Katsaringsing hadto. Salit, panahon na para han tinuig nga pagbiyahe han pamilya ni Jose, upod han ira kasangkayan ngan mga paryente, ngadto ha Jerusalem. Didto isiselebrar nira an Paskua, sugad han ginsusugo han Balaud. (Deuteronomio 16:16) Mga 120 ka kilometro an bibiyahion tikang ha Nazaret ngadto ha Jerusalem. Sagipo ngan makalilipay gud ito nga panahon para ha ngatanan. Hi Jesus 12 anyos na, ngan ginpapamulat gud niya ito nga piyesta ngan an pagkadto utro ha templo.

Para kan Jesus ngan ha iya pamilya, an Paskua diri la usa ka adlaw nga piyesta. Kinabuwasan katapos han Paskua, magtitikang an pito ka adlaw nga Piyesta han Tinapay nga Waray Libadura. (Marcos 14:1) Gintatagad ito nga bahin han piyesta han Paskua. An ira pagbiyahe tikang ha Nazaret, an pagpabilin ha Jerusalem, ngan an ira pag-uli naabot hin mga duha ka semana. Pero hini nga tuig, mas nag-iha hira tungod kan Jesus. Tungod ito han problema nga ira hibabaroan pagtipauli nira.

Samtang tipauli hira Jose ngan Maria, kahuna nira nga hi Jesus kaupod han ira mga paryente ngan kasangkayan nga nagbibiyahe tipanorte. Pero, pagpahuway nira han gab-i, waray nira hiya makit-i. Salit ginpamiling nira hiya ha ira mga kaupod, pero waray hiya didto. Nawawara an ira anak! Salit bumalik hira ngadto ha Jerusalem basi pamilngon hiya.

Bug-os nga adlaw hira nga nagpinamiling. Pero tubtob han sunod nga adlaw, waray nira hiya hikit-i. Han ikatulo ka adlaw namiling hira ha templo, nga may damu nga kwarto. Nakita nira hi Jesus nga nalingkod ha butnga han pipira nga Judio nga magturutdo. Namamati hiya ha ira ngan nagpapakiana. Nahipapausa gud an mga magturutdo ha kahilarom han iya pagsabot.

Hi Maria nagsiring: “Anak, kay ano nga ginbuhat mo ini ha amon? Nabaraka gud kami ni imo tatay ngan nagpinamiling kami ha imo.”—Lucas 2:48.

Nahipausa hi Jesus nga diri hira maaram kon hain hiya. Binaton hiya: “Kay ano nga iyo ako ginbiniling? Diri ba kamo maaram nga kinahanglan aanhi ako ha balay han akon Amay?”—Lucas 2:49.

Yana nga nagkirigta na hira, inuli hi Jesus ha Nazaret kaupod nira Jose ngan Maria ngan padayon nga nagpasakop ha ira. Padayon nga nagtubo hi Jesus ngan nag-uswag an kinaadman. Bisan kon bata pa hiya, nalipay ha iya an Dios ngan an mga tawo. Oo tikang ha kabata ni Jesus, nagpakita hiya hin maopay nga susbaranan, diri la pinaagi ha pag-una han espirituwal nga mga buruhaton kondi pati ha pagrespeto ha iya mga kag-anak.