Balilemana Lelo Balafwaisha Ukubomba

NGA mwakumana na baLeonardo umuku wa kubalilapo fye teti mutunganye ukutila kuti babomba umulimo wa makuule pantu baliputuka amaboko. BaLeonardo baputwike amaboko ilyo basangilwe mu busanso pa ncito. Nangu cingatila balilemana, balebombesha ilyo balekuula icikuulwa mu Acajutla, ku El Salvador, nge fyo mulemona pa cikope.

Pa kuti bengabombako umulimo wa bukuule, baLeonardo bailepangisha ifya kubombelako. Pa kubika iloba mu ngolofwana baleingisha ukuboko mu capala umupaipi ico baocelela kuli fosholo. Pa kukunkulusha ingolofwana baleingisha amaboko mu mipeto iyo baocelele ku ngolofwana. Cinshi calengele ukuti babombeko uyu mulimo wa bukuule?

BaLeonardo balefwaisha ukukuulako Ing’anda ya Bufumu, nelyo icikuulwa umulonganina Inte sha kwa Yehova ku ncende bekala. BaLeonardo nga balikwete umwa kulesesha umwingi pa kuti bekuulako Ing’anda ya Bufumu. Balebomba incito, balilemana, kabili bali babomfi batumikila mu cilonganino. Nangu cibe ifyo, balefwaisha ukubombela Lesa apo bengapesha mu mulimo wa kukuula Ing’anda ya Bufumu.

Bushe na imwe mwaba no mutima wa kufwaisha ukubombela Lesa? BaLeonardo tabatile apo nalilemana nshakabombeko uyu mulimo, lelo balibomfeshe amano no kuyapangisha ifya kubombelako pa kuti fye babombeko umulimo uyo bashali no kukwanisha ukubomba. Balebombela Lesa ‘no kutontonkanya kwabo konse.’ (Mateo 22:37) Bonse ababomba umulimo wa kukuula Amayanda ya Bufumu aya Nte sha kwa Yehova mu calo conse, nampo nga balilemana nelyo iyo, babomba no mutima wa kuipeelesha. Bonse abalefwaya kuti basangwako ku kulongana kwa Nte sha kwa Yehova, na imwe bene kuti mwayasangwako.