Mika 7:1-20
7 Cabipa kuli ine,+ pantu naba nge fisabo fya lusuba ifyasabwa, nge myangashi ya kutolelesha iyalonganikwa!+ Takuli icisansangu ca myangashi ica kulya, nangu likunyu lya kubangilila, ilyo umutima wandi wingafwaisha!+
2 Aliloba uwa cishinka ukufuma pano isonde, kabili tamwaba uwatambalala mu bantunse.+ Bonse fye babelamina umuntu pa kuti basumye umulopa.+ Umuntu no muntu alesowa munyina ukuti amwikate mwi sumbu.+
3 Iminwe yabo yaba pa bubi, kabili yalicenjela ku kubucita;+ cilolo alalomba fimo, no ulepingula apingwila ukupeelwa icilambu,+ no mukalamba asosa ico umweo wakwe ufwaisha, umweo wakwe wine;+ kabili ububi e bo bapikula.
4 Umusuma sana muli bena aba nga bacilasa, uwatambalala sana muli bena alibipa ukucila ulubao lwa myunga.+ Ubushiku bwa balinshi bobe, ubwa kupempulwa, bukesa.+ E lyo nomba kukaba ukufulungana kuli bena.+
5 Mwicetekela munenu. Mwicetekela cibusa wa pa mutima.+ Wilasokolwela uusendama pa cifuba cobe icintu nangu cimo.+
6 Pantu umwana umwaume asuula wishi; no mwana umwanakashi aimina nyina;+ na nafyala aimina nyinafyala;+ na balwani ba muntu, ba mu ng’anda yakwe.+
7 Lelo ine nakulalolela Yehova.+ Nakulalindilila Lesa we pusukilo lyandi.+ Lesa wandi akang’umfwa.+
8 Wisekelela pali ine, we mwanakashi, we mulwani wandi.+ Nangu nawa, ukwima nkema;+ nangu njikale mu mfifi,+ Yehova akaba ulubuuto kuli ine.+
9 Nkashipikisha ubukali bwa kwa Yehova ukufikila akandubulwishe pa mulandu wandi no kucita umulinganya kuli ine,+ pantu nimubembukila.+ Akandeta ku lubuuto; nkalolesha pa bulungami bwakwe.+
10 Kabili umulwani wandi akamona, ne nsoni shikamwikata,+ uwalenjeba ati: “Ali kwi Yehova Lesa obe?”+ Amenso yandi yakamulolesha.+ Awe akaba apa kunyantaula, nga amatipa aya mu misebo.+
11 Ubushiku bwa kukuula ifibumba fyobe ifya mabwe, icipoope cikaba ukutali sana muli bulya bushiku.+
12 Muli bulya bushiku bakesa na kuli iwe ukufuma ku Asiria ne misumba ya ku Egupti, no kufuma ku Egupti ukufika fye na ku Mumana;+ no kufuma kuli bemba ukufika kuli bemba, no kufuma ku lupili ukufika na ku lupili.+
13 Ne calo cikaba icibolya pa mulandu wa bekashi ba ciko, pa mulandu wa fyafuma mu micitile yabo.+
14 Cema abantu bobe ku nkonto yobe,+ impaanga shobe, abaleikala beka mu mutengo—mu kati ka miti ya fitwalo.+ Leka balye mu Bashani na Gileadi+ nga mu nshiku sha kale.+
15 “Nkalanga ena ifipesha amano nga filya namulangile ilyo mwalefuma mu calo ca Egupti.+
16 Inko shikamona no kwikatwa insoni pali bumpalume bwabo bonse.+ Bakabika iminwe yabo pa tunwa twabo;+ na matwi yabo yakakoma.
17 Bakamyanga ulukungu nge nsoka;+ bakesa baletutuma ukufuma mu fyubo fyabo nge fikulika ifya pano isonde.+ Kuli Yehova Lesa wesu e ko bakesa baletutuma, kabili bakakutiina.”+
18 Nani Lesa uwaba nga imwe,+ uwelela ifilubo no kwelela imembu+ isha bantu bakwe abashalapo?+ Takakalipe umuyayaya, pantu atemwa icikuuku.+
19 Na kabili akatubelela uluse;+ akapasa ifilubo fyesu.+ Akapoosa na pa nshi ya bemba imembu shabo shonse.+
20 Mukalanga ukuti muli ba cishinka kabili muli ba cikuuku kuli Yakobo, na kuli Abrahamu, pa kufikilisha ifyo mwalapile ku fikolwe fyesu ifya ku kale.+
