Pakadto ha sulod

Pakadto ha mga sulod

Kaupod an akon asawa nga hi Tabitha ha pagsangyaw

 AN BIBLIA NAKAKAGBAG-O HAN KINABUHI

Para ha Akon, Waray Dios

Para ha Akon, Waray Dios
  • NATAWHAN NGA TUIG: 1974

  • NATAWHAN NGA NASUD: DEMOKRATIKO NGA REPUBLIKA HAN ALEMANYA

  • PAGKINABUHI HADTO: ATEYISTA

AN AKON NAGLABAY

Natawo ako ha Saxony, ha gintatawag hadto nga Demokratiko nga Republika han Alemanya. Nagtubo ako ha panimalay nga puno hin gugma, ngan gintutdoan ako han akon kag-anak hin mga prinsipyo ha moralidad. Komunista nga estado an Demokratiko nga Republika han Alemanya, salit diri importante an relihiyon ha kadam-an nga tawo ha Saxony. Ngan para ha akon, waray Dios. Duha nga ideolohiya an nakaimpluwensya ha siyahan nga 18 ka tuig han akon kinabuhi, an ateyismo ngan Komunismo.

Kay ano nga naruyagan ko an Komunismo? Kay naruyagan ko an ideya nga waray labaw ha mga tawo. Dugang pa, natoo ako nga an tanan nga propyedad kinahanglan patas nga bahin-bahinon, tungod kay ini an magwawara han sobra nga karikohan ngan sobra nga kapobrehan. Salit nagin aktibo ako ha organisasyon han mga batan-on nga komunista. Han 14 anyos ako, okupado ako ha proyekto ha pagresaykol hin basura nga mga papel. Ginpasalamatan ako han mga opisyales han bungto han Aue ha akon mga pangalimbasog ngan gintagan nira ako hin award. Bisan kon batan-on pa la ako, nakilala ko an pipira nga prominente nga politiko ha amon. Inabat ko nga husto an akon mga tumong ngan maopay an akon kabubuwason.

Katapos tigda nga nagbag-o an akon kinabuhi. Han 1989, ginbungkag an Berlin Wall, pati an alyansa han komunista nga mga nasud han Este Europa. Natigdaan ako ha sunod-sunod nga panhitabo. Waray pag-iha hinbaroan ko nga kalyap an kawaray-hustisya ha amon nasud. Pananglitan, ginmiminos an mga residente nga diri nasuporta ha Komunismo. Kay ano? Diri ba natoo kami nga mga komunista nga waray labaw ha mga tawo? Ilusyon la ba an Komunismo? Nagupong gud ako.

Salit nagbag-o ako hin mga tumong ngan nagpokus ha musika ngan ha pagin pintor. Tungod kay nakahigayon ako makaeskwela ha usa nga music academy ngan may posibilidad makaeskwela ha unibersidad, nag-ambisyon ako magin musikero ngan pintor. Ginkalimtan ko liwat an mga prinsipyo nga akon hinbaroan han bata pa ako. An importante ha akon hito nga takna amo an pagkaada kalipay, upod na an pagkaada damu nga uyab ha usa ka panahon. Bisan pa hito, an musika, art, ngan waray limitasyon nga pagkinabuhi waray nakawara han akon kagupong. Bisan ha akon mga painting, makikita an sobra  nga kahadlok. Ano an mahitatabo ha tidaraon? Ano an katuyoan han kinabuhi?

Han nakita ko an baton han akon mga pakiana, nahipausa gud ako. Usa ka gab-i ha eskwelahan, inapi ako ha mga estudyante nga nag-iiristorya mahitungod ha tidaraon. Hi Mandy * usa han mga estudyante ngan Saksi ni Jehova. Hito nga gab-i, ginsagdonan niya ako: “Andreas, kon karuyag mo mabaton an imo mga pakiana mahitungod ha kinabuhi ngan tidaraon, usisaha hin maopay an Biblia.”

