Hebreo 3:1-19
3 Salit baraan nga kabugtoan, nga mga umarangbit han langitnon nga pagtawag, tagda an apostol ngan hitaas nga saserdote nga aton iginpapahayag,* hi Jesus.
2 Matinumanon hiya ha Dios nga nagpili ha iya, pariho kan Moises nga matinumanon liwat ha bug-os nga panimalay han Dios.
3 Ngan takos hiya* hin mas daku nga himaya kay ha kan Moises, kay hiya nga nagtutukod mas dungganon kay han balay.
4 Ha pagkamatuod, an tagsa nga balay may nagtukod, pero an naghimo han ngatanan nga butang amo an Dios.
5 Hi Moises, sugad nga surugoon, matinumanon ha bug-os nga panimalay han Dios sugad nga pamatuod han mga butang nga igpapahayag ha tidaraon,
6 pero an Kristo sugad nga Anak matinumanon ha bug-os nga panimalay han Dios. Kita an panimalay han Dios kon marig-on nga tipigan naton tubtob ha kataposan an aton kagawasan ha pagyakan ngan an paglaom nga aton iginhahambog.
7 Salit sugad han ginsiring pinaagi han baraan nga espiritu: “Yana kon mamati kamo ha akon tingog,
8 ayaw patig-aha an iyo kasingkasing pariho hadto han ginpasina ako hinduro ha panahon nga ginsarihan ako nira ha kamingawan,
9 han ginsarihan ngan gin-ayat ako han iyo kaapoy-apoyan, bisan kon nakita nira an akon mga buhat ha sulod hin 40 ka tuig.
10 Tungod hito nasina gud ako hito nga henerasyon ngan nagsiring, ‘Pirme nahisisimang an ira kasingkasing, ngan waray hira mahibaro han akon mga paagi.’
11 Salit tungod ha akon kasina nagsumpa ako, ‘Diri hira makakasulod ha akon pagpahuway.’ ”
12 Mga kabugtoan, pag-ikmat kamo nga waray bisan usa ha iyo nga magkaada maraot nga kasingkasing nga waray pagtoo pinaagi ha pagbaya ha buhi nga Dios;
13 pero kada adlaw padayon nga magparig-onay kamo samtang gintatawag pa ito nga “Yana,” basi waray bisan usa ha iyo an magin matig-a an kasingkasing tungod han nakakalimbong nga gahum han sala.
14 Ha pagkamatuod, magigin mga kaangbit* la kita han Kristo kon marig-on nga tipigan naton tubtob ha kataposan an aton pagsarig tikang ha tinikangan.
15 Sugad han ginsiring: “Yana kon mamati kamo ha akon tingog, ayaw patig-aha an iyo kasingkasing pariho hadto han ginpasina ako hinduro.”
16 Hin-o an mga nakabati pero nagpasina la gihapon hinduro ha Dios? Ha pagkamatuod, diri ba hira ngatanan nga nagkagawas ha Ehipto ha pagpanguna ni Moises?
17 Dugang pa, hin-o an nasinahan gud han Dios ha sulod hin 40 ka tuig? Diri ba an mga nakasala, nga nagkamatay ha kamingawan?
18 Hin-o an mga iginsumpa niya nga diri makakasulod ha iya pagpahuway? Diri ba hira nga nagin diri masinugtanon?
19 Salit nasabtan naton nga waray hira makasulod tungod han kawaray pagtoo.
Mga footnote
^ O “iginpapakilala ha kadaygan.”
^ Karuyag sidngon, hi Jesus.
^ O “makikigbahin upod han Kristo.”
