Magdiretso sa kaundan

Magdiretso sa listahan sang kaundan

Mapagros nga Panglawas Para sa Tanan—Isa Bala Ka Malab-ot Nga Tulumuron?

Mapagros nga Panglawas Para sa Tanan—Isa Bala Ka Malab-ot Nga Tulumuron?

 Mapagros nga Panglawas Para sa Tanan—Isa Bala ka Malab-ot nga Tulumuron?

HANDUM mo bala ang mapagros nga panglawas para sa imo kag sa imo pamilya? Handum mo gid sa pagkamatuod. Apang bisan pa talagsa lang nagamasakit ang kalabanan sa aton, para sa minilyon ka tawo, ang balatian nagapaantos sa ila tubtob nagakabuhi sila.

Walay sapayan, daku nga mga panikasog ang ginahimo agod punggan ang pagdamo sang balatian. Binagbinaga ang World Health Organization (WHO), isa ka ahensia sang Nasyones Unidas. Sa isa ka komperensia nga ginsakdag sang WHO sang 1978, ang mga delegado gikan sa 134 ka kadutaan kag 67 ka organisasyon sang NU nag-ugyon nga ang kapagros indi lamang isa ka kahilwayan gikan sa balatian. Ang kapagros, siling nila, “isa ka kahimtangan sang bug-os nga pisikal, mental kag sosyal nga kaayuhan.” Gani maisugon nga gindeklarar sang mga delegado ang kapagros subong isa ka “importante nga kinamatarong sang tawo”! Sa amo nagpahamtang ang WHO sing tulumuron nga malab-ot ang “isa ka rasonable nga kapagros sang lawas para sa tanan nga tawo sa kalibutan.”

Makagalanyat kag dungganon pa gani ini nga tulumuron. Apang ano ang posibilidad nga matabo ini? Sa tanan nga patag sang pagpaninguha sang tawo, ang medisina nangin isa sa ginasaligan kag ginadayaw sing labi. Suno sa pamantalaan sang Britanya nga The European, ang mga tawo sa Nakatundan nga kadutaan, naanad na sa “kinaandan nga pagpati sang medisina nga may ‘milagruso nga bulong’ ini: isa ka pildora sa paglubad sa isa ka problema.” Kon sa aton pa, para sa tagsa ka balatian, nagapaabot kita nga ang patag sang medisina makahatag sing isa ka simple kag sampat nga bulong. Matuman gid bala sang medikal nga propesyon ining daku nga ginapaabot sa ila?