Nagruhaduha ako ngan nagkainteres, pero tungod han akon daku nga interes, nagdesisyon ako nga sundon hiya. Ginpabasa niya ha akon an Daniel kapitulo 2, ngan napausa ako han akon nabasa. Ini nga tagna naghuhulagway hin sunod-sunod nga gahum ha kalibotan—mga gobyerno nga magkakaada daku nga impluwensya tubtob ha aton panahon. Iginpakita liwat niya an iba pa nga mga tagna may kalabotan ha aton tidaraon. Nabilngan ko na gihap an baton ha akon mga pakiana! Pero hin-o an nagsurat hito nga mga tagna, ngan hin-o an husto nga makakagsumat han tidaraon? Posible ba nga may Dios?

KON PAONAN-O AKO NABAG-O HAN BIBLIA

Iginpakilala ako ni Mandy ha mag-asawa nga Saksi nga hira Horst ngan Angelika, ngan ginbuligan nira ako nga mas masabtan an Biblia. Nakita ko dayon nga an mga Saksi ni Jehova la an relihiyon nga pirme nagamit ngan nagpapakilala han ngaran han Dios nga Jehova. (Salmos 83:18; Mateo 6:9) Hinbaroan ko nga nagtatanyag hi Jehova nga Dios hin paglaom nga mabuhi ha waray kataposan ha paraiso nga tuna. An Salmos 37:9 nasiring: “An mga nahulat kan Jehova, makakapanonod hira han tuna.” Naruyagan ko ini nga paglaom kay abrido ini ha tanan nga nangangalimbasog magkinabuhi uyon ha mga suruklan han Dios nga aada ha Biblia.

Kondi nakurian ako magpahiuyon ha mga suruklan han Biblia. Tungod han akon kalamposan sugad nga musikero ngan pintor, nagin hambog ako, salit kinahanglan ko anay mahibaro magpaubos. Dugang pa, nakurian ako pagbaya ha akon imoral nga pagkinabuhi. Mapasalamaton gud ako nga hi Jehova mapailubon, maloloy-on, ngan masinabuton ha nangangalimbasog magkinabuhi uyon ha igintututdo han Biblia!

An Komunismo ngan ateyismo nakaimpluwensya ha siyahan nga 18 ka tuig han akon kinabuhi; kondi padayon ako nga ginbabag-o han Biblia. An akon hinbaroan nakawara han akon kagupong ha tidaraon ngan nakahatag hin katuyoan ha kinabuhi. Han 1993, nabawtismohan ako sugad nga usa han mga Saksi ni Jehova, ngan han 2000, ginkasal kami ni Tabitha, nga usa nga madasigon nga Saksi. Naggagahin kami hin daku nga panahon ha pagbulig ha iba nga mahibaro han Biblia. Damu han amon nakakaistorya an pariho ha akon an gintikangan, usa nga Komunista ngan ateyista. Nagkakaada ako daku nga kalipay kon iginpapakita ko ha ira kon paonan-o makikilala hi Jehova.

MGA KAOPAYAN NGA AKON NAPAHIMULSAN

Han siyahan nga nakig-upod ako ha mga Saksi, nabaraka gud an akon mga kag-anak. Pero tikang hito nga takna, nakita nira an positibo nga epekto han akon pakig-upod ha mga Saksi. Yana nagbabasa na hira han Biblia ngan natambong ha mga katirok han mga Saksi ni Jehova, ngan nalilipay gud ako hito.

Malipayon an amon pag-asawa ni Tabitha tungod kay ginsusunod namon an sagdon han Biblia para ha mga mag-asawa. Pananglitan, an sagdon mahitungod ha pagin maunungon ha padis padayon nga nagpaparig-on han amon pag-asawa.—Hebreo 13:4.

Diri na ako nahahadlok ha kinabuhi ngan nababaraka ha tidaraon. Bahin ako han bug-os-kalibotan nga pamilya han mga igkasi-tumuroo, nga nagpapahimulos hin tinuod nga kamurayawan ngan pagkaurosa. Hini nga pamilya, parapriho an amon pagtratar ha usa kag usa. Ito gud an akon karuyag ngan ginhihingyap ha bug-os ko nga kinabuhi.

^ par. 12 Ginsaliwnan an ngaran.