KWALI ukukumana ukwacindama sana mu Yerusalemu. Imfumu Davidi yalitile bacilolo, bacilolo ba kwi sano e lyo na baume impalume. Aba bonse balitemenwe ilyo baumfwile ukubilisha kwaibela. Yehova alyebele umwana wa kwa Davidi, Solomone ukukuula icikuulwa icikulu kabili icisuma nga nshi umo bali no kulapepela Lesa wa cine. Imfumu ya mu Israele ilyo yakotele baliipeele ifya kukonka pa kukuula ing’anda ya kwa Lesa kabili na yo yapeele Solomone fyonse ifyo umupashi wailangile. Davidi atile: “Umulimo ukalamba; pantu ing’anda iyi iikalamba te ya muntu, lelo ya kwa Yehova Lesa.”—1 Imila. 28:1, 2, 6, 11, 12; 29:1.

Lyena Davidi abepwishe ati: “Nani uuleipeelesha ukwisusha iminwe yakwe ne ca bupe kuli Yehova lelo?” (1 Imila. 29:5) Bushe nga e ko mwali, nga mwacitile shani? Bushe nga mwaliipeeleshe ukutungilila uyu mulimo uukalamba? Ilyo line fye abena Israele balitendeke ukupeela ifya bupe. Baibolo itila: “Abantu balisekelele pa kutuula imituulo ya kuitemenwa, pantu bapeele ne mitima yonse mu kuitemenwa kuli Yehova.”—1 Imila. 29:9.

Pa numa ya myaka iingi, Yehova alipekenye icintu icikalamba icacila pe tempele. Alibikileko itempele lya mampalanya ilikalamba, e kutila inshila iyo Lesa apekanya ukuti abantu balemupepelamo ukupitila mwi lambo lya cilubula ca kwa Yesu. (Heb. 9:11, 12) Bushe Yehova afwa shani abantu muno nshiku ukubwelela kuli ena? Alabafwa ukupitila mu mulimo tubomba uwa kupanga abasambi. (Mat. 28:19, 20) Pa mulandu wa uyu mulimo, cila mwaka tulasambilisha abantu abengi nga nshi Baibolo, abasambi abengi balabatishiwa kabili ifilonganino ifingi filapangwa.

Ici calenga ukuti kube ukupulinta impapulo ishilanda pali Baibolo ishingi, ukukuula Amayanda ya Bufumu no kulayawamya e lyo no kukuula ififulo fya kulonganinapo ukulongana kwa muputule no kwa citungu. Ukwabula no kutwishika umulimo wa kubila imbila nsuma ukalamba kabili ulalenga tuleba ne nsansa!—Mat. 24:14.

Apo twalitemwa Lesa na bantu banensu kabili twalishiba ukuti tulingile ukubomba bwangu umulimo wa kubila pa Bufumu, calenga abantu ba kwa Lesa ‘baleipeelesha ukwisusha iminwe yabo ne ca bupe kuli Yehova,’ ukupitila mu misangulo. Ala tulatemwa ‘ukucindika Yehova ku fyuma fyesu’ no kumona ifyo fibomfiwa bwino mu mulimo uukalamba!—Amapi. 3:9.