Tok ya strong promes i “wan spesel promes, wan promes we wan man i mekem long wan haeman o i promes blong mekem wan samting, mo plante taem hem i singaot long God olsem witnes blong hem.” Maet hem i talem o i raetem.

Maet samfala oli ting se i rong blong mekem wan strong promes, from we Jisas i talem se: “Yufala i no mas talem nem blong wan samting blong mekem promes blong yufala i strong . . . ‘Yes’ we yufala i talem i mas minim ‘yes’ nomo, mo ‘No’ we yufala i talem i mas minim ‘no’ nomo. Ol narafala tok we yufala i ademap, oli kamaot long man ya we i rabis.” (Mat. 5:33-37) Yes, Jisas i save se long sam situesen, Loa blong Moses i talem se ol man Isrel oli save talem nem blong God blong mekem promes blong olgeta i strong, mo se i bin gat sam man blong God we oli mekem olsem. (Jen. 14:22, 23; Eks. 22:10, 11) Mo hem i save tu se Jehova i yusum nem blong hem wan blong mekem ol strong promes. (Hib. 6:13-17) Taswe, Jisas i no minim se yumi neva mas mekem wan strong promes. Be hem i wonem ol man blong oli no mekem ol strong promes long ol samting we oli no impoten o from wan olbaot risen nomo. Oltaem yumi mas mekem samting we yumi promes blong mekem, from we hemia nao samting we Jehova i wantem se yumi mekem.

?Bambae yu mekem wanem sipos oli askem yu blong mekem wan strong promes? Fastaem yu mas meksua se yu save mekem samting we yu promes blong mekem. Sipos yu no sua, i moa gud yu no mekem. Baebol i wonem yumi se: “I moa gud yu no mekem wan strong promes nating, i bitim we yu mekem strong promes be yu no holem.” (Pri. 5:5) Biaen, tingbaot ol rul blong Baebol we i laenap wetem promes we oli askem yu blong mekem, mo tekem desisen folem tingting we yu trenem finis folem Baebol. ?Wanem sam long ol rul ya blong Baebol?

Sam strong promes oli no agensem wil blong God. Eksampol, ol Witnes blong Jehova oli mekem wan strong promes taem oli mared. Long fored blong God mo ol man, man mo woman ya i promes blong lavem, lukaot gud, mo respektem tufala ‘long olgeta yia we tufala i laef i stap.’ (Sam narafala kapol maet oli no talem ol semfala toktok olsem taem oli mared, be yet oli mekem wan promes long fored blong God.) Biaen tufala i kam hasban mo waef mo tufala i mas stap tugeta long ful laef blong tufala. (Jen. 2:24; 1Kor. 7:39) Promes ya blong mared i stret nomo, mo i laenap wetem wil blong God.

Sam promes oli agensem wil blong God. Eksampol, wan tru Kristin bambae i no mekem wan strong promes blong yusum ol tul blong faet blong difendem kantri blong hem, o blong lego bilif blong hem. Sipos hem i mekem olsem bambae hem i agensem ol komanmen blong God. Ol Kristin oli “no blong wol ya,” taswe yumi no save joen long ol raorao mo ol faet.—Jon 15:19; Aes. 2:4; Jem. 1:27.

 Sam strong promes, ol Kristin oli mekem folem tingting we i stikim olgeta. Samtaem, bifo we yumi mekem wan strong promes, yumi mas tingbaot toktok blong Jisas we i se: “Ol samting we oli blong Sisa, yufala i givimbak long Sisa, mo ol samting we oli blong God, yufala i givimbak long God.”—Luk 20:25.

Eksampol, traem tingbaot sipos wan Kristin i aplae from wan paspot o blong i kam sitisen blong wan kantri, mo hem i faenemaot se hem i mas mekem wan strong promes blong sapotem kantri ya. Sipos strong promes ya i minim se man ya i mas mekem sam samting we i agensem loa blong God, tingting we man ya i trenem folem Baebol bambae i no letem hem blong mekem strong promes ya. Be maet gavman i save letem hem blong jenisim sam toktok blong strong promes ya, olsem nao tingting we i stikim hem bambae i letem hem blong mekem strong promes ya.

Sipos wan Kristin i mekem wan strong promes we oli jenisim sam toktok blong hem insaed, maet hemia i laenap wetem rul ya we i stap Rom 13:1, we i se: “I gud evri man oli putum olgeta oli stap aninit long ol haeman we oli stap rul.” Taswe, Kristin ya i save tingbaot se i no gat wan samting i rong long strong promes ya we God i talem finis se ol Kristin oli mas mekem.

Mo tu i impoten we yu obei long tingting we i stikim yu, sipos oli askem blong yu yusum wan samting o mekem wan saen taem yu mekem wan strong promes. Ol man Rom bifo mo ol man Sitia oli mekem ol strong promes taem oli yusum naef blong faet blong olgeta, we i pija blong wan god blong faet, olsem wan garanti se man i save trastem tok blong olgeta. Ol man Gris oli leftemap wan han blong olgeta i go antap long heven taem oli mekem strong promes. Oli luksave se i gat wan man we i gat bigfala paoa we i stap lukluk ol samting we yumi talem mo mekem, mo yumi gat poen long fored blong hem.

I tru, wan man blong Jehova i no save mekem wan strong promes long eni samting blong kantri we i joen wetem giaman wosip. ?Be olsem wanem sipos yu pas long kot mo oli askem yu blong holem wan Baebol, mo promes se bambae yu tok tru? Long taem olsem, maet yu save mekem from we Baebol i tokbaot sam man blong bilif we oli mekem wan samting, taem oli mekem wan strong promes. (Jen. 24:2, 3, 9; 47:29-31) I impoten blong tingbaot se sipos yu mekem wan strong promes olsem, yu stap promes long fored blong God se bambae yu tok tru.

From we yumi tinghae long frensip blong yumi wetem Jehova, yumi mas prea mo tingting gud fastaem bifo we yumi mekem eni strong promes we oli askem yumi blong mekem, olsem nao tingting blong yumi i no stikim yumi mo yumi no agensem ol rul blong Baebol. Sipos yu disaed blong mekem wan strong promes, yu mas meksua se yu kipim promes ya.—1 Pita 2:12.