Bushe Mulacindika Abasumina Banenu Abakoloci?

ILYO abena Israele ba ku kale bali mu cipingo na Lesa, bapeelwe ifunde ilyaleti: “Ku cinso ca wa mfwi uleima, ulecindika ne cinso ca mukote, no kuba na katiina kuli Lesa obe: nine Yehova.” (Ubwina Lebi 19:32) E ico, ukucindika abakoloci wali mulimo washila, uwalingene fye no kuinashisha kuli Lesa. Nangu ca kuti Abena Kristu ilelo tabakonka Ifunde lya kwa Mose, lilatucinkulako ukuti Yehova alikatamika sana ababomfi bakwe abakoloci. (Amapinda 16:31; AbaHebere 7:18) Bushe tulapashanya Yehova muli ci? Bushe twalicindamika bamunyinefwe ne nkashi Abena Kristu abakoloci?

Alicindamike Cibusa Wakwe Umukoloci

Ilyashi limo mu Baibolo ililanda sana pa kucindika abakoloci lisangwa muli 2 Ishamfumu. Mwaba ubulondoloshi bwa fyo kasesema Elisha apyene kasesema Eliya uwali umukalamba ukumucila. Moneni icacitike pa bushiku bwa kulekelesha ubwa kwa kasesema Eliya mu bufumu bwa mikowa 10 ubwa Israele.

Pali bulya bushiku, Yehova aebele kasesema mukoloci Eliya ukufuma ku Gilgali ukuya ku Betele, ukufuma ku Betele ukuya ku Yeriko, no kufuma ku Yeriko ukuya ku Mumana wa Yordani. (2 Ishamfumu 2:1, 2, 4, 6) Pali lulya lwendo ulwa bakilomita mupepi na 50, Eliya aebele Elisha imiku itatu ukushala. Lelo, nga filya Ruti umukashana akeene ukusha Naomi imyaka iingi ku numa, e fyo na Elisha akeene ukusha kasesema umukoloci. (Ruti 1:16, 17) Elisha alandile imiku itatu ati: “Umweo wa kwa Yehova, kabili umweo wa mutima obe, nshashale.” (2 Ishamfumu 2:2, 4, 6) Pali iyi nshita, Elisha aali napyungila Eliya pa myaka 6. Na lyo line, alefwaisha ukubombela pamo na Eliya ubumi bwakwe bonse. Na kuba, ilyashi litwalilila ati: “Nomba bene baleya balelanda, e lyo, moneni, . . . Eliya aninikilwe mu nkuuka mu muulu.” (Icikomo 11) Eliya na Elisha bali mu lyashi ukufika ku mpela ya butumikishi bwa kwa Eliya mu Israele. Kasesema uwali umulumendo cimoneke fyo alefwaisha ukusambilila ifyebo ifingi kabili ifya kukoselesha ukufuma ku mukoloci, uwali uwabelesha ukumucila. Nacimoneka fye apabuuta ukuti alicindamike cibusa wakwe umukoloci.

‘Kwati ni Bawiso na Banoko’

Calyanguka ukumona umulandu Elisha atemenwe kasesema umukoloci—kwati fye ni  wishi wa ku mupashi. (2 Ishamfumu 2:12) Ilyo fye talapwisha umulimo wakwe mu Israele, Eliya atile kuli Elisha: “Lombe cintu ico ndekucitila, ncili nshilasendwa pali iwe.” (Icikomo 9) E ico ukufika fye na ku mpela, Eliya aleangwa ukukabila kwa ku mupashi ukwa wali no kumupyana mu kutwalilila umulimo wa kwa Lesa.

Ilelo, cisuma sana ukumona ukwangwa kwapala wishi na nyina muli bamunyinefwe abakoloci aba Bwina Kristu ne nkashi abafunda abacaice ukwishiba na mano. Ku ca kumwenako, abakokole ababomba pa maofeshi yanono aya Nte sha kwa Yehova balaitemenwa ukwafwilisha abapya abaleisa mu lupwa lwa Bethel ukusambilila incito balekabila pa kubomba umulimo bapeelwa. Cimo cine na bakangalila benda na bakashi babo ababombela ifilonganino pa myaka iingi. Balaitemenwa ukufundako bambi ifyo baishiba ilyo balebakansha mu mulimo wa bukangalila. Kabinge, mu filonganino fya Nte sha kwa Yehova mwi sonde lyonse, mwaba bamunyina ne nkashi abakoloci ababombela Yehova mu busumino pa myaka iingi kabili abaitemenwa ukusambilishako abapya mu cilonganino ubupanda no kubelesha banonka.—Amapinda 2:7; Abena Filipi 3:17; Tito 2:3-5.

Ukwangwako ukwa aba Abena Kristu abakoloci kucilenga ukwanguka ukubacindika. E ico tulefwaya ukupashanya ica kumwenako cashile Elisha pa kulacindikisha abasumina banensu abakoloci. Nga filya umutumwa Paulo atucinkulako, tulemona “umwaume umukalamba . . . kwati ni [shifwe]” na “banakashi bakalamba kwati ni [banyinefwe].” (1 Timote 5:1, 2) Nga tulecite ci ninshi tuleafwa ifintu ukwenda bwino mu cilonganino ca Bwina Kristu mu calo conse.

[Icikope pe bula 30]

Elisha alefwaisha ukubombela pamo na Eliya ubumi bwakwe bonse

[Ifikope pe bula 31]

Abacaice balanonkelamo apakalamba ukufuma ku Bena Kristu abakoloci