Kannzɛ nán Moizi Mmla’n yɛ ɔ sie Klistfuɛ mun’n, sanngɛ i nun Mmla dandan nɲɔn’n, mɔ be yɛle Ɲanmiɛn nin e wiengu klolɛ’n, be bo like nga Zoova kunndɛ kɛ e yo’n, i kpɔlɛ. (Mt 22:37-39) Sran kun kaman lɛ sa kloman Ɲanmiɛn nin sran. Ɔ fata kɛ ɔ suan. ?Wafa sɛ? Like cinnjin kun m’ɔ kwla uka e’n, yɛle Biblu’n nun kannganlɛ cɛn kwlakwla. Kɛ e wun Ɲanmiɛn i nzuɛn fanunfanun mun Ɲanmiɛn Ndɛ’n nun’n, e wun kɛ “ɔ yo nyɛnmɛn.” (Ju 27:4) Ɔ maan e klo Ɲanmiɛn kpa ekun yɛ e bu akunndan kunngba ng’ɔ bu’n wie. Kpɛkun e ɲan wunmiɛn e fɛ i mmla’m be su. I wie yɛle kɛ e wiengu klolɛ ti’n e kwla fa e wun man. (Zn 13:34, 35; 1Zn 5:3) Wafa nga e kwla kanngan Biblu’n nun naan w’a yo e fɛ kpa’n, i wun ajalɛ nsan yɛ:

• Maan ɔ yo wɔ kɛ, kɛ sa sɔ’n jú’n, a o lɛ sa. Maan ɔ yo wɔ kɛ a wunnin nun sa. ?Ngue yɛ a wun i-ɔ? ?Ninnge benin mun yɛ a ti be ngan-ɔn? ?Ngue yɛ a ti i nvan-ɔn? ?Sran nga be kan be ndɛ’n, wafa sɛ yɛ be wun yo be-ɔ?

• Fa ajalɛ fanunfanun. Be nun wie mun yɛ: Kɛ á kánngan Biblu’n nun’n, man ɔ nɛn’n su, annzɛ kɛ á tíe nga be kanngannin nun’n, nian Biblu’n nun. Nán se kɛ á kánngan ndɛ tre’m be nun lɔngɔ su. Sanngɛ, kanngan Biblu’n i lika nga be kan sran kun, annzɛ sa kun i ndɛ trele’n i nun. Fluwa Guide d’étude de la Parole de Dieu i akpasua 4 nin 16 be kan Zezi i ndɛ. Fa akpasua sɔ’m be nun kun naan kanngan Zezi i su ndɛ nga Biblu’n kan’n nun. Asa kusu’n, Biblu’n nun ndɛ tre nga i nun yɛ be fali cɛn ba kun nun Biblu’n nun ndɛ mma’n, a kwla kɛnngɛn i wunmuan’n nun. Annzɛ kusu’n, a kwla kanngan Biblu’n nun fluwa’m be nun lɔngɔ su.

• Kɛ á kánngan nun’n, kunndɛ kɛ á wún ndɛ’n i wlɛ. Sɛ cɛn kwlaa a kanngan ndɛ tre kun nun naan a bu i su akunndan’n, ɔ ti kpa lele tra kɛ a kanngan ndɛ tre kaka nun guɛ i lɛ ngbɛn’n. Bu blɛ nga sa sɔ’n juli’n i akunndan, fa ɔ ɲin sie i nun ndɛ tɛkɛtɛkɛ’m be su. Nian klɔ’m be desɛn mun nin Biblu’n nun ndɛ mma uflɛ nga be klɛli be ndɛ tre sɔ’n nun’n, be nun. I nun ndɛ nga a wunman be wlɛ’n, kunndɛ be nun kun i su like. Kɛ á kánngan Biblu’n nun’n, blɛ kunngba nga a di’n, a kwla fa blɛ kunngba sɔ’n bu i su akunndan.