• NATAWO: 1974

• NATAWHAN NGA NASUD: CHILE

• PAGKINABUHI HADTO: PARAHUBOG

NAGLABAY:

Natawo ako ha syudad han Angol, ha makaruruyag nga sur han Chile. Waray ako igkita han akon tatay. Han tres anyos ako, gindara kami han akon manghod ni Nanay ha Santiago, an kapital nga syudad. Didto nag-ukoy kami ha gutiay nga kwarto ha temporaryo nga urukyan para ha eskwater. Waray kami kalugaringon nga kasilyas, ngan an amon tubig tikang ha fire hydrant.

Paglabay hin mga duha ka tuig, gintagan kami han gobyerno hin gutiay nga balay. Pero makasurubo nga ha amon lugar damu an adik, parahubog, kriminal, ngan hostes.

Usa ka adlaw may nakilala nga lalaki hi Nanay ngan ha urhi nagpakasal hira. Parahubog an akon pinakaamay. Ginkakastigo niya kami ni Nanay. Agsob ako magtangis ha tago, naghihingyap nga may tatay unta ako nga magpapanalipod ha akon.

Bisan kon maduruto hi Nanay, pobre la gihap kami hinduro. Usahay kon nagugutom kami, gatas ngan asukar la an amon ginkakaon. Ngan basi maliaw, nahiling kami ha bintana han amon amyaw basi magkita hin TV. Kondi nadakpan kami han tag-iya, ngan waray na kami pakitaa.

Kon diri hubog an akon pinakaamay, nga talagsa la mahitabo, ginpapalitan niya kami nga magbugto hin pagkaon. Ngan usa ka adlaw, ginpalitan niya kami hin gutiay nga TV. Usa ito han pipira la nga higayon nga nagin malipayon ako.

Han 12 anyos ako, nahibaro ako pagbasa. Paglabay hin usa ka tuig, inundang ako pag-eskwela ngan nagtrabaho. Katapos han trabaho, nagkakalakat kami han akon mga katrabaho basi mag-irignom ngan magdroga. Ngan nagiyan ako hito.

Han 20 anyos ako, nakilala ko hi Cati, ngan nagpakasal kami. Ha tinikangan maopay an amon pag-upod, pero binalik ako ha akon bisyo, ngan mas nagtikaraot pa gud. Nahunahuna ko nga kon diri ha prisohan, ha sementeryo an akon lalandingan. Mas maraot pa gud, miserable liwat nga kinabuhi an akon iginhahatag kan Víctor, an akon anak. Nasubo ako, nasina ha akon kalugaringon. Para ha akon, waray ako pulos.

 Han 2001, duha nga Saksi ni Jehova an binisita ha amon, ngan nag-aram hi Cati han Biblia ha ira. Iya ako ginsusumatan han iya hinbabaroan. Tungod kay karuyag ko la mag-usyuso, nag-aram liwat ako. Han 2003, nabawtismohan hi Cati sugad nga Saksi ni Jehova.

KON PAONAN-O NABAG-O HAN BIBLIA AN AKON KINABUHI:

Usa ka adlaw, nabasa ko an Rut 2:12 nga nasiring nga ginbabalosan ni Jehova adton natoo ngan naayop ha iya. Nahunahuna ko nga kon magbag-o ako, mapapalipay ko hiya ngan makarawat hin balos. Nakita ko ha Biblia an damu nga teksto nga nagkukondenar han paghubog. An 2 Korinto 7:1 nakabantad ha akon. Nag-aaghat ito nga “maglinis kita tikang ha ngatanan nga mga hugaw.” Salit hinay-hinay nga ginbayaan ko an akon mga bisyo. Kondi samtang nangangalimbasog ako, mas diri ko mapugngan an akon kalugaringon, pero waray gud umundang hi Cati ha pagbulig ha akon.

Ha urhi, binaya ako ha akon trabaho tungod han impluwensya ha pagsigarilyo ngan paghubog. Bisan kon nagkuri kami ha pinansyal tungod hito, nagkaada ako mas daku nga oras ha pag-aram han Biblia. Dida hito nga takna, nag-uswag ako ha espirituwal. Waray ako obligara ni Cati ha pagtagana hin labaw kay han akon maaakos, waray man liwat niya ako basola ha mga panhitabo. Nagpapasalamat gud ako han iya mahigugmaon nga suporta.

Hinay-hinay nga mas nakig-upod ako ha mga Saksi. Tungod han ira bulig, nasabtan ko nga ginpapabilhan ni Jehova an akon sinsero nga hingyap ha pag-alagad bisan kon waray ako hitaas nga edukasyon. An gugma ngan pagkaurosa han Kristiano nga kongregasyon may daku nga epekto ha amon pamilya. Waray gud namon ito mabilngi ha bisan diin. Salit han Disyembre 2004, nabawtismohan liwat ako.

MGA KAOPAYAN NGA AKON NAPAHIMULSAN:

Napamatud-an ko nga tinuod an siring ni Jehova ha Isaias 48:17: “Ako hi Jehova nga imo Dios, nga nagtututdo ha imo ha pagpahimulos.” An akon nanay ngan bugto diri makatoo han akon pagbag-o, salit yana nag-aaram na hira han Biblia. An amon mga amyaw nalipay liwat han akon pagbag-o, ngan han amon malipayon nga pamilya.

An akon asawa nahigugma ha Dios ngan nagtatagad ha akon sugad nga matataporan nga kaupod ngan sangkay. Bisan kon nagdaku ako nga waray tatay, ha bulig han Biblia nahibaro ako pagpadaku han akon tulo nga anak. Gintatahod nira ako. Labaw ha ngatanan, gintatagad nira hi Jehova sugad nga tinuod nga Persona, ngan nahigugma hira ha iya.

Nagpapasalamat gud ako nga bisan pa han akon miserable nga pagkabata, gintagan ako ni Jehova hin higayon nga magin malipayon.

• NATAWO: 1974

• NATAWHAN NGA NASUD: BULGARIA

• PAGKINABUHI HADTO: PARAGBALIGYA HIN DROGA

NAGLABAY:

Natawo ako ha Sofia, Bulgaria, ha may kaya nga pamilya. Ginbayaan kami ni Tatay han sais anyos ako. Waray namon ito dahoma, ngan nasakitan gud ako hito. Inabat ko nga waray nahigugma ha akon ngan nandidiri an mga tawo ha akon. Samtang nagdadaku ako nagin rebelyoso ako, nagin putong ngan agresibo.

Katorse anyos ako han siyahan ko nga paglayas. Agsob liwat ako mangawat hin kwarta kanda Nanay, Lolo, ngan Lola. Tungod han akon batasan, pirme ako nagkakaproblema ha eskwelahan salit ha sulod hin pipira la ka tuig, lima ka eskwelahan an akon ginburobalhinan. Tulo na la ka tuig antes unta makagradwar, inundang ako pag-eskwela. Nagin imoral ako, makusog magsigarilyo, ngan adik ha marijuana. Makusog liwat ako uminom, pirme ha parti, ngan namamaligya hin droga. An kinabuhi dinhi hinin waray paglaom nga kalibotan nga puno hin pag-antos ngan kamatayon, nakadepres ha akon. Salit gin-enjoy ko na la an kada adlaw nga naabot.

Han 1998, han 24 anyos ako, gin-aresto ako ha airport han São Paulo, Brazil, tungod han ilegal nga pagpasulod hin droga. Ginsentensyahan ako hin upat ka tuig nga kaprisohan.

KON PAONAN-O NABAG-O HAN BIBLIA AN AKON KINABUHI:

Han 2000, usa ka beses kada semana ginbibisita ako han mga Saksi ha akon selda. Usa ha ira an nagtagad gud ha akon, hi Marines. Gin-aghat niya ako nga mahibaro hin dugang mahitungod ha Biblia. Tungod kay diri ako pamilyar ha mga Saksi, namakiana ako ha mga igkasi-priso mahitungod ha ira. Diri ako makatoo nga haros ngatanan maraot an ginyayakan mahitungod ha ira. Usa pa ngani an nagsiring nga umapi na la ako ha bisan ano nga relihiyon, ayaw la ha mga Saksi. Tungod hito mas nagin interesado ako; karuyag ko hibaroan kon kay ano nga ginkakangalasan hira. Nahunahuna ko nga bangin gud man hira an tinuod nga relihiyon. Tutal, an Biblia nasiring nga an mga sinsero nga nangangalimbasog pagsunod kan Jesus pagtitimarauton.—2 Timoteo 3:12.

Hito nga panahon ha administration building han prisohan ako igintoka pagtrabaho. Usa ka adlaw nakabiling ako hin mga kahon ha bodega nga may sulod nga daan nga Watchtower ngan Awake! nga mga magasin. a Gindara ko ito ha akon selda ngan ginbasa. Samtang mas damu an akon hinbabaroan, sugad hin natatagbaw an akon kauhaw ha kamatuoran. Tungod kay may daku nga panahon, gin-inadman ko an Biblia kada adlaw.

Usa ka adlaw, iginpatawag ako ha opisina. Kahuna ko nga papagawson na ako, salit nanhipos  ako, nanarit, ngan dinalagan tipakadto ha opisina. Didto, hinbaroan ko nga ginkasohan na liwat ako hin pagpalsipikar hin mga dokumento. Salit, nadugangan an akon sentensya hin duha ka tuig.

Ha tinikangan, nawad-an ako hin paglaom. Kondi nasantop ko ha urhi nga bendisyon ngay-an adto. Bisan kon damu na an akon hinbaroan ha Biblia, nag-uungara la gihap ako pagbalik ha akon pagkinabuhi hadto pakagawas ko ha prisohan. Daku pa gud nga panahon an akon kinahanglan basi makagbag-o.

Usahay naabat ako nga diri ako makakarawat han Dios. Pero ginpamalandong ko an mga teksto sugad han 1 Korinto 6:9-11 nga nasiring nga may mga Kristiano ha siyahan-siglo nga kawatan, parahubog, ngan tikasan antes mag-alagad kan Jehova. Pero nagbag-o hira ha bulig ni Jehova, ngan nakadasig ito ha akon.

An pipira han akon bisyo, masayon ko la mabayaan. Pananglitan, waray ako makurii pag-undang ha pagdroga. Pero nakurian ako pag-undang ha pagsigarilyo nga inabot pa hin sobra usa ka tuig antes ko nalamposan ito. Usa han nakabulig ha akon amo an kahibaro han maraot nga epekto hito ha kahimsog. Kondi labaw ha ngatanan, nalamposan ko ito tungod han akon padayon nga pag-ampo kan Jehova.

Tikang han bayaan kami ni Tatay, inabat ko nga waray nahigugma ha akon. Kondi samtang nagigin mas duok ako kan Jehova, hinay-hinay nga nalamposan ko ito. An mga pulong han Salmo 27:10 nakabantad gud ha akon. Ito nasiring: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” Nasantop ko nga nabilngan ko na an gimaopayi nga Amay—usa nga diri gud ako babayaan! Yana may katuyoan na an akon kinabuhi. Han Abril 2004, unom ka bulan tikang han makagawas ako ha prisohan, nabawtismohan ako sugad nga Saksi ni Jehova.

MGA KAOPAYAN NGA AKON NAPAHIMULSAN:

Yana, malipayon na ako. Waray na bisyo, salit mas mahimsog na ha pisikal ngan emosyonal kay han batan-on pa ako. May-ada ako malipayon nga pag-asawa ngan duok nga relasyon ha akon langitnon nga Amay, hi Jehova. Ngan ha mga nagsisingba ha iya, nakabiling ako hin damu nga tatay, nanay, ngan kabugtoan. (Markos 10:29, 30) Nagpapasalamat gud ako nga may maopay nga nakita hira ha akon, bisan antes ko pa ito hikit-an.

Usahay nakukonsensya la gihap ako tungod han akon naglabay. Kondi an saad han Dios nga bag-o nga kalibotan diin an magraot nga eksperyensya “diri na hinunumdoman,” nakakaliaw ha akon. (Isaias 65:17) Samtang yana, an akon naglabay nakakabulig nga magin mapinairon ako ha may pariho nga kahimtang. Hito nga bahin, bentaha gud ito. Pananglitan kon nagsasangyaw, diri ako nakukurian pakiistorya ha mga adik, parahubog, o kriminal. Sigurado ako nga kon nakagbag-o ako basi mapalipay hi Jehova, mahihimo liwat ito han iba!