ITO nga teksto naghuhulagway gud han pagmando han tawo tikang pa ha tinikangan. Ito nga pagmando an hinungdan han kalyap nga pag-antos ngan kasakitan. Ha bug-os nga kasaysayan, an mga tawo nga may maopay nga intensyon nangangalimbasog ha pag-establisar hin mas may hustisya nga sosiedad. Kondi pirme hira napupugngan han kahakog ngan korapsyon. Kay ano? Kay ano nga nagpapadayon an korapsyon? Tungod ito han masunod nga tulo nga maraot nga impluwensya.

An Biblia matin-aw nga nasiring nga kita ‘ngatanan sakop han sala.’ (Roma 3:9) Pariho hin napanunod nga sakit nga diri matatambal, an sala “nag-uukoy” ha sulod naton. Ha yinukot ka tuig na, “nagmamando” an sala ha katawohan sugad hin hadi. An “balaud” hito padayon nga nakakaimpluwensya ha aton. Tungod han makasasala nga tendensya, gin-uuna han damu an ira personal nga interes o an pagkaada materyal nga mga panag-iya o awtoridad bisan pa kon ha pagbuhat hito, madadaot an iba.—Roma 5:21; 7:17, 20, 23, 25.

Ordinaryo na la ha kalibotan an kahakog ngan an pagin makikalugaringon. Ha sugad nga palibot, makuri para ha pipira an pagin iba. Tungod han hakugnon nga ambisyon, nagigin gutom hira ha katungdanan. Duro nga naghihingyap hira hin sobra nga kwarta ngan panag-iya—labaw pa han ginkikinahanglan. Makasurubo nga andam hira manlimbong basi la makab-ot an ira ambisyon. Imbes nga atohan an magraot nga impluwensya, ira ‘ginsusunod an kadam-an ha pagbuhat hin maraot.’—Eksodo 23:2.

Hi Satanas, usa nga rebelyoso nga espiritu, ‘an naglilimbong ha bug-os nga kalibotan.’ (Pahayag 12:9) Nalilipay hiya pagkontrol ha mga tawo. Mahimo niya tuso nga salingabuton an natural nga hingyap hito nga magin mahimyang ha pinansyal, ngan ito an mag-aaghat ha usa nga manlimbong.

Nangangahulogan ba ito nga pariho kita hin robot nga kontrolado ni Satanas ngan obligado ha pagsunod ha iya, anoman an iya karuyag? Mahibabaroan naton an baton ha sunod nga artikulo.