Hebreo 4:1-16
4 Salit tungod kay nagpapadayon pa an saad ha pagsulod ha iya pagpahuway, mag-ikmat kita nga waray usa ha iyo nga diri magin kwalipikado hito.
2 Kay pariho ha ira, iginpahayag liwat ha aton an maopay nga sumat; pero waray hira magpahimulos han pulong nga ira hinbatian, kay waray hira pagtoo nga pariho han mga nagsugot.
3 Kita nga nagpapakita hin pagtoo nasulod ha pagpahuway, sugad la han iya ginsiring: “Salit tungod ha akon kasina nagsumpa ako, ‘Diri hira makakasulod ha akon pagpahuway,’ ” bisan kon human na an iya mga buruhaton tikang pa ha tinikangan han kalibotan.
4 Kay ha usa nga teksto han Kasuratan ini an iya ginsiring mahitungod han ikapito nga adlaw: “Ngan ha ikapito nga adlaw an Dios pinahuway tikang ha ngatanan nga iya buruhaton,”
5 ngan dinhi nasiring utro hiya: “Diri hira makakasulod ha akon pagpahuway.”
6 Salit tungod kay an iba puydi pa makasulod hito, ngan an mga una nga ginsumatan han maopay nga sumat waray makasulod hito tungod han pagkadiri-masinugtanon,
7 may itinanda na liwat hiya nga adlaw, paglabay hin hilawig nga panahon, pinaagi ha pagsiring nga “Yana” ha salmo ni David; sugad la han ginsiring na: “Yana kon mamati kamo ha akon tingog, ayaw patig-aha an iyo kasingkasing.”
8 Kay kon ginpangunahan hira ni Josue ngadto ha usa nga lugar nga mapapahuwayan, waray na unta an Dios mag-unabi hin lain nga adlaw katapos hito.
9 Salit may nabibilin pa nga pagpahuway ha adlaw han sabbath* para ha katawohan han Dios.
10 Kay an tawo nga nakasulod ha pagpahuway han Dios pinahuway liwat tikang ha iya mga buruhaton, pariho han ginbuhat han Dios.
11 Salit buhaton naton an aton bug-os nga mahihimo nga makasulod hito nga pagpahuway, basi waray bisan usa nga magsubad han amo gihapon nga pagkadiri-masinugtanon.
12 Kay an pulong han Dios buhi ngan gamhanan ngan mas matarom pa ha bisan ano nga espada nga paluyoluyo an tarom, ngan nadulot bisan tubtob ha pagbulag han kalag ngan espiritu ngan han mga kaluluthan tikang ha utok ha tul-an, ngan nakakatugkad han mga panhunahuna ngan mga intensyon han kasingkasing.
13 Ngan waray hinimo han Dios nga diri niya nakikita, lugod an ngatanan nga butang hubo ngan nakikita gud han iya mga mata ngan may baratunon kita ha iya.
14 Salit tungod kay kita may pinakamaopay nga hitaas nga saserdote nga sinaka ha kalangitan, hi Jesus nga Anak han Dios, magpadayon kita ha pagpahayag mahitungod ha iya.
15 Kay an aton hitaas nga saserdote, diri usa nga diri napaid ha aton mga kaluyahan, kondi an aton hitaas nga saserdote ginsarihan ha ngatanan nga paagi pariho ha aton, pero waray hiya sala.
16 Salit, may kagawasan ha pagyakan nga dumaop kita ha trono han Dios nga naghahatag han diri-matupngan nga pagkabuotan,* basi makarawat naton an kalooy ngan an diri-matupngan nga pagkabuotan nga mabulig ha aton ha husto nga panahon.
Mga footnote
^ Kitaa an “Sabbath” ha Glossary.
^ Ha literal, “ha trono han diri-matupngan nga pagkabuotan.”
