Mauricio: Nalilipay ako nga makita ka utro, Alejandro.

Alejandro: Ako man.

Mauricio: Ginhinunahuna ko an imo ginsiring han naglabay naton nga pag-istorya.

Alejandro: Mahitungod han ano?

Mauricio: Mahitungod han imo siring nga nahipausa ka nga an mga Saksi ni Jehova diri natoo ha naglalaga nga impyerno.

Alejandro: Aw, oo. Ha tinuod la, diri gud ako makatoo nga diri kamo natoo ha impyerno.

Mauricio: Gin-aapresyar ko an imo pagin prangka. Interesado ako hibaroan an panhunahuna han iba tungod kay damu man gud an opinyon mahitungod han impyerno. Ikaw, ano an imo gintotoohan mahitungod hito?

Alejandro: Aw, natoo ako nga an magraot nga tawo mahingangadto ha impyerno ha ira kamatay ngan didto, papasakitan hira tubtob ha waray kataposan.

Mauricio: Ito an gintotoohan han kadam-an. Anay daw Alejandro, nakaeksperyensya ka na ba hin maraot nga panhitabo?

Alejandro: Oo. Ginpatay an akon magurang lima ka tuig na an naglabay.

Mauricio: Nasusubo ako nga hibatian ito. Sigurado nga nahihidlaw ka ha iya.

Alejandro: Oo. Nahuhunahuna ko hiya kada adlaw.

Mauricio: Maaram ako nga may mga natoo ha impyerno tungod han ginbuhat ha ira han magraot nga tawo. Sabagay, natural la nga maruyag hira masirotan an mga magraot tungod han ginbuhat hito ha ira.

Alejandro: Husto! Karuyag ko gud masirotan an nagpatay han akon magurang.

Mauricio: Normal ito nga pag-abat. Nasiring an Biblia nga bisan an Dios nasisina gihap kon an mag-opay nga tawo nagigin biktima han maraot nga buhat, ngan nagsaad hiya ha pagsirot ha magraot. Tigamni an ginsisiring dinhi ha Isaias 3:11: “Kairo han maraot! Magmamapait para ha iya; kay kon ano an nabuhat han iya mga kamot pagbubuhaton ha iya.” Salit  makakasiguro kita nga sisirotan gud han Dios an magraot.

Alejandro: Pero paonan-o niya ito bubuhaton kon waray impyerno, sugad han imo siring?

Mauricio: Maopay ito nga pakiana. Aw, sisirotan han Dios an magraot pinaagi hin waray kataposan nga kabungkagan. Tagda an siring han 2 Tesalonika 1:9. Alayon basaha.

Alejandro: Sige. Nasiring: “Nga mag-aantos hin sirot, nga amo an pagkabungkag nga waray kataposan nga nabulag ha bayhon han Ginoo.”

Mauricio: Sumala dida, waray na paglaom an magraot kay sisirotan hira han Dios hin kamatayon tubtob ha kadayonan.

Alejandro: Nasasabtan ko an teksto, pero baga man hin waray hustisya ito. Kita ngatanan namamatay. Diri ba mas makatadunganon kon mas mabug-at an sirot ha mga magraot?

Mauricio: Daku gud an imo pagtagad ha hustisya.

Alejandro: Oo, daku gud.

Mauricio: Maopay ito. Ha pagkamatuod, an tawo may kahibaro ha kon ano an husto ngan sayop tungod kay ginlarang kita han Dios nga may-ada hito. Hiya man nagpapabili ha hustisya. Kondi igintututdo han mga lider han relihiyon nga ginsisirotan niya an mga tawo ha naglalaga nga impyerno, hito nga paagi iginhuhulagway nira hiya nga waray hustisya.

Alejandro: Ano an imo karuyag sidngon?

Mauricio: Tagdon lugod naton an asoy mahitungod kanda Adan ngan Eva. Pamilyar ka ba hito?

Alejandro: Oo. Gindid-an hira han Dios nga kumaon han bunga han usa nga puno, kondi nagtalapas hira.

Mauricio: Husto. Basahon lugod naton an Genesis 2:16, 17, nasiring: “Hi Jehova nga Dios nagsugo han lalaki, nga nasiring: Ha tagsa nga kahoy han tanaman makakahimo ikaw pagkaon hin waray makauulang, kondi han kahoy han kinaadman han kaopayan ngan han karaotan, diri ka makakakaon: kay ha adlaw nga ikaw kumaon hito, ikaw gud mamamatay.” Ano an ginsiring han Dios nga mahitatabo kan Adan kon kumaon hiya han igindidiri nga bunga?

Alejandro: Nagsiring an Dios nga mamamatay hi Adan.

Mauricio: Husto. Tagda ini: Pinaagi han sala, ginpahinabo ni Adan nga an ngatanan nga tawo ig-anak nga salaan. a Pero bisan pa hito, nag-unabi ba an Dios mahitungod ha pagsirot ha mga tawo ha impyerno?

Alejandro: Waray.

Mauricio: Kondi kon namimeligro man ngay-an hira Adan ngan Eva nga pasakitan tubtob ha waray kataposan, diri ba sadang unta hira pahamangnoan han Dios mahitungod hito? Diri ba ito an sadang niya buhaton sugad nga may hustisya ngan mahigugmaon nga Dios?

Alejandro: Aw, oo gad.

Mauricio: Tagda liwat an ginsiring han Dios kanda Adan ngan Eva katapos nira makasala. Alayon pagbasa han Genesis 3:19.

Alejandro: Sige. Nasiring: “Ha balhas han imo bayhon makaon ikaw hin tinapay, ngadto ha paghiuli nimo ha tuna; kay tumikang ka dinhi; kay tapotapo ka man, ngan ha tapotapo ikaw hiuuli.”

Mauricio: Salamat. Sumala dida, mahingangain hi Adan ha iya kamatay?

Alejandro: Siring dinhi, mabalik hiya ha tuna.

Mauricio: Husto. Pero diri ba basi makabalik an usa ngadto ha usa nga lugar, kinahanglan tikang na hiya didto?

Alejandro: Aw, oo.

Mauricio: Ngan nakain man hi Adan antes hiya ginlarang han Dios?

Alejandro: Aw, waray pa hiya mag-eksister.

Mauricio: Tama. Ngan sigurado nga naobserbaran mo nga ha sirot nga iginhatag han Dios kan Adan, waray Hiya mag-unabi hin impyerno. Husto ba nga magsiring an Dios kan Adan nga mabalik hiya ha tuna diin hiya tikang, kon ha pagkatinuod mahingangadto hiya ha impyerno?

Alejandro: Diri, diri gud.

Mauricio: May usa pa nga punto nga mahimo naton tagdon may kalabotan ha katutdoan han impyerno.

Alejandro: Ano ito?

Mauricio: Hin-o an ginsisiring han mga tawo nga “nagdudumara” han impyerno? Hin-o daw an nagsisirot ha mga tawo nga aadto didto?

Alejandro: An Yawa.

Mauricio: Oo. Pero an Yawa an nangunguna nga kaaway han Dios. Kon nagpapadara an Dios hin mga tawo ha impyerno basi pasakitan han Yawa, diri ba ito nagpapakita nga baga hin may pagkunsabo an Dios ngan an Yawa?

Alejandro: Hmm. Waray ko ito mahunahuna hadto.

Mauricio: Ha pag-ilustrar han punto, diri ba usa ka nga amay?

Alejandro: Aw, oo. May anak ako nga kinse anyos.

Mauricio: Hunahunaa nga an imo anak nagin rebelyoso. Damu an iya ginbubuhat nga nakakapasubo ha imo. Ano an imo bubuhaton?

Alejandro: Mangangalimbasog ako nga tadungon hiya.

Mauricio: Sigurado ako nga pauroutro nga bubuligan mo hiya nga magbag-o.

Alejandro: Oo!

Mauricio: Anoman kon diri hiya mamati bisan pa han imo pauroutro nga pagsaway? Posible ba nga abaton mo nga angay hiya sirotan?

Alejandro: Aw, oo.

Mauricio: Kondi anoman kon hibaroan mo nga may maraot nga tawo nga nagsusulsol ha imo anak ngan nagtututdo ha iya ha pagbuhat hin maraot?

Alejandro: Masisina gud ako hito nga tawo!

Mauricio: Hahangyoon mo ba iton maraot nga tawo nga nakaimpluwensya ha imo anak nga hiya na la an magsirot ha imo anak?

Alejandro: Syempre diri! Makatadunganon ba kon buhaton ko ito?

Mauricio: Diri gud makatadunganon nga hangyoon han Dios hi Satanas nga Yawa ha pagsirot ha magraot nga tawo tungod kay ito mismo an nag-iimpluwensya ha mga tawo ha pagin maraot!

Alejandro: Balitaw.

Mauricio: Yana, kon karuyag han Dios sirotan an magraot, kay ano nga an Yawa nga amo an iya nangunguna nga kaaway, an magtutuman han iya karuyag ngan magpapasakit ha magraot?

Alejandro: Waray ko gud man ito mahunahuna hadto!

Mauricio: Makakasarig kita nga magios gud an Dios kontra ha magraot. Basi mas magin matin-aw ini, alayon basaha an Salmo 37:9.

Alejandro: Sige. Nasiring: “Paglalaglagon an mga magburuhat hin maraot; kondi an mga nahulat kan Jehova, makakapanunod hira han tuna.”

Mauricio: Salamat. Sumala han imo ginbasa, ano an pagbubuhaton ni Jehova ha mga magburuhat hin maraot?

Alejandro: Aw, iya paglalaglagon hira.

Mauricio: Husto. Karuyag sidngon, pupoohon hira han Dios ha kadayonan. Kondi an mag-opay nga mga tawo—“an mga nahulat kan Jehova”—magpapahimulos han tuna ha kadayonan. Pero bangin ka magpakiana: Kay ano nga diri ginpupugngan han Dios an mga tawo ha pagbuhat hin maraot? Ngan kon karuyag gud man niya sirotan an magraot nga mga tawo, kay ano nga waray pa man niya ito buhata?

Alejandro: Oo gud man ano!

Mauricio: Karuyag ko unta ipakita ha imo an baton han Biblia hito nga mga pakiana ha akon pagbalik. b

Alejandro: Sige, maghuhulat ako ha imo.