Icasuko ca mu Baibo

 Tulatiina imfwa pantu mulwani wesu kabili tulacitapo na fimo pa kuti tucingilile ubumi bwesu. (1 Abena Korinti 15:26) Na lyo line, ukucilamo ukutiina imfwa pa mulandu ne fya bufi ifyo abantu balanda, filalenga abantu abengi baba ‘abasha ubumi bwabo bonse pa mulandu wa kutiina imfwa.’ (AbaHebere 2:15) Ukwishiba icine pa mfwa kuti kwalenga mwaleka ukutiina sana imfwa ica kuti mwafilwa no kuba ne nsansa.—Yohane 8:32.

Ukwishiba icine pa mfwa

•   Abafwa tabaishiba akantu nangu kamo. (Amalumbo 146:4) Tamulingile ukulatiina ukuti nga mwafwa mwakulakalipwa nelyo mwakulapya mu mulilo, pantu Baibo ilinganya umuntu uufwile ku muntu uulele fye utulo.—Amalumbo 13:3; Yohane 11:11-14.

•   Abafwa te kuti batucite ifyabipa. Na bantu abali abankalwe ilyo bashilafwa tabakwata amaka nga bafwa. Baibo ilanda ukuti “ulupato lwabo, no mufimbila wabo fyaliloba.”—Lukala Milandu 9:6.

•   Umuntu nga afwa tacipilibula ukuti ninshi capwa takabeko na kabili. Lesa akabuusha abafwa.—Yohane 5:28, 29; Imilimo 24:15.

•   Lesa alilaya ukuti kukaba inshita ilyo “imfwa tayakabeko na kabili.” (Ukusokolola 21:4) Baibo ilanda pali iyo nshita ukuti: “Abalungama e bakekala mu calo, kabili bakekalamo umuyayaya,” kabili tabakulatiina imfwa.—Amalumbo 37:29.