Haros usa ngan tunga ka tuig na tikang han iginpakilala ni Juan nga Parabaptis hi Jesus sugad nga an Kordero han Dios. Han gintikangan ni Jesus an iya ministeryo, may pipira nga sinsero nga kalalakin-an nga nagin iya mga disipulo, sugad kanda Andres, Simon Pedro, Juan, ngan posible nga hi Santiago (bugto ni Juan), Felipe, ngan Bartolome (nga gintatawag liwat nga Natanael). Ha urhi, damu pa an nagin sumurunod han Kristo.—Juan 1:45-47.

Andam na hi Jesus pagpili han iya mga apostol. Hira an magigin iya duok nga mga kaupod-upod ngan makakakarawat hira hin espesyal nga pagbansay. Pero antes magpili, kinadto hiya ha usa nga bukid, nga bangin hirani ha Dagat han Galilea ngan Capernaum. Nag-inampo hiya ha bug-os nga gab-i, posible nga basi mangaro hin kinaadman ngan bendisyon han Dios. Kinabuwasan, gintawag niya an iya mga disipulo ngan nagpili hin 12 ha ira basi magin iya mga apostol.

Ginpili ni Jesus an unom nga disipulo nga gin-unabi na, pati hi Mateo, nga gintawag ni Jesus didto ha opisina para han buhis. An iba pa, amo hira Judas (nga gintatawag liwat nga Tadeo ngan “anak ni Santiago”), Simon nga Cananeo, Tomas, Santiago nga anak ni Alfeo, ngan Judas Iscariote.—Mateo 10:2-4; Lucas 6:16.

Ini nga 12 nakaupod na ni Jesus ha pagbiyahe, ngan kilala gud niya hira. An pipira ha ira mga paryente niya. An magbugto nga hira Santiago ngan Juan posible gud nga mga patod igsiyapa ni Jesus. Ngan kon husto an ginhuhunahuna han iba nga hi Alfeo bugto ni Jose, an pinakaamay ni Jesus, kon sugad an anak ni Alfeo nga hi apostol Santiago patod ni Jesus.

Syempre, diri makuri kan Jesus an paghinumdom han ngaran han iya mga apostol. Pero mahinunumdoman mo ba hira? An usa nga makakabulig amo an paghinumdom nga duha an Simon, duha an Santiago, ngan duha an Judas. Hi Simon (Pedro) bugto ni Andres, ngan hi Santiago (anak ni Sebedeo) bugto ni Juan. Maopay ini nga paagi basi mahinumdoman an walo nga apostol. An upat pa, amo an parasukot hin buhis nga hi Mateo, an nagruhaduha ha urhi nga hi Tomas, an gintawag ha may ilarom han kahoy nga hi Natanael, ngan an iya sangkay nga hi Felipe.

An onse han mga apostol tikang ha Galilea, an lugar ni Jesus. Hi Natanael taga-Cana. Hira Felipe, Pedro, ngan Andres taga-Betsaida. Hira Pedro ngan Andres ha urhi binalhin ha Capernaum, diin posible naukoy hi Mateo. Hira Santiago ngan Juan naukoy liwat ha Capernaum o hirani didto, ngan may negosyo hira nga pangisda. Baga hin hi Judas Iscariote la, nga ha urhi nagtraydor kan Jesus, an apostol nga taga-Judea.