Hebreo 8:1-13
8 Yana ini an importante nga punto han amon ginsisiring: May-ada kita sugad hini nga hitaas nga saserdote, ngan nalingkod hiya ha too han trono han Harangdon ha kalangitan,
2 usa nga ministro ha baraan nga dapit ngan ha totoo nga tolda, nga gintindog ni Jehova, diri han tawo.
3 Kay an tagsa nga hitaas nga saserdote may responsabilidad ha paghalad hin mga regalo ngan mga halad; salit kinahanglan nga hiya liwat may ihalad.
4 Yana kon aanhi hiya ha tuna, diri unta hiya magigin saserdote, kay may kalalakin-an na nga naghahalad hin mga regalo uyon ha Balaud.
5 Ini nga kalalakin-an nagbubuhat hin sagrado nga pag-alagad nga nagsisimbolo ngan nagpapadagaw han langitnon nga mga butang; sugad kan Moises nga ginsugo han Dios han hirani na niya tindugon an tolda, kay an Dios nagsiring: “Siguroha nga himoon mo an ngatanan uyon ha surubdan nga iginpakita ha imo ha bukid.”
6 Pero yana hi Jesus nakakarawat hin mas ekselente nga sagrado nga buruhaton,* kay hiya liwat an tagapamutnga han mas maopay nga kasabotan, nga legal nga gin-establisar pinaagi han mas maopay nga mga saad.
7 Kon an siyahan nga kasabotan waray sayop, waray na unta magkinahanglan hin ikaduha.
8 Kay may nakikita hiya nga sayop ha katawohan han hiya nagsiring: “ ‘Kitaa! Maabot an mga adlaw,’ nasiring hi Jehova, ‘ngan maghihimo ako hin bag-o nga kasabotan ha panimalay ni Israel ngan ha panimalay ni Juda.
9 Diri ito magigin pariho han kasabotan nga akon ginhimo ha ira kaapoy-apoyan ha adlaw han ginkaptan ko an ira kamot basi tugwayan hira tipagawas ha tuna han Ehipto; tungod kay waray hira magpadayon nga matinumanon ha akon ginhimo nga kasabotan, waray ko na hira mangnoi,’ siring ni Jehova.”
10 “ ‘Kay ini an kasabotan nga akon hihimoon ha panimalay ni Israel katapos hito nga mga adlaw,’ nasiring hi Jehova. ‘Ibubutang ko an akon mga balaud ha ira hunahuna, ngan isusurat ko ito ha ira kasingkasing. Ngan ako magigin ira Dios, ngan magigin katawohan ko hira.
11 “ ‘Ngan an tagsa ha ira diri na magtututdo ha iya igkasi-tawo* ngan ha iya bugto, nga masiring: “Kilalaha hi Jehova!” Kay hira ngatanan makakakilala ha akon, tikang ha pinakaubos tubtob ha pinakaprominente.
12 Kay papasayloon ko hira ha ira diri-magtadong nga buhat, ngan diri ko na gud dudumdumon an ira mga sala.’ ”
13 Han nagsiring hiya nga “bag-o nga kasabotan,” iya ginpahinabo nga magin daan an nauna. Yana, ito nga daan ngan nagtitikalagas hirani na mawara.
