Mika 6:1-16
6 Shi umfweni mwe bantu ico Yehova alesosa.+ Imeni, lubululeni umulandu ne mpili, no tupili tuumfwe ishiwi lyenu.+
2 Umfweni, mwe mpili, umulandu wa kwa Yehova, na mwe fishawasha, mwe mashintililo ya pano isonde;+ pantu Yehova ali no mulandu wa kulubulwisha abantu bakwe, kabili ni Israele e o alebikana nankwe ifikansa:+
3 “Iye mwe bantu bandi,+ nga cinshi ico namucita? Kabili cinshi mwantendelwa?+ Aleni nshinineni.+
4 Pantu namufumishe mu calo ca Egupti,+ na mu ng’anda ya busha e mo namulubwile;+ natumine na Mose, Aarone, na Miriamu ku cinso cenu.+
5 Mwe bantu bandi, shi ibukisheni+ ifyo Balaki imfumu ya kwa Moabu yapangile,+ ne fyo Balaamu mwana Beore amwaswike.+ Ukufuma ku Shitimu+ ukufika fye na ku Gilgali,+ pa kuti imilimo yalungama iya kwa Yehova ishibikwe.”+
6 Nga kanshi cinshi ndeya+ na co kuli Yehova? Nga kanshi cinshi ico ndekontama na co kuli Lesa wa mu muulu?+ Bushe ndeya ne mituulo ya koca,+ no twana twa ng’ombe utwa mwaka umo?
7 Bushe Yehova kuti atemwa nga namupeela amakana ya basukusuku, nangu amakana amakumi aya mafuta ayengi aya kuti yalapita ngo mumana?+ Bushe ndepeela ibeli lyandi ilyaume pa bupulumushi bwandi, umwana wa mu nda yandi pa lubembu lwa mweo wandi?+
8 We muntu, alikweba icisuma.+ Kabili cinshi cimbi Yehova alefwaya kuli iwe? Bushe te kuba no mulinganya,+ no kutemwa icikuuku,+ no kwenda bufuuke bufuuke+ na Lesa obe?+
9 Ishiwi lya kwa Yehova lyabilikisha+ ku musumba, no muntu wa mano akatiina ishina lyenu.+ Umfwileni inkonto no waibikileko.+
10 Bushe mu ng’anda ya mubifi mucili ifyuma fya bubifi,+ ne tepe ilya kupiminamo ilinono ilyakaanwa?
11 Bushe kuti naba uwasanguluka mu mibele ilyo ndi na basekelo abashalungama no mufuko wa mabwe aya kupiminako aya bucenjeshi?+
12 Pantu abakankaala bakwe balecita ubunkalwe, na bekashi bakwe balanda ifya bufi,+ no lulimi lwabo lwa bucenjeshi mu tunwa twabo.+
13 “Na ine, nkakulwalika pa kukupuma impumo;+ kabili ukashala icibolya, pa mulandu wa membu shobe.+
14 Kabili ukalya, lelo tawakekute, tamwakabe nangu kamo mu nda yobe.+ Ukafumya ifintu lelo tawakafisende; na fyonse ifyo wasenda, nkafipeela ku lupanga.+
15 Ukabyala imbuto, lelo tawakalobolole. Ukanyantaula imiolife, lelo tawakasubeko amafuta; ukanyantaula no mwangashi uwalowa, lelo tawakanweko umwangashi.+
16 Kabili ifipope ifyalembwa ifya kwa Omri+ no mulimo onse uwa mu ng’anda ya kwa Ahabu filakonkwa,+ na imwe mukonka amano ayo bamupanda;+ ica kuti nkalenga mukabe ica kupapa na bekashi bakwe bakaba ica kupapa;+ no museebanya wa bantu na bantu ukaba pali imwe.”+
