MU CIPANDE ico bafumishe mu lupapulo ulo twita nomba ati Ubutumikishi Bwesu Ubwa Bufumu ubwa December 1937, ubwa ku London mwali amashiwi ya kuti “Bakasabankanya ba Bufumu mu Britain Shibukeni!!” Mwali na ka mutwe akanono kaleti: “Mu Myaka 10 Takwaba Ukulunduluka.” Lipoti ya mulimo iyali pe bula lya kubalilapo yalilangile ukuti ukutula mu 1928 ukushinta mu 1937 takwali ukulunduluka.

Finshi fyalengele ukuti umulimo wa kubila imbila nsuma ubwelele pa nshi mu Britain? Bakasabankanya tabali abacincila mu mulimo wa kubila imbila nsuma pa myaka iingi. Cimbi icalengele ca kuti aba ku musambo balemona kwati mu Britain mwalingile ukuba fye bapainiya 200 kabili balingile ukulabombela mu fifulo ifyali ukutali, tabalingile ukulabombela mu filonganino umo bali. E ico baebele bakasabankanya abalefwaya ukuba bapainiya ukulaya ku fyalo fimbi ifya mu Bulaya. Icawemeko ca kuti abengi balile ku fyalo pamo nga France nangu ca kuti tabaishibe indimi balanda kuli ifi fyalo.

Mu Ubutumikishi Bwesu Ubwa Bufumu ubwafumine mu 1937 balikoseleshe bakasabankanya ukuti mu mwaka wa 1938 balingile ukubila pa amaawala milioni imo! Babebele ukuti nga ca kutila bakasabankanya balebomba amaawala 15 cila mweshi e lyo bapainiya nabo balebomba amaawala 110 cila mweshi, bali no kufisha amaawala milioni imo. Balibebele no kuti nga balefwaya kuti basala inshiku umo bali no kulabomba amaawala 5 cila bushiku no kuti balingile ukulabwelela ku bantu abo babilileko imbila nsuma, maka maka mu kati ka mulungu icungulo bushiku.

Ifi babebele fyalengele bakasabankanya abengi babe abacincila mu mulimo wa kubila. Ba Hilda Padgett batile: “Ifyo aba ku maofeshi yakalamba batwebele ukucita e fyo fwe bengi twalefwaisha kabili mwalifumine ifintu ifisuma nga nshi. * Bankashi E. F. Wallis nabo batile: “Filya batwebele ukuti nga tulefwaya inshiku shimo kuti tulebomba amaawala 5, fyalengele twalabomba bwino! Ala ukubomba umulimo wa kwa Shikulu akasuba konse kwalelenga twaba sana ne nsansa! . . . Twalenaka lelo twaleba ne nsansa!” Munyinefwe Stephen Miller na o alitendeke ukubombesha mu mulimo wa kubila imbila nsuma. Alefwaisha ukubomba ilyo acili umwaice! Aleibukisha ukuti aba bwananyina abengi baleya mu kubila imbila nsuma akasuba konse pa macinga e lyo icungulo bushiku balekutika amalyashi ayakopwa. Bali abacincila mu mulimo, balebomfya ifipampa kabili balepeela abantu magazini mu misebo.

Na kabili mu Ubutumikishi Bwesu Ubwa Bufumu baebele bakasabankanya ukuti: “Bapainiya 1,000 balefwaikwa.” Kwali ukwaluka mu fyo bapainiya  balebomba, babebele ukulabombela mu filonganino umo bali pa kuti baletungilila no kukosha ifilonganino. Bankashi Joyce Ellis batile: “Bamunyinefwe abengi balefwaisha ukuba bapainiya. Nangu ca kuti nali fye ne myaka 13 nalefwaya ukutendeka bupainiya.” Mu July 1940 ilyo bali ne myaka 15 balitendeke bupainiya. Munyinefwe Peter uwaishileupa nkashi Joyce na o alyumfwile ifyali muli ulu lupapulo kabili “alitendeke ukutontonkanya pa kuba painiya.” E ico mu June 1940, ninshi ali ne myaka 17 alicofele incinga amakilomita 105 ukuya ku Scarborough uko ailebomba bupainiya.

Ba Cyril na ba Kitty Johnson baliipeeleshe pa kuti babombeko bupainiya. Balishitishe ing’anda yabo ne fipe pa kuti balebomfya isho indalama ilyo balebomba bupainiya. Ba Cyril balilekele incito balebomba, kabili no mweshi tawapwile ukutula apo balekele incito, balitendeke bupainiya. Ba Cyril batile: “Twalefwaisha ukubomba. Twaliipeelesha ukubomba kabili twali ne nsansa.”

Ilyo bapainiya bafulile, bamunyinefwe abaletungulula umulimo bafwaile inshila isha kwafwilamo bapainiya. Ba Jim Carr abali bakangalila ba muputule mu 1938 balifwaile bapainiya amayanda mu misumba ukulingana ne fyo babebele. Bapainiya babebele ukulaikala mu mabumba kabili ici calengele belapoosa indalama ishingi. Mu musumba wa Sheffield balesonkela ing’anda iikalamba kabili munyinefwe umukalamba mu fya kwa Lesa e waleyangalila iyi ng’anda. Aba mu cilonganino balisangwile indalama ne fipe fya mu ng’anda. Ba Jim batile: “Bonse balebombela pamo pa kuti ifintu fileenda bwino. Bapainiya abali 10 e baleikala muli iyi ng’anda kabili balebombesha. Cila lucelo balelanshanya ilembo lya bushiku ilyo bashilalya ica kulya ca lucelo kabili cila bushiku baleya ku fifulo balebombela muli uyu musumba.”

Bakasabankanya na bapainiya balibombeshe ica kuti mu mwaka wa 1938 balifishishe amaawala milioni imo. Na kuba, amalipoti yalangile ukuti bakasabankanya balibombele amaawala ayengi, balipeele abantu impapulo ishingi kabili pa miku iingi balibwelele ku bo babilileko imbila nsuma. Mu myaka 5 bakasabankanya mu Britain balifulile nga nshi. Ifi bakasabankanya babikile sana amano ku mulimo wa Bufumu fyalibakoseshe ica kuti balitwalilile ukubombela Yehova ilyo kwali inkondo.

Muno nshiku bapainiya mu Britain balefulilako fye maka maka apo inkondo ya Armagedone ilepalama. Mu myaka 10 iyapitapo impendwa ya bapainiya ilekulilako, mu October 2015 bafikile kuli 13,224. Aba bapainiya balishiba ukuti takwaba nangu cimo icilenga umuntu aba ne nsansa ukucila ukubombela Yehova mu mulimo wa nshita yonse.