2 Samwele 1:1-27
1 Nomba ilyo Shauli afwile, kabili ilyo Davidi abwelele ukufuma ku kwipaya abena Amaleke,+ Davidi aikele mu Siklagi inshiku shibili.+
2 Nomba pa bushiku ubwalenga shitatu, moneni! kwaishile umuntu+ uwafumine mu nkambi, uwafumine kuli Shauli, uwafwele ifya kufwala ifyalepuka+ kabili ali ne loba pa mutwe;+ kabili ilyo fye afikile kuli Davidi, awile pa nshi+ alatoota.
3 E lyo Davidi amwipwishe ati: “Ni kwi wafuma?” na o ayaswike ati: “Ku nkambi ya bena Israele e ko napusuka.”
4 E lyo Davidi amwipwishe ati: “Bushe ifintu fili shani? Shi njeba.” Na o atile: “Abantu nabafulumuka ku bulwi kabili abengi nabawa no kufwa,+ kabili Shauli+ na Yonatani+ umwana wakwe nabafwa.”
5 Davidi aipwishe umulumendo uwalemweba ati: “Waishiba shani ukuti cine cine Shauli no mwana wakwe Yonatani nabafwa?”+
6 E lyo umulumendo uwalemweba atile: “Cali fye nkuma, nali pa Lupili lwa Gilboa,+ kabili namwene Shauli ashintilile pe fumo lyakwe;+ kabili, moneni! aba pa maceleta na ba pali bakabalwe balepalamina kuli ena.+
7 Ilyo apilibukile ku numa, amona ine, alinjitile, na ine nalyaswike ati, ‘Mukwai!’
8 E lyo anjipwishe ati, ‘Ni wani?’ na ine natile, ‘Ndi mwina Amaleke.’+
9 E lyo anjebele ati, ‘Isa, unjipaye, pantu ninjikatwa icifungalashi, lelo umweo+ wandi ucili muli ine.’
10 E ico napaleme apo ali no kumwipaya,+ pantu nalishibe ukuti ilyo awile tali no kuba no mweo kabili. E lyo nabuulile icisote ca bufumu+ icali pa mutwe wakwe ne koosa ilyali ku kuboko kwakwe, ukuti mfilete kuno kuli shikulu.”
11 E lyo Davidi aikete ifya kufwala fyakwe no kufilepula,+ na bantu abali nankwe na bo bacitile ifyo fine.
12 Kabili batampile ukuloosha no kulila+ kabili balekele ukulya+ mpaka icungulo pa mulandu wa kwa Shauli no mwana wakwe Yonatani na pa mulandu wa bantu ba kwa Yehova na pa mulandu wa ba mu ng’anda ya kwa Israele,+ pantu balipaiwe ku lupanga.
13 E lyo Davidi aipwishe umulumendo uwamushimikile ifi fintu ati: “Bushe uli wa kwi?” na o atile: “Ndi mwana wa mulebeshi, umwina Amaleke.”+
14 Kabili Davidi amwipwishe ati: “Bushe cinshi ushatiinine+ ukubika iminwe pa wasubwa+ wa kwa Yehova no kumwipaya?”
15 E lyo Davidi aitile umulumendo wakwe umo no kutila: “Palama. Mukome.” Awe alimukomene na o alifwile.+
16 Na Davidi atile: “Umulopa obe ube pa mutwe obe,+ pantu akanwa kobe kakushinina+ akati, ‘Nine naipeye uwasubwa wa kwa Yehova.’”+
17 E lyo Davidi alooseshe Shauli no mwana wakwe Yonatani+ muli ulu lwimbo lwa bulanda+
18 no kutila abana ba kwa Yuda+ bonse balingile ukusambilila ulu lwimbo lwa bulanda ulwitwa “Ubuta.”+ Moneni! Lwalilembwa mwi buuku lya kwa Yashari:+
19 “We Israele, ukuyemba kobe kwaipaiwa pa mpili shobe.+Yangu ifyo shawa impalume!
20 Mwishimika ici cintu mu Gati;+Mwibilisha mu misebo ya Ashikelone,+Pantu abana banakashi ba baPelishiti kuti basamwa,Pantu abana banakashi ba bashasembululwa kuti ba-anga.+
21 Mwe mpili sha Gilboa,+ peba umume pali imwe, peloka imfula pali imwe, nangu kumenapo ifilimwa fya kupeela umutuulo wa mushilo;+Pantu pali imwe e po inkwela sha mpalume shakoweshiwe,Inkwela ya kwa Shauli, kabili takwali inkwela iyasubilwe amafuta.+
22 Ubuta bwa kwa Yonatani tabwabwelele,+Ukwabula ukusuumya umulopa wa baipaiwa, nangu ukwabula ukupula mu mafuta ya mpalume,No lupanga lwa kwa Shauli talwabwelele ukwabula ukucimfya.+
23 Shauli na Yonatani,+ abatemwikwa kabili abasuma imitima mu bumi bwabo,
Na mu mfwa shabo tabapaatukene.+Bali ba lubilo ukucila bakapumpe,+Bali abakosa ukucila inkalamo.+
24 Mwe bana banakashi ba kwa Israele, lileni Shauli,Uwamufwikile ishakashika ce pamo ne fibekobeko,Uwakobeke ifibekobeko fya golde ku fya kufwala fyenu.+
25 Yangu ifyo shawa impalume mu bulwi!+Yonatani aipaiwa mu mpili shobe!+
26 Ndi no bulanda ubukalamba pali iwe, munyinane Yonatani,Wali umusuma nga nshi kuli ine.+Ukutemwa kobe kwali ukwawamisha kuli ine ukucila ukutemwa kwa banakashi.+
27 Yangu ifyo shawa impalume+Ne fyanso fya bulwi fyaloba!”
