Pahimulosi an Kinabuhi han Pamilya

Magmamalipayon gud ba an mga pamilya?

Paonan-o ito posible?

 May kilala ka ba nga mga pamilya nga nagkakaurosa ngan malipayon sugad hadton nakikita dinhi hini nga pulyeto? An mga pamilya ha bisan diin nagbuburublag. An diborsyo, kakulang hin kasigurohan ha trabaho, mga problema han solo-nga-ginikanan, kapakyasan—ini ngatanan naamot ngada ha kakurian. Usa ka eksperto ha kinabuhi han pamilya an nasubo: “Yana, maaram an ngatanan han mga panagna han kapukan han pamilya.”

Kay ano nga an mga pamilya yana nga adlaw inaatake han sugad seryoso nga mga problema? Paonan-o kita magpapahimulos han kinabuhi han pamilya?

Kon Paonan-o Nagtikang an Pamilya

Basi mabaton ini nga mga pakiana, kinahanglan hibaroan naton an tinikangan han pag-asawa ngan han pamilya. Kay kon mayada ini Tinikangan—usa nga Maglalarang—an mga membro han pamilya sadang magtan-aw ha iya para han giya, tungod kay sigurado nga maaram gud hiya kon paonan-o kita magpapahimulos hin bug-os han kinabuhi han pamilya.

Kondi, damu an natoo nga an kahikayan han pamilya waray Tinikangan. An The Encyclopedia Americana nasiring: “An iba nga mga eskolar nahihilig ha pagsulsog han tinikangan han pag-asawa ngada ha mga kahikayan han pagpadis-padis han mga hayop nga ubos han tawo.” Kondi, hi Jesu-Kristo nagyakan mahitungod han paglarang han lalaki ngan babaye. Iya ginkotar sugad nga awtoridad an siyahan nga  rekord han Biblia ngan nagsiring: “Kon ano an gintig-ob han Dios diri pagbulagon han tawo.”—Mateo 19:4-6.

Salit husto hi Jesu-Kristo. An intelihente nga Dios naglarang han siyahan nga mga tawo ngan naghikay para han malipayon nga kinabuhi han pamilya. Gintampo han Dios an siyahan nga magpadis ha pag-asawa ngan nagsiring nga an lalaki “kinahanglan tumampo ha iya asawa ngan hira magigin usa nga unod.” (Genesis 2:22-24) Salit, posible ba nga an hinungdan han mga problema han pamilya yana nga adlaw, amo an pamiling han mga estilo-han-kinabuhi nga nagtatalapas han mga suruklan nga iginbutang han Maglalarang ha iya Pulong, an Biblia?

Ano an Dalan ha Kalamposan?

Sugad han iyo hinbabaroan, an moderno nga kalibotan nag-aaghat han  interes-ha-kalugaringon ngan pagtagbaw-ha-kalugaringon. “Mahimsog an kahakog,” siring han usa nga kapitalista ha magtatapos nga klase ha kolehiyo ha Estados Unidos.” “Mahimo kamo magin hakog ngan umabat pa gihapon hin maopay han iyo kalugaringon.” Kondi an pamiling hin materyal nga mga panag-iya diri nagtutugway ha kalamposan. An materyalismo, ha pagkamatuod, usa han gidadakui nga mga tarhog ha kinabuhi han pamilya tungod kay nakakaulang ito han tawhanon nga mga relasyon ngan nag-uubos han panahon ngan salapi han mga tawo. Ha kabaliktaran, tagda kon paonan-o an duha la nga proberbios han Biblia nabulig ha aton nga makita kon ano an importante ha kalipayan.

“Maoroopay an pagkaon hin mga utan upod han mga tawo nga imo hinigugma kay han pagkaon hin pinakamaopay nga karne nga aada an kapungot.”

“Maoroopay an pagkaon hin mamara nga tinapay nga may kalinaw kay han usa nga bangkete ha balay nga puno hin kasamok.”

Proberbios 15:17; 17:1, “Today’s English Version.”

Gamhanan ito, diri ba? Hunahunaa la kon mationan-o nga kaiba an kalibotan kon an tagsa nga pamilya magsusunod hini nga mga butang! An Biblia naghahatag liwat hin birilhon nga giya kon paonan-o sadang tratuhon han mga membro han pamilya an usa kag usa. Tagda an pipira han mga sugo nga iginhahatag hito.

Mga Bana: ‘Higugmaon niyo an iyo asawa sugad ha iyo kalugaringon nga lawas.’—Efeso 5:28-30.

Simple, kondi praktikal hinduro! An Biblia nagsusugo liwat ha usa ka bana nga ‘maghatag hin dungog ha iya asawa.’ (1 Pedro 3:7) Bubuhaton niya ini pinaagi han paghatag ha iya hin espisyal nga atensyon, upod na an kahumok, pagsabot, ngan pagpasarig. Iya liwat pinabibilhan an iya mga opinyon ngan namamati ha iya. (Itanding an Genesis 21:12.) Diri ka ba nauyon nga an bisan ano nga pamilya makarawat hin kapulsanan kon tinatrato han bana an iya asawa nga may pagtagad, sugad la han iya karuyag nga tratuhon hiya?—Mateo 7:12.

 Mga Asawa: “Magkaada hilarom nga pagtahod ha [iyo] bana.”—Efeso 5:33.

An asawa naamot ha kalipayan han pamilya pinaagi han pagbulig ha iya bana ha pagtuman han iya mabug-at nga mga responsabilidad. Ini an gintuyo, tungod kay an Dios nagtagana hin usa nga asawa basi magin “kabulig niya, kabug-osan niya.” (Genesis 2:18) Maaapresyar mo ba an bendisyon ngada ha kinabuhi han pamilya kon ipinapakita han asawa ha iya bana an pagtahod pinaagi han pagsuporta ha iya mga desisyon ngan pagkooperar ha iya basi madangat an mga tumong han pamilya?

Mga Mag-asawa: “An mga bana ngan mga asawa kinahanglan magin matinumanon ha usa kag usa.”—Hebreo 13:4, TEV.

Kon matinumanon hira, an kinabuhi han pamilya sigurado nga makarawat hin mga kapulsanan. An pag-adulteryo agsob nga nagbubungkag han usa nga pamilya. (Proberbios 6:27-29, 32) Maaramon, kon sugad, an Biblia nagsasagda: “Magmalipayon ha imo asawa ngan malipay ha babaye nga imo pinakasalan . . . Kay ano nga ihatag mo an imo gugma ha iba nga babaye?”—Proberbios 5:18-20, TEV.

Mga Ginikanan: “Pahiaraa [an iyo kabataan] ha dalan nga [ira] paglalaktan.”—Proberbios 22:6.

Kon an mga ginikanan nahatag hin panahon ngan atensyon ha kabataan, an kinabuhi han pamilya sigurado nga mag-uuswag. Salit, an Biblia nagsasagda ha mga ginikanan nga tutdoan an ira kabataan han husto nga mga prinsipyo ‘kon hira nalingkod ha ira balay ngan kon hira naglalakat ha dalan ngan kon hira nahigda ngan kon hira nabuhat.’ (Deuteronomio 11:19) An Biblia nasiring liwat nga sadang ipakita han mga ginikanan nga nahigugma hira ha ira kabataan pinaagi han pagdisiplina ha ira.—Efeso 6:4.

Kabataan: “Kabataan, magtuman kamo ha iyo mga ginikanan ha Ginoo.”—Efeso 6:1.

Totoo, hinin maraot nga kalibotan, diri masayon pirme an pagsunod ha iyo mga ginikanan. Kondi, diri ba kamo nauyon nga maaramon an pagbuhat han ginsisiring ha aton han Tinikangan han pamilya? Maaram hiya han gimaopayi ha paghimo han kinabuhi han aton pamilya nga labaw nga malipayon. Salit pangalimbasog gud ha pagsunod ha iyo mga ginikanan. Magmarig-on ha paglikay han damu nga mga pagsulay han kalibotan ha pagbuhat han maraot.—Proberbios 1:10-19.

 Kon bubuhaton han tagsa nga membro han pamilya an sagdon han Biblia, an kinabuhi han pamilya makarawat hin mga kapulsanan. Diri la kay magpapahimulos an pamilya hin maoroopay nga kinabuhi yana kondi magkakaada han paglaom han usa ka urusahon nga kabubuwason ha bag-o nga kalibotan nga iginsaad han Dios. (2 Pedro 3:13; Pahayag 21:3, 4) Salit himoa niyo nga batasan han pamilya an pag-aram ha Biblia nga tarampo! Minilyon nga mga pamilya ha bug-os nga tuna an nakaagi nga an giya nga iginhatag dida ha libro nga An Sekreto han Kalipayan ha Pamilya totoo nga mapulsanon.

Kon waray iba nga ipinakita, an ngatanan nga kotasyon han Biblia tikang ha New World Translation of the Holy Scriptures.