Hebreo 11:1-40

11  An pagtoo amo an marig-on nga pagsarig nga matutuman an ginlalaoman, an ebidensya nga totoo an gintotoohan bisan kon diri nakikita. 2  Kay tungod hito an mga tawo ha kadaan nga panahon* nakakarawat hin pamatuod tikang ha Dios. 3  Tungod han pagtoo nasasabtan naton nga gin-organisa an mga butang ha langit ngan ha tuna* pinaagi han pulong han Dios, salit an mga butang nga nakikita ginhimo pinaagi han mga butang nga diri nakikita. 4  Tungod han pagtoo ni Abel, naghatag hiya ha Dios hin halad nga mas maopay kay han halad ni Cain, ngan pinaagi hito nga pagtoo nakarawat niya an pamatuod nga matadong hiya, kay napamatud-an ito han ginkarawat han Dios an iya mga regalo; ngan bisan kon patay na hiya, nagyayakan pa gihapon hiya tungod han iya pagtoo. 5  Tungod han pagtoo ni Enoc, iginbalhin hiya basi diri niya abaton an kamatayon, ngan waray na hiya hiagii kay iginbalhin hiya han Dios; pero antes hiya ibalhin nakarawat niya an pamatuod nga napalipay gud niya an Dios. 6  Dugang pa, kon waray pagtoo imposible nga mapalipay gud an Dios, kay an nadaop ha iya kinahanglan tumoo nga buhi hiya ngan hiya an nagbabalos ha mga sinsero nga nag-aalagad ha iya. 7  Tungod han pagtoo ni Noe, nagpakita hiya hin kahadlok ha Dios ngan naghimo hin arka basi matalwas an iya panimalay, katapos hiya pahamangnoan han Dios mahitungod han mga butang nga waray pa makita; ngan tungod hito nga pagtoo ginhukman niya an kalibotan, ngan iginpahayag hiya nga matadong sugad nga resulta han iya pagtoo. 8  Tungod han pagtoo ni Abraham, sinugot hiya han ginsugo nga kumadto ha lugar nga ihahatag ha iya sugad nga panurundon; ngan binaya hiya ha iya lugar bisan kon diri hiya maaram han iya kakadtoan. 9  Tungod han iya pagtoo, nag-ukoy hiya pariho hin dayo ha tuna nga iginsaad sugad hin aadto ha iba nga nasud, ngan nag-ukoy ha mga tolda kaupod hira Isaac ngan Jacob, nga iya mga igkasi-manurunod han amo gihapon nga saad tikang ha Dios. 10  Kay nagpipinamulat hiya han syudad nga may totoo nga mga pundasyon, nga an disenyador* ngan magtirindog amo an Dios. 11  Tungod han pagtoo ni Sarah, nakakarawat hiya hin gahum nga magburod,* bisan han lagas na hiya, kay ginhunahuna niya nga matinumanon Hiya nga nagsaad. 12  Tungod hini, tikang ha usa la nga lalaki nga sugad hin patay na, natawo an mga anak nga sugad kadamu han mga bitoon ha langit ngan diri maihap sugad han mga baras ha baybayon. 13  Hira ngatanan namatay nga may pagtoo, bisan kon waray nira makarawat an katumanan han mga saad, pero nakita nira ito ha hirayo ngan ginpinamulat ito ngan iginpahibaro ha publiko nga mga estranghero hira ngan temporaryo nga mga residente hito nga lugar. 14  Kay an mga nagyayakan hin sugad hito nagpapakita nga sinsero nga namimiling hira hin lugar nga magigin ira kalugaringon. 15  Pero kon padayon nga gindinumdom nira an lugar nga ira ginbayaan, may oportunidad unta hