Posible nga nalilipay ka nga makabati hin maopay nga sumat. Ngan may maopay gud nga sumat para ha imo ngan ha imo mga hinigugma.

Ini nga maopay nga sumat aada ha Biblia, usa nga libro nga iginpasurat han Maglalarang han uniberso, hi Jehova nga Dios, damu ka tuig na an naglabay. Hini nga publikasyon, magpupokus kita ha upat nga libro ha Biblia nga nagsusulod hin maopay gud nga sumat para ha aton ngatanan. Iginngaran ito ha kalalakin-an nga gin-gamit han Dios ha pagsurat hito—hira Mateo, Marcos, Lucas, ngan Juan.

Gintatawag han damu inin upat nga asoy sugad nga an upat nga Ebanghelyo. Mababasa dida hito an ebanghelyo, o maopay nga sumat, mahitungod kan Jesus—nga hiya an paagi han Dios ha pagtalwas ngan sugad nga Hadi han langitnon nga Ginhadian han Dios, papahinaboon niya an permanente nga mga bendisyon para ha ngatanan nga nagpapakita hin pagtoo ha iya.—Marcos 10:17, 30; 13:13.

KAY ANO NGA UPAT NGA EBANGHELYO?

Bangin nahunahuna mo kon kay ano nga iginpasurat han Dios inin upat nga asoy mahitungod han kinabuhi ngan katutdoan ni Jesus.

May mga kapulsanan an pagkaada hinin burublag nga asoy han ginsiring ngan ginbuhat ni Jesus. Ha pag-ilustrar, hunahunaa nga may upat nga kalalakin-an nga natindog hirani ha kilala nga magturutdo. An aada ha atubangan han magturutdo usa nga parasukot hin buhis. An aada ha too usa nga doktor. An namamati dida ha wala usa nga parapangisda ngan duok gud nga sangkay han magturutdo. Ngan an ikaupat, nga nakada ha luyo, usa nga paraobserbar nga mas bata kay ha tulo. Hira nga upat tangkod nga kalalakin-an, ngan an kada tagsa may iba-iba nga interes o gintatagan hin atensyon. Kon an tagsa ha ira magsusurat hin asoy han ginsiring ngan ginbuhat han magturutdo, posible nga iton upat nga rekord magsusulod hin iba-iba nga detalye o panhitabo. Pinaagi ha pag-usisa ha upat nga asoy, samtang ginhihinumdom an iba-iba nga panhunahuna o katuyoan han mga parasurat, makukuha naton an kabug-osan han ginsiring ngan ginbuhat han magturutdo. Iginpapakita hini kon paonan-o kita magpapahimulos tikang hinin upat nga burublag nga asoy han kinabuhi han Bantogan nga Magturutdo, hi Jesus.

Ha pagpadayon han ilustrasyon, karuyag han parasukot hin buhis nga makuha an interes han mga  Judio, salit iya ginhan-ay an pipira nga katutdoan o panhitabo ha paagi nga mabubuligan hira. Ginpabug-atan han doktor an pagtambal ha mga may sakit o baldado, salit waray niya iupod an pipira nga iginrekord han parasukot hin buhis o iginsurat niya ito ha iba nga pagkasunod-sunod. Ginpabug-atan liwat han duok nga sangkay an mga pagbati ngan mga kalidad han magturutdo. Samtang an asoy han mas bata nga lalaki mas halipot. Bisan pa hito, husto an asoy han tagsa ha ira. Iginpapakita hini hin maopay kon paonan-o an upat nga asoy han kinabuhi ni Jesus mas magpapahilarom han aton pagsabot mahitungod han iya mga buruhaton, katutdoan, ngan personalidad.

An mga tawo bangin sumiring, ‘an Ebanghelyo ni Mateo’ o ‘Ebanghelyo ni Juan.’ Diri ito sayop, kay an tagsa hini nagsusulod han “maopay nga sumat mahitungod kan Jesu-Kristo.” (Marcos 1:1) Pero ha mas haluag nga kahulogan, uusa la an kabug-osan nga ebanghelyo, o maopay nga sumat, mahitungod kan Jesus—nga mababasa ha upat nga asoy.

Damu nga estudyante han Pulong han Dios an nagtanding ngan nagtig-ob han asoy han mga panhitabo ngan mga impormasyon ha Mateo, Marcos, Lucas, ngan Juan. Han mga 170 C.E., ito an ginpangalimbasogan han taga-Sirya nga parasurat nga hi Tatian. Natoo hiya nga inin upat nga libro husto ngan giniyahan, ngan iya ginhimo an Diatessaron, usa nga gintig-ob nga asoy han kinabuhi ngan ministeryo ni Jesus.

Puropariho hito ini nga libro nga Hi Jesus—An Dalan, an Kamatuoran, an Kinabuhi, pero mas husto ini ngan kompleto. Nagin posible ito kay mas nasasabtan na naton an katumanan han damu han mga tagna ngan ilustrasyon ni Jesus. Tungod hito nga pagsabot, nagin mas matin-aw an iya mga ginsiring ngan ginbuhat, pati an pagkasunod-sunod han mga panhitabo. Nakabulig liwat an mga nadiskobrehan han mga arkeologo basi mas masabtan an espisipiko nga mga detalye ngan an panhunahuna han mga parasurat. Syempre, waray bisan usa nga sadang magin dogmatiko mahitungod ha pagkasunod-sunod han mga panhitabo. Pero ini nga libro nga Hi Jesus—An Dalan, an Kamatuoran, an Kinabuhi nagpipresentar han mga impormasyon ha makatadunganon ngan lohikal nga paagi.

AN DALAN, AN KAMATUORAN, AN KINABUHI

Samtang imo ginbabasa ngan ginpapahimulsan ini nga libro, hinumdumi an nangunguna nga mensahe para ha imo ngan ha imo mga hinigugma. Hinumdumi an ginsiring mismo ni Jesus kan apostol Tomas: “Ako an dalan ngan an kamatuoran ngan an kinabuhi. Waray nakakakadto ha Amay kon diri pinaagi ha akon.”—Juan 14:6.

Ini nga libro nga Hi Jesus—An Dalan, an Kamatuoran, an Kinabuhi mabulig ha imo nga masabtan kon kay ano nga hi Jesus amo gud “an dalan.” Makakadaop la kita kan Jehova nga Dios ha pag-ampo pinaagi ha iya. Dugang pa, hiya an dalan basi mapahiuli kita ha Dios. (Juan 16:23; Roma 5:8) Salit, pinaagi la kan Jesus magkakaada kita maopay nga relasyon ha Dios.

Hi Jesus “an kamatuoran.” Nagyakan ngan hingpit nga nagkinabuhi hiya uyon ha kamatuoran. Iya gintuman an damu nga tagna, nga nagin ‘oo pinaagi ha iya.’ (2 Corinto 1:20; Juan 1:14) An sugad nga mga tagna nabulig ha aton nga makita an iya nangunguna nga papel ha pagtuman ha katuyoan han Dios.—Pahayag 19:10.

Ngan hi Jesu-Kristo “an kinabuhi.” Pinaagi han lukat, an iya paghatag han iya hingpit nga kinabuhi ngan dugo, nagin posible nga makarawat naton “an totoo nga kinabuhi,” nga amo an “kinabuhi nga waray kataposan.” (1 Timoteo 6:12, 19; Efeso 1:7; 1 Juan 1:7) Hiya liwat magigin “an kinabuhi” para ha minilyon nga namatay pero babanhawon nga may paglaom nga mabuhi ha Paraiso nga tuna ha kadayonan.—Juan 5:28, 29.

Kinahanglan naton ngatanan masabtan ngan pabilhan an papel ni Jesus ha katuyoan han Dios. Hinaot malipay ka ha paghibaro hin dugang pa mahitungod kan Jesus—“an dalan ngan an kamatuoran ngan an kinabuhi.”