Wan Kwestin

Baebol i talem se Jehova i “tinghae” long ded blong ol man blong hem. ?Hem i minim wanem?

▪ Man blong raetem Ol Sam i singsing se: “Jehova i tinghae long ded blong ol man blong hem we oli stap tru long hem.” (Sam 116:15, NW) Jehova i tinghae long laef blong olgeta man blong hem wanwan, we oli wosipim hem long fulhat blong olgeta. Be Ol Sam 116 i no blong tokbaot ded blong wan man nomo.

Nating se wan man blong Jehova i stap tru long Jehova gogo i ded, i no stret blong wan Kristin we i mekem tok blong ded, i yusum Ol Sam 116:15 blong tokbaot man ya. ?From wanem i no stret? From we ol tok ya i no stap tokbaot ol man blong God wanwan. Be ol tok blong vas ya i min se God i tinghae long ful grup blong ol man blong hem we oli stap tru long hem. Bambae hem i no save letem olgeta evriwan i ded.—Plis lukluk Ol Sam 72:14; 116:8.

Ol Sam 116:15 i mekem tingting blong yumi i strong se Jehova bambae i no save letem olgeta man blong hem, olsem wan grup, oli lus evriwan. Long ol yia we i pas, oli kasem bigfala trabol mo ol man oli mekem i nogud long olgeta, be oli stanap strong. Hemia i soemaot se God i neva letem ol man blong hem oli lus evriwan.

Jehova i gat olgeta paoa mo bambae tingting blong hem i kamtru. From samting ya, hem i no save letem ol man blong hem oli lus evriwan. Sipos no, bambae i olsem se ol enemi blong hem oli gat paoa we i bigwan moa long hem. !Be i no olsem! Tingting blong Jehova i mas kamtru. Bambae ol man we oli stap tru long hem oli stap long olgeta ples long wol. (Aes. 45:18; 55:10, 11) Sipos i no gat man blong mekem wosip long Jehova long wol, bambae i no gat man i mekem tabu wok blong hem, long yad blong tempol long saed blong spirit. Mo bambae i no gat fandesen blong “niufala wol.” Hemia ol stret man we oli stap long wol aninit long “niufala heven.” (Rev. 21:1) Sipos i no gat ol man long wol we oli stap aninit long rul blong Kraes, bambae Taosen Yia Rul blong hem i no save kamtru.—Rev. 20:4, 5.

Sipos God i letem ol enemi blong hem oli spolem olgeta man blong hem long wol, hemia bambae i spolem nem blong hem mo hae rul blong hem. Mo bambae hem i no soemaot we hem i Hae King blong heven mo wol. Be Jehova i tinghae long nem blong hem, mo hem i no wantem se ol man oli tingting nogud long hem. Taswe bambae hem i no letem olgeta man blong hem oli ded. Yu traem tingbaot samting ya: ‘Oltaem God i mekem ol samting we i stret.’ From samting ya, bambae hem i lukaot gud long ful grup blong ol man blong hem we oli stap tru long hem. (Dut. 32:4; Jen. 18:25) Sipos God i letem ol man blong hem evriwan oli lus, bambae hem i agensem Tok blong hem, we i se: “Hae God i mekem wan strong promes finis long yufala, se hem bambae i no save lego yufala. Hem i talem finis se yufala i man blong hem.” (1 Saml. 12:22) I tru, Jehova i “no save lego yumi ya we yumi ol man blong hem, hem bambae i no save gowe long yumi ya we nem blong hem i stap finis long yumi.”—Sam 94:14.

!Yumi harem gud tumas blong save se ol man blong Jehova bambae oli neva lus long wol! Yumi mas gat strong tingting blong stap tru long God, mo trastem promes blong hem se: “Ol samting ya blong mekem faet bambae oli no save mekem yufala i karekil. Mo bambae yufala i gat ansa tu blong givim long olgeta we oli gat poen long yufala. Yufala i man blong wok blong mi, mo bambae mi blokemgud yufala, mi mekem yufala i win. Mi mi Hae God, mo hemia tok blong mi.”—Aes. 54:17.

[Tok blong makem poen long pej 32]

Bambae God i neva letem ol man blong hem oli lus evriwan