Hebreo 10:1-39
10 Tungod kay an Balaud nagpapadagaw la han maopay nga mga butang nga maabot, pero diri amo an reyalidad hito nga mga butang, diri gud mahihimo han mga tawo nga magin perpekto an mga nadaop ha Dios pinaagi ha paghalad kada tuig han amo gihapon nga mga halad.
2 Kay kon an mga halad makakahimo ha ira nga magin perpekto, kon sugad diri na unta kinahanglan nga maghalad pa, kay an mga nagbubuhat hin sagrado nga pag-alagad nga ginlimpyohan na hin makausa la diri na unta makukonsensya tungod han mga sala, diri ba?
3 Lugod, ini nga mga halad kada tuig nagpapahinumdom han mga sala,
4 kay an dugo han mga baka nga lalakí ngan han mga kanding diri nakakakuha han mga sala.
5 Salit pagkanhi han Kristo ha kalibotan nagsiring hiya: “ ‘Waray ka maruyag han halad nga hayop ngan iba pa nga halad, pero nag-andam ka hin lawas para ha akon.
6 Waray ka malipay ha bug-os nga mga halad nga sinunog ngan ha halad para ha sala.’
7 Nagsiring liwat ako, ‘Kitaa! Kinanhi ako (ha usa nga bahin han libro ini an iginsurat mahitungod ha akon) basi magbuhat han imo kaburut-on, O Dios.’ ”
8 Katapos niya magsiring: “Waray ka maruyag ngan malipay ha mga halad nga hayop ngan iba pa nga mga halad, ngan ha bug-os nga mga halad nga sinunog ngan ha halad para ha sala”—mga halad nga iginhalad uyon ha Balaud—
9 nagsiring liwat hiya: “Kitaa! Kinanhi ako basi magbuhat han imo kaburut-on.” Ginwara niya an siyahan basi maestablisar an ikaduha.
10 Uyon hini nga “kaburut-on” han Dios ginbaraan kita pinaagi ha paghalad han lawas ni Jesu-Kristo hin makausa la.
11 Sugad man, an tagsa nga saserdote aada ha iya pwesto kada adlaw basi magserbisyo* ngan maghalad hin damu ka beses han amo gihapon nga mga halad, nga diri gud bug-os nga makakawara han mga sala.
12 Pero ini nga tawo naghatag hin usa la nga halad nga makakawara han mga sala ha kadayonan, ngan liningkod ha too han Dios.
13 Tikang hito nga panahon naghihinulat hiya tubtob nga an iya mga kaaway igbutang sugad nga tungtongan han iya mga tiil.
14 Kay pinaagi han iya usa la nga halad ginhimo niya nga magin perpekto ha kadayonan an mga ginbaraan.
15 Labot pa, an baraan nga espiritu nagpapamatuod liwat ha aton, kay siyahan nagsiring ito:
16 “ ‘Ini an kasabotan nga akon hihimoon ha ira katapos hito nga mga adlaw,’ nasiring hi Jehova. ‘Ibubutang ko an akon mga balaud ha ira kasingkasing, ngan isusurat ko ito ha ira hunahuna,’ ”
17 katapos nagsiring ito: “Ngan diri ko na gud dudumdumon an ira mga sala ngan an ira mga pagtalapas.”
18 Kon may kapasayloan ito, diri na kinahanglan an halad para ha sala.
19 Salit mga kabugtoan, tungod kay pinaagi han dugo ni Jesus, may kompyansa kita pagsulod ha dalan tipakadto ha baraan nga lugar
20 nga iya gin-abrihan para ha aton sugad nga bag-o ngan buhi nga dalan pinaagi han pagsulod ha kurtina, nga amo an iya unudnon nga lawas,
21 ngan tungod kay may-ada kita pinakamaopay nga saserdote ha panimalay han Dios,
22 daop kita nga may sinsero nga kasingkasing ngan bug-os nga pagtoo, kay pinaagi han pagwisik nalimpyohan na an aton kasingkasing tikang ha maraot nga konsensya ngan ginkarigoan na an aton lawas hin limpyo nga tubig.
23 Magin marig-on kita ha padayon nga pagpahayag han aton paglaom nga waray pagruhaduha, kay matinumanon hiya nga nagsaad.
24 Ngan tagan naton hin atensyon an usa kag usa basi mag-inaghatay kita ha pagpakita hin gugma ngan mag-opay nga buhat,
25 nga diri ginpapabay-an an aton pagkatirok, sugad han nabatasan han iba, lugod nagpaparig-onay ha usa kag usa, labi na nga nakikita niyo nga nagtitikahirani na an adlaw.
26 Kay kon tinuyo nga magbuhat kita hin sala katapos naton makarawat an husto nga kahibaro ha kamatuoran, waray na nabibilin nga halad para ha mga sala,
27 lugod an nabibilin na la amo an tiarabot nga makaharadlok nga paghukom ngan an naglalaga nga kasina nga makakapoo ha mga nakontra.
28 An bisan hin-o nga nagbabalewaray han balaud ni Moises waray kalooy nga ginpapatay, kon may duha o tulo nga testigo.
29 Ha iyo paghunahuna, diri ba labi nga angay gud hin mas daku nga sirot an tawo nga nagtatamak ha Anak han Dios, ngan naghuhunahuna nga waray espesyal nga bili an dugo han kasabotan nga nagbaraan ha iya, ngan may pagtamay nga nag-iinsulto han espiritu nga nagpapakita han diri-matupngan nga pagkabuotan han Dios?
30 Kay kilala naton hiya nga nagsiring: “Akon an pagbulos, ako an mabulos”; ngan nagsiring liwat: “Hi Jehova maghuhukom ha iya katawohan.”
31 Makaharadlok gud nga makakarawat han sirot han buhi nga Dios.
32 Pero padayon nga hinumdumi niyo an naglabay nga mga adlaw, nga katapos niyo malamragi, nagpailob kamo ngan nag-antos hin makuri nga mga pagsari.
33 Usahay gin-iinsulto ngan ginpapasakitan kamo ha atubangan han publiko,* ngan usahay nakakaupod* niyo an mga nakaeksperyensya hito.
34 Kay pinaid kamo ha mga priso ngan waray kamo mawad-i hin kalipay bisan kon gintikasan kamo han iyo mga panag-iya, kay maaram kamo nga may mas maopay ngan permanente nga panag-iya para ha iyo.
35 Salit ayaw niyo karagi an iyo kagawasan ha pagyakan, kay may daku ito nga balos.
36 Kinahanglan magpailob kamo, basi katapos niyo buhaton an kaburut-on han Dios, makarawat niyo an katumanan han saad.
37 Kay “diri na gud mag-iiha,” ngan “hiya nga makanhi maabot ngan diri maglalangan.”
38 “Kondi an akon matadong nga surugoon padayon nga mabubuhi tungod han iya pagtoo,” ngan “kon umatras hiya, an akon kalag diri malilipay ha iya.”
39 Pero diri kita an klase nga naatras, nga nagriresulta ha kabungkagan, lugod kita an klase nga may pagtoo, nga nagriresulta ha katipigi nga buhi han kalag.
Mga footnote
^ O “pagserbisyo ha publiko.”
^ Ha literal, “nakabuhayhag sugad hin ha teatro.”
^ Ha literal, “nagigin mga igkasi-umarangbit.”
