Pakadto ha sulod

Pakadto ha mga sulod

 AN BIBLIA NAKAKAGBAG-O HAN KINABUHI

Diri Ko Karuyag Mamatay!

Diri Ko Karuyag Mamatay!
  • NATAWHAN NGA TUIG: 1964

  • NATAWHAN NGA NASUD: INGLATERA

  • PAGKINABUHI HADTO: REBELYOSO NGA TIN-EDYER NGA NANAY

AN AKON NAGLABAY

Ako, an akon nanay, ngan tulo nga magurang nga babaye naukoy ha Paddington, usa nga matawo nga lugar ha Londres, Inglatera, diin ako igin-anak. Parahubog hi Tatay, salit waray hiya pirme ha balay.

Han bata pa ako, gintutdoan ako ni Nanay nga mag-ampo kada gab-i. May gutiay ako nga Biblia nga Mga Salmo la an sulod, ngan ginhihimoan ko ito hin tono basi makanta ko ito. Makausa, may nabasa ako ha usa nga libro nga waray ko hingalimti: “Maabot an panahon, diri na magkakaada sunod nga adlaw.” Tungod hito, diri ako nahingangaturog kada gab-i ha paghinunahuna mahitungod ha tidaraon. ‘Sigurado nga may rason kon kay ano nga nabubuhi kita.’ ‘Ano an katuyoan han akon kinabuhi?’ Diri ko karuyag mamatay!

Nagin interesado gud ako ha okultismo. Nakig-istorya ako ha mga patay, nagbisita ha mga sementeryo kaupod han akon mga kaeskwela, ngan nagkita hin magpakaharadlok nga pasalida. Para ha amon, eksayting gud adto ngan makaharadlok.

Nagin rebelyoso ako han dyes anyos pa la ako. Nagtikang ako magtabako, ngan nagin adik hito. Waray pag-iha, nag-marijuana ako. Han 11 anyos ako, nagtikang ako pag-inom. Bisan kon diri ko karuyag an rasa han irimnon, karuyag ko an epekto han kahubog. Mahilig liwat ako ha musika ngan sumayaw. Naeskapo ako ha gab-i basi makakadto ha mga parti ngan mga nightclub, ngan nauli ako antes sumidlit an adlaw. Tungod kay kapoy, pirme ako diri nakakasulod ha eskwelahan kinabuwasan. Kon naeskwela ako, agsob ako mag-ininom durante han bakante nga mga oras.

Han ultimo nga tuig han akon pag-eskwela, hamubo hinduro an akon mga grado. Diri maaram hi Nanay han akon maraot nga mga buhat, salit han nahibaro hiya hito, nasubo ngan nasina hiya. Nag-away kami, ngan lumayas ako ha balay. Nakilungon anay ako ha akon uyab nga hi Tony, nga usa nga Rastafarian. Nahidadabi hiya ha mga krimen, nagbabaligya hin droga, ngan kilala nga bayolente hinduro. Waray pag-iha nagburod ako, ngan igin-anak ko an amon anak nga lalaki han 16 anyos la ako.

 KON PAONAN-O NABAG-O HAN BIBLIA AN AKON KINABUHI

Siyahan nga nakilala ko an mga Saksi ni Jehova han nag-ukoy ako ha usa nga urukyan para ha solo nga mga nanay ngan han ira minasus-an. Gintagan ako didto hin kwarto han gobyerno. Duha nga babaye nga Saksi an pirme nabisita ha pipira nga batan-on nga nanay. Usa ka adlaw, umupod ako han ira pag-aram. Karuyag ko pamatud-an nga sayop an mga Saksi. Kondi kalmado ngan klaro nga ira ginbaton an akon damu nga pakiana gamit an Biblia. Buotan gud hira ngan makonsiderasyon, ngan naruyagan ko gud hira. Salit ginkarawat ko an ira tanyag nga pag-aram ha Biblia.

Waray pag-iha, may hinbaroan ako tikang ha Biblia nga nakagbag-o han akon kinabuhi. Tikang pa han akon kabata, nahahadlok ako nga mamatay. Pero yana hinbaroan ko an katutdoan ni Jesus mahitungod ha pagkabanhaw! (Juan 5:28, 29) Hinbaroan ko liwat nga napaid gud ha akon an Dios. (1 Pedro 5:7) Nabantad gud ako han Jeremias 29:11, nga nasiring: “Kay maaram ako han mga hunahuna nga akon ginhuhunahuna para ha iyo, nasiring hi Jehova, mga hunahuna ha kamurayawan, ngan diri ha karautan, ha paghatag ha iyo hin paglaum ha iyo orhi nga katapusan.” Nagtikang ako tumoo nga mahimo ako magkaada paglaom nga mabuhi ha waray kataposan ha Paraiso ha tuna.—Salmos 37:29.

