ARTIK POU ÉTIDYÉ 7
Prensip otorité-a annan asanblé-a
« Kris sa chèf asanblé-a, ki sa so kò, é a li ki ka sové l’ » (ÉPH. 5:23).
KANTIK 137 Femmes de foi, chrétiennes fidèles
KOUTWÉY ASOU SA NOU KÉ WÈ a
1. Poukisa fanmi Jéova-a ka viv byen ansanm ?
NOU kontan paské nou annan fanmi Jéova. Poukisa nou ka rivé viv ansanm annan lapè annan nou fanmi ? A paské nou chak nou ka fè sa nou pouvé pou rèspèkté prensip otorité Jéova mété-a. Pi nou ké konprann sa prensip-a, pi nou ké rivé viv byen ansanm.
2. Ki késyon nou ké wè annan sa artik-a ?
2 Annan sa artik-a, nou ké wè kouman prensip otorité ka maché annan asanblé krétyen-an. Nou ké wè osi répons asou sa késyon-yan : Ki travay Jéova bay sò-ya fè ? Ès a vré ki tout frè-ya chèf asou tout sò-ya ? Ès otorité ansyen-yan gen asou frè ké sò-ya annan asanblé-a, a menm otorité chèf fanmi-ya gen asou yé madanm ké yé pitit ? Mé pou koumansé, annou wè kouman nou divèt wè nou sò-ya.
KOUMAN NOU DIVÈT WÈ NOU SÒ-YA ?
3. Kouman nou pouvé gen plis rékonésans pou sa nou sò-ya ka fè ?
3 Nou kontan nou sò-ya bokou paské yé ka travay bokou pou pran swen di yé fanmi, pou préché bon nouvèl-a é pou idé frè ké sò-ya annan yé asanblé. Mé nou pouvé gen plis rékonésans ankò pou sa yé ka fè si nou ka gadé kouman Jéova ké Jézi ka wè yé. Sa ké bon osi pou nou gadé kouman apot Pòl té ka fè ké madanm-yan.
4. Kouman Labib-a ka montré ki pou Jéova, madanm-yan gen menm valò ki wonm-yan ?
4 Labib-a ka di ki, pou Jéova, madanm-yan gen menm valò ki wonm-yan. Parèkzanp, i ka di nou ki, annan 1é syèk-a, Jéova bay ni wonm ni fanm so lèspri sen é i pèrmèt yé fè mirak, parèkzanp yé té pouvé palé diféran lang (Actes 2:1-4, 15-18). I sèrvi so lèspri sen pou chwazi ni wonm ni fanm pou yé divini rwa òbò Kris (Gal. 3:26-29). Wonm kou fanm ka rousouvwè èspwar viv pou tout-tan asou latè-a (Rév. 7:9, 10, 13-15). É ni wonm ni fanm divèt préché ké ansényé bon nouvèl-a (Mat. 28:19, 20). Liv Actes-a ka palé di èkzanp roun sò yé ka aplé Prisil : ké so mari Akilas, i idé Apolos, roun wonm ki té fè gran lékòl, pou i té konprann lavérité-a pi byen (Actes 18:24-26).
5. Kisa Luc 10:38, 39, 42 ka di nou asou fason Jézi té ka wè madanm-yan ?
5 Jézi té ka rèspèkté madanm-yan é i té ka bay yé lònò. Farizyen-yan té ka méprizé madanm-yan. Yé pa té ka palé pou yé douvan moun, é yé pa té ké jen palé di paròl Bondjé-a ké yé. Jézi li menm, lò i té ka palé di Paròl Bondjé-a ké so disip-ya, i té ka envité madanm-yan vini kozé ké yé b (li Luc 10:38, 39, 42). I té ka lésé yé vini osi lò yé té ka alé préché (Luc 8:1-3). É lò i té divèt di so apot-ya ki i té résisité, a madanm i chwazi pou alé di yé sa (Jean 20:16-18).
6. Kisa ki ka montré ki Pòl té ka rèspèkté madanm-yan ?
6 Pòl té gen bokou rèspè pou madanm-yan. I fè Timoté sonjé kouman sa té enpòrtan pou i té rèspèkté yé. Parèkzanp, i doumandé li aji « ké madanm-yan ki gen laj kou i té ké fè l’ ké so manman » é « ké jenn fanm-yan kou i té ké fè l’ ké so sò » (1 Tim. 5:1, 2). A vré, i té fè bokou bagaj pou i idé Timoté divini roun krétyen ki gen èspéryans, mé i di ki a so manman ké so granmanman an prémyé ki té idé li byen konnèt « sa ki ékri annan liv sakré-ya » (2 Tim. 1:5 ; 3:14, 15). Annan so lèt i voyé pou Romen-yan, i voyé bonjou pou plizyèr sò é chak kou, i bay yé non. I pa yenki wè yé té ka fè bèl bagaj. I di yé mèrsi osi pou sa yé té fè (Rom. 16:1-4, 6, 12 ; Phil. 4:3).
7. Ki késyon nou ké réponn ?
7 Kou nou wè l’, Labib-a pa ka di ki sò-ya gen mwens valò ki frè-ya. Nou sò-ya ki kontan bay é ki plen ké lanmou ka idé asanblé-a bokou. É ansyen-yan ka konté asou yé pou yé idé pou i kontinyé gen lapè annan asanblé-a é pou nou kontinyé rété byen ansanm. Mé nou divèt réponn sa késyon-yan osi : Poukisa détan Jéova ka doumandé sò-ya kouvri yé tèt ? Kou a frè-ya sèlman ki pouvé divini ansyen ouben asistan, ès sa lé di ki a tout frè ki chèf asou tout sò ?
ÈS TOUT FRÈ-YA CHÈF ASOU TOUT SÒ-YA ?
8. Dapré Éphésiens 5:23, ès tout frè-ya chèf asou tout sò-ya ? Èspliké.
8 Pyès toubonnman ! Roun frè pa chèf asou tout sò-ya annan asanblé-a : yé chèf, a Kris ! (li Éphésiens 5:23). Annan fanmi-a, a mari-a ki chèf so madanm ; mé, roun garson batizé pa chèf so manman (Éph. 6:1, 2). Annan asanblé-a, a jis roun tibi otorité ansyen-yan gen asou yé frè ké sò (1 Thess. 5:12 ; Héb. 13:17). É pou roun sò ki pa maryé é ki pa ka rété annan kaz so papa ké so manman ankò ? I ka kontinyé rèspèkté yé, mé i pa anba otorité so papa ankò. I ka rèspèkté ansyen-yan osi, mé kou frè-ya, a rounsèl chèf i gen : Jézi.
Sa ki pa maryé é ki pa ka rété annan kaz yé manman ké yé papa ankò, anba otorité Jézi (gadé paragraf 8).
9. Poukisa détan sò-ya divèt kouvri yé tèt ?
9 Mé a vré, a wonm-yan Jéova doumandé òrganizé ladorasyon annan asanblé-a é ansényé asanblé-a. I pa bay madanm-yan sa rèsponsabilité-a (1 Tim. 2:12). Poukisa ? Pou tout bagaj fèt byen annan so fanmi. A pou sa osi i mété Jézi kou chèf asou tout wonm pou tout bagaj byen maché. Si yé ka doumandé roun sò fè roun bagaj annan asanblé-a, mé nòrmalman a roun frè ki pou fè l’, a sa moman-an Jéova ka doumandé sò-a kouvri so tèt c (1 Cor. 11:4-7). A pa pou rabésé sò-ya Jéova ka doumandé yé fè sa, mé a pou bay yé posibilité montré yé rèspè pou prensip otorité i mété-a. Toupannan nou ka sonjé sa lidé-ya, annou réponn sa késyon-an : ki kalité otorité chèf fanmi-ya ké ansyen-yan gen ?
KI KALITÉ OTORITÉ CHÈF FANMI-YA KÉ ANSYEN-YAN GEN
10. Kisa ki pouvé bay roun ansyen anvi désidé ki règ moun annan asanblé-a divèt swiv ?
10 Ansyen-yan kontan Kris. É yé kontan « brébi » Jéova ké Jézi bay yé pou okipé (Jean 21:15-17). Paské i kontan asanblé-a, roun ansyen pouvé fè kousidiré i sa papa frè ké sò-ya annan asanblé-a. Pitèt i pouvé di annan so tchò ki, kou roun chèf fanmi pouvé di so madanm ké so pitit ki règ pou yé swiv pou protéjé yé, menm fason-an i pouvé di moun annan asanblé-a ki règ pou yé swiv pou protéjé yé. É roun ran moun annan asanblé pouvé ankourajé l’ fè sa lò yé ka doumandé l’ di yé sa yé divèt fè. Mé ès ansyen-yan ké chèf fanmi-ya gen menm kalité otorité-a ?
Ansyen-yan ka idé sa-ya ki annan asanblé-a rété pròch ké Jéova é santi yé kò byen annan asanblé-a. A yé ki divèt mété péchèr ki pa lé répanti dèrò (gadé paragraf 11-12).
11. Poukisa nou pouvé di ki otorité chèf fanmi-ya gen ka sanblé ké otorité ansyen-yan gen ?
11 Pòl di ki otorité chèf fanmi-ya gen ka sanblé ké otorité ansyen-yan gen (1 Tim. 3:4, 5). Parèkzanp, Jéova lé roun fanmi obéyi chèf fanmi-a (Col. 3:20). Menm fason-an, i lé frè ké sò annan asanblé-a kouté ansyen-yan. I lé osi ki ni chèf fanmi-ya ni ansyen-yan idé sa-ya ki anba yé otorité gen roun lanmityé ké li, idé yé santi yé kò byen annan asanblé-a, é ki yé idé sa-ya ki ka jwenn problèm (Jacq. 2:15-17). É Jéova lé ki ansyen-yan ké chèf fanmi-ya anprann ròt-ya obéyi so lalwa, mé yé pa divèt « alé pi lwen ki sa ki marké » annan Labib-a (1 Cor. 4:6).
A chèf fanmi-a Jéova chwazi pou gidé so madanm ké so pitit é désidé sa yé ké fè. Mé anvan i fè sa, roun chèf fanmi ki plen ké lanmou ké doumandé so madanm sa i ka pansé (gadé paragraf 13).
12-13. Dapré Romains 7:2, ki diférans i gen ant otorité roun chèf fanmi gen ké otorité roun ansyen gen.
12 Menm si otorité chèf fanmi-ya gen ka sanblé ké otorité ansyen-yan gen, yé kanmenm diféran. Parèkzanp, Jéova mété ansyen-yan jij annan asanblé-a é a yé ki divèt mété sa-ya ki ka péché é ki pa lé répanti dèrò (1 Cor. 5:11-13).
13 Mé Jéova ka pèrmèt chèf fanmi-ya fè sèrten bagaj ansyen-yan pa pouvé fè. Parèkzanp, i ka pèrmèt yé désidé ki règ yé fanmi divèt swiv é gadé si yé ka obéyi (li Romains 7:2). A konsa roun chèf fanmi pouvé désidé ki lèr so timoun divèt rantré lakaz. É i pouvé pini yé si yé pa ka rèspèkté sa i di (Éph. 6:1). É roun chèf fanmi ki plen ké lanmou ké doumandé so madanm sa i ka pansé anvan i désidé ki règ fanmi-a divèt swiv, paské yé sa « rounsèl lachè d » (Mat. 19:6).
RÈSPÈKTÈ OTORITÉ KRIS ANNAN ASANBLÉ-A
Jézi ki anba otorité so Papa, ka di sa asanblé krétyen-an divèt fè (gadé paragraf 14).
14. a) Dapré Marc 10:45, poukisa sa nòrmal ki Jéova chwazi Jézi kou chèf asanblé-a ? b) Ki travay Kolèj santral-a ka fè ? (gadé ankadré-a « Travay Kolèj santral-a ka fè »).
14 A gras a ranson-an ki Jéova sové tout moun annan asanblé-a mé osi tout sa ki gen lafwa annan Jézi (li Marc 10:45 ; Actes 20:28 ; 1 Cor. 15:21, 22). Kou Jézi bay so lavi pou sové nou, nou ka konprann poukisa Jéova chwazi l’ kou chèf asanblé-a. Kou a li ki nou chèf, i gen drwa di chak sèrvitèr Bondjé, chak fanmi ké tout asanblé-a, ki règ pou yé swiv. I gen drwa gadé si nou ka obéyi osi (Gal. 6:2). Mé i pa ka yenki di nou ki règ pou nou swiv : i ka bay nou manjé é i ka pran swen di nou osi (Éph. 5:29).
15-16. Kisa sa Marley ké Benjamin ka di ka anprann to ?
15 Sò-ya ka montré yé ka rèspèkté otorité Kris lò yé ka rèspèkté otorité wonm-yan Jézi mété pou pran swen di yé. Roun sò yé ka aplé Marley é ki ka rété Ozétazini ka di sa bokou sò gen annan yé tchò : « Mo plas madanm maryé ké plas mo gen annan asanblé-a gen bokou valò pou mo. A vré, a tout tan mo divèt travay pou kontinyé wè prensip otorité-a kou Jéova ka wè l’. Mé kou mo mari ké frè-ya annan asanblé-a ka rèspèkté mo é ka di mo mèrsi pou sa mo ka fè, sa pi fasil pou mo. »
16 Frè-ya ka montré ki yé ka rèspèkté prensip otorité-a lò yé ka rèspèkté ké bay sò-ya lònò. Benjamin, roun frè ki ka rété an Anglétèr, ka di : « Mo anprann roun patché bagaj gras a répons sò-ya ka bay annan réinyon-yan. Yé bay mo patché konsèy pou mo étidyé Labib-a pi byen é pou mo vin pi vayan annan prédikasyon-an. A pa ti bèl travay yé ka fè. »
17. Poukisa nou divèt rèspèkté prensip otorité-a ?
17 Lò tout moun annan asanblé-a — wonm, fanm, chèf fanmi ké ansyen-yan — ka konprann ké rèspèkté prensip otorité-a, i gen lapè annan asanblé-a. É pi enpòrtan ankò, sa ka glorifyé nou Papa Jéova ki annan syèl-a é ki plen ké lanmou (Ps. 150:6).
KANTIK 123 Fidèlement soumis à l’ordre théocratique
a Ki travay Jéova bay sò-ya fè annan asanblé-a ? Ès tout frè-ya chèf asou tout sò-ya ? Ès ansyen-yan ké chèf fanmi-ya gen menm kalité otorité-a ? Annan sa artik-a, nou ké wè kouman Labib-a ka idé nou bay répons asou sa késyon-yan.
b Gadé paragraf 6 annan artik-a « Soutni sò-ya annan to asanblé », annan Tourdégard sèptanm 2020.
c Gadé ankadré-a « Kitan roun sò divèt kouvri so tèt ? ».
d Roun fanmi pouvé anvi alé annan rounòt asanblé. Pou savé kimoun ki divèt désidé sa, gadé paragraf 17 jik 19 annan artik « Rèspèkté plas ròt moun-yan gen annan asanblé Jéova-a », annan Tourdégard out 2020.
e Pou konnèt plis bagaj asou sa, gadé liv « Gardez-vous dans l’amour de Dieu », paj 209-212.
f Pou konnèt plis bagaj asou sa Kolèj santral-a ka fè, gadé La Tour de Garde 15 jwiyé 2013, paj 20-25.
