Hebreo 7:1-28
7 Hi Melkisedek, nga hadi han Salem ngan saserdote han Gihitaasi nga Dios, tinapo ngan nagbendisyon kan Abraham han pagbalik tikang ha pamatay han kahadian,
2 ngan hi Melkisedek gintagan* ni Abraham hin ikanapulo han ngatanan nga gindag-an. Siyahan, an iya ngaran nangangahulogan hin “Hadi han Katadongan,” ngan hiya liwat an hadi han Salem, karuyag sidngon, “Hadi han Kamurayawan.”
3 Waray maaram kon hin-o an iya amay ngan iroy, waray rekord han iya katulinan ngan kon kakan-o hiya natawo ngan namatay, pero tungod kay ginhimo hiya nga pariho han Anak han Dios, nagpapabilin hiya nga saserdote ha waray kataposan.
4 Salit iyo nakikita kon mationan-o kaimportante ini nga tawo nga gintagan han patriarka* nga hi Abraham hin ikanapulo han pinakamaopay han mga gindag-an.
5 Oo, uyon ha Balaud, an mga anak nga lalaki ni Levi nga ginpili sugad nga mga saserdote ginsugo nga mangulekta hin ikanapulo tikang ha mga tawo, karuyag sidngon, tikang ha ira kabugtoan, bisan kon katulinan* hira ni Abraham.
6 Pero ini nga tawo nga diri tikang ha ira katulinan kinarawat hin ikanapulo tikang kan Abraham ngan nagbendisyon ha iya nga nakakarawat hin mga saad.
7 Yana diri gud maninigaran nga an usa nga nagbendisyon mas labaw kay han ginbendisyonan.
8 An mga Levita kinarawat hin ikanapulo ngan mga tawo hira nga namamatay, pero an lain nga tawo nga kinarawat hin ikanapulo, ginpapamatud-an han Kasuratan nga buhi hiya.
9 Masisiring liwat nga bisan hi Levi, nga nakarawat hin ikanapulo, nagbayad hin ikanapulo pinaagi kan Abraham,
10 kay nakada pa hiya ha mga pig-i* han iya kaapoy-apoyan han gintapo hiya ni Melkisedek.
11 Salit kon posible an pagin perpekto pinaagi han pagkasaserdote han mga Levita (kay bahin ito han Balaud nga iginhatag ha katawohan), kay ano nga magkikinahanglan pa hin lain nga saserdote nga ginsisiring nga pariho kan Melkisedek ngan diri pariho kan Aaron?
12 Kay kon ginbag-o an pagkasaserdote, kinahanglan liwat bag-uhon an balaud.
13 Tungod kay an tawo nga gin-uunabi hini nga mga detalye nagtikang ha iba nga tribo, nga waray bisan usa nga nagserbi ha halaran.
14 Kay matin-aw nga an aton Ginoo nagtikang kan Juda, pero waray ginsiring hi Moises nga may mga saserdote nga nagtikang hito nga tribo.
15 Ngan nagin mas matin-aw ini han nagkaada usa pa nga saserdote nga pariho kan Melkisedek,
16 nga nagin sugad hito, diri pinaagi han legal nga kwalipikasyon nga iginbasar ha tulin nga iya gintikangan, kondi pinaagi han gahum nga naghahatag ha iya hin diri-nadadaot nga kinabuhi.
17 Kay sugad nga pamatuod, ini an ginsiring mahitungod ha iya: “Usa ka nga saserdote pariho kan Melkisedek, ngan magigin waray kataposan an imo pagin saserdote.”
18 Salit ginwara an daan nga kasugoanan kay maluya ito ngan diri epektibo.
19 Kay waray nagin perpekto pinaagi han Balaud, pero nagin posible ito pinaagi han mas maopay nga paglaom, nga pinaagi hito mas nagigin duok kita ha Dios.
20 Dugang pa, tungod kay ginhimo ito nga may panumpa
21 (kay ha pagkamatuod, may kalalakin-an nga nagin saserdote bisan kon waray upod nga panumpa, pero ini nga usa nagin saserdote pinaagi hin panumpa han Dios nga nagsiring mahitungod ha iya: “Hi Jehova nanumpa, ngan diri hiya magbabasol, ‘Usa ka nga saserdote ha waray kataposan’ ”),
22 nagin garantiya hi Jesus han mas maopay nga kasabotan.
23 Labot pa, tungod kay namamatay an mga saserdote, diri hira nakakapadayon han ira pag-alagad, salit ginsasaliwnan hira hin iba,
24 pero hiya, tungod kay nagpapadayon hiya nga buhi ha waray kataposan, waray hiya mga kasaliwan ha pagkasaserdote.
25 Salit bug-os nga matatalwas niya an mga nadaop ha Dios pinaagi ha iya, kay nagpapadayon hiya nga buhi basi makimalooy para ha ira.
26 Angay gud nga magkaada kita hin sugad hito nga hitaas nga saserdote nga maunungon, waray karaotan, waray-hugaw, bulag ha magpakasasala, ngan ginpahitaas labaw pa han mga langit.
27 Diri pariho hadton hitaas nga mga saserdote, diri hiya kinahanglan maghalad kada adlaw, siyahan para ha iya kalugaringon nga mga sala ngan sunod para ha mga sala han mga tawo, kay ginbuhat niya ito hin makausa la han iginhalad niya an iya kalugaringon.
28 An Balaud nagpipili hin kalalakin-an nga may mga kaluyahan basi magin hitaas nga saserdote, pero katapos han Balaud, an pulong han panumpa nagpipili hin Anak nga ginhimo nga perpekto ha kadayonan.
Mga footnote
^ Ha literal, “ginbahínan.”
^ O “ulo han pamilya.” Ha Griego, patriarkhes.
^ Ha literal, “tikang ha mga pig-i.”
^ O “tidaraon nga tulin.”
