An Biblia diri ordinaryo nga libro. Mababasa dida hito an mga sagdon han aton Maglalarang. (2 Timoteo 3:16) An mensahe hito mahimo makaimpluwensya gud ha aton. Ha pagkamatuod, an Biblia nasiring: “An pulong han Dios buhi ngan gamhanan.” (Hebreo 4:12) May-ada ito gahum ha pagpauswag han aton kinabuhi ha duha nga importante nga paagi—naghahatag ito hin giya para han aton adlaw-adlaw nga pagkinabuhi yana ngan nabulig ito ha aton nga mahibaro mahitungod ha Dios ngan han iya mga saad.—1 Timoteo 4:8; Santiago 4:8.

Nagpapauswag han imo kinabuhi yana. An Biblia makakabulig ha imo. Naghahatag ito hin praktikal nga mga sagdon may kalabotan ha:

•   Relasyon ha iba.—Efeso 4:31, 32; 5:22, 25, 28, 33.

• Emosyonal ngan pisikal nga kahimsog.—Salmos 37:8; Proberbios 17:22.

• Moralidad.—1 Corinto 6:9, 10.

• Pinansyal.—Proberbios 10:4; 28:19; Efeso 4:28. *

Usa nga mag-asawa ha Asia an mapasalamaton gud ha bili han mga sagdon ha Biblia. Sugad han pipira nga bag-o nga mag-asawa, nakurian hira ha personalidad han kada tagsa ngan ha pagkaada maopay nga komunikasyon. Kondi nagtikang hira pag-aplikar han ira nababasa ha Biblia. Ano an resulta? An bana nga hi Vicent nagsiring: “An akon nabasa ha Biblia nakabulig ha akon nga maatubang an amon mga problema ha mahigugmaon nga paagi. Pinaagi han pag-aplikar han mga prinsipyo ha Biblia, nagin malipayon kami sugad nga mag-asawa.” An iya asawa nga hi Annalou, nagsiring: “An pagbasa hin mga ehemplo ha Biblia nakabulig ha amon. Yana, malipayon ngan kontento ako ha amon pag-asawa ngan ha amon mga tumong.”

Pagkilala ha Dios. Labot la han iya ginsiring mahitungod ha pag-asawa, hi Vicent nagsiring liwat: “Pinaagi ha pagbasa ha Biblia, nagin mas duok gud ako kan Jehova.” An komento ni Vicent nagsusumat hin importante nga punto—an Biblia makakabulig ha imo nga makilala an Dios. Kon bubuhaton mo ito, diri mo la mapapahimulosan an iya sagdon, kondi mahibabaroan mo liwat nga puydi mo ngay-an magin sangkay an Dios. Ngan makikita mo nga iya iginpapahayag an mga detalye mahitungod ha mas maopay nga tidaraon, an panahon diin magkakaada ka “totoo nga kinabuhi” nga magpapadayon ha waray kataposan. (1 Timoteo 6:19) Diri gud ito mababasa ha iba nga libro.

Kon titikangan mo an pagbasa han Biblia ngan ipapadayon ito, makakarawat mo liwat an mga kapulsanan—an pagpauswag han imo kinabuhi yana ngan an pagkilala ha Dios. Kondi, samtang ginbabasa mo an Biblia, posible nga damu an imo maipapakiana. Ngan kon damu an imo pakiana, hinumdumi an maopay nga ehemplo han Etiopiahanon nga opisyal, mga 2,000 ka tuig na an naglabay. Damu an iya pakiana. Kondi, han ginpakianhan hiya kon nasasabtan ba niya an iya ginbabasa, hiya nagsiring: “Paonan-o ko ini masasabtan kon waray magtututdo ha akon?” * Katapos, iya ginkarawat an bulig tikang ha kwalipikado nga magturutdo ha Biblia nga hi Felipe nga usa han mga disipulo ni Jesus. (Buhat 8:30, 31, 34) Kon karuyag mo liwat mahibaro hin dugang mahitungod han Biblia, gin-aaghat ka namon nga magpasa hin request online ha www.jw.org/war o magsurat ha pinakahirani nga adres nga makikita dinhi hini nga magasin. Puydi ka liwat makiistorya ha mga Saksi ni Jehova o kumadto ha Kingdom Hall ha iyo lugar. Kay ano nga diri basahon an Biblia yana ngan tugotan ito nga maggiya ha imo ha mas maopay nga kinabuhi?