Iginpaabat ha akon han mga Saksi ni Jehova an tinuod nga gugma. Han siyahan ko nga pagtambong ha ira katirok, nakita ko nga buotan ngan makisangkayon gud hira! (Juan 13:34, 35) Iba gud ito ha pagtratar ha akon han singbahan nga akon ginkakadtoan. Ginkarawat ako han mga Saksi bisan pa han akon kahimtang. Gintagan nira ako hin panahon, pagtagad, atensyon, ngan praktikal nga bulig. Inabat ko nga bahin ako hin usa nga daku ngan mahigugmaon nga pamilya.

Ha akon pag-aram ha Biblia, nakita ko nga kinahanglan ko maghimo hin mga pagbag-o basi maabot an hitaas nga suruklan han Dios ha moral. Nakurian ako pag-undang ha pagtabako. Nasantop ko liwat nga may mga musika nga nagpupukaw han akon hingyap nga mag-marijuana, salit ginsaliwnan ko an musika nga akon ginpapamatian. Waray na gihap ako kumadto ha mga parti ngan nightclub basi diri ako masulay nga maghubog. Ngan nakigsangkay ako ha mga may positibo nga impluwensya ha akon bag-o nga estilo han pagkinabuhi.—Proberbios 13:20.

Hito nga panahon, nag-aaram liwat han Biblia hi Tony kaupod han mga Saksi ni Jehova. Han nabaton han mga Saksi an iya mga pakiana gamit an Biblia, nakombinse liwat hiya nga kamatuoran an iya nahibabaroan. Naghimo hiya hin dagku nga mga pagbag-o: waray na hiya makig-upod ha iya bayolente nga kasangkayan, waray na magbuhat hin krimen, ngan umundang na ha pag-marijuana. Basi bug-os nga mapalipay hi Jehova, nasantop liwat namon nga kinahanglan namon bag-uhon an amon imoral nga pagkinabuhi ngan himoon nga marig-on an amon pamilya para ha amon anak. Han 1982, nagpakasal kami.

“Diri na ako naghihinunahuna o nababaraka kada gab-i mahitungod ha tidaraon o ha kamatayon”

Nagsaliksik ako ha An Barantayan ngan Pagpamata! * hin mga artikulo mahitungod ha mga tawo nga naglampos ha paghimo hin mga pagbag-o nga karuyag ko himoon. Naparig-on gud ako han ira ehemplo nga padayon nga mangalimbasog ngan diri umundang! Pirme ako nag-aampo kan Jehova nga diri hiya umundang ha pagbulig ha akon. Han Hulyo 1982, nabawtismohan kami ni Tony sugad nga mga Saksi ni Jehova.

MGA KAOPAYAN NGA AKON NAPAHIMULSAN

An pakigsangkay kan Jehova nga Dios nakatalwas han akon kinabuhi. Naeksperyensyahan liwat namon ni Tony an bulig ni Jehova ha makuri nga mga kahimtang. Nahibaro kami pagsarig ha iya durante han amon mga kakurian, ngan pirme gud niya ginbubuligan ngan ginpaparig-on an amon pamilya.—Salmos 55:22.

Nalipay gud ako ha pagbulig ha amon mga anak nga makilala hi Jehova. Yana naaabat ko an pariho nga kalipay samtang nakikita ko an ira mga anak nga nagtitikahilarom liwat an kahibaro ha Dios.

Diri na ako naghihinunahuna o nababaraka kada gab-i mahitungod ha tidaraon o ha kamatayon. Kada semana, okupado kami ni Tony ha pagbisita ha mga kongregasyon han mga Saksi ni Jehova basi parig-unon an mga kabugtoan didto. Kaupod nira, nagtututdo kami ha iba nga magkaada pagtoo kan Jesus basi makakarawat liwat han kinabuhi nga dayon.

^ par. 17 Iginpupublikar liwat han mga Saksi ni Jehova.