu kag kamatuoran, kay, sa pagkamatuod, amo sini ang ginapangita sang Amay nga magsimba sa iya. Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” Ang “pagsimba [lamang] nga matinlo kag walay dagta gikan sa pagtamod sang aton Dios kag Amay” ang kalahamut-an sa iya. (Santiago 1:27) Ginpakamaayo sang Dios ang pagpangita sang minilyon agod masapwan ang makitid nga dalan nga nagadul-ong sa kabuhi. Indi sia magahatag sing kabuhi nga dayon sa mga wala nagasapak apang ihatag niya sa mga nagapanikasog gid nga matultulan ang makitid nga dalan nga ginpahamtang niya kag nian nagalakat sa sini.​—⁠Malaquias 3:⁠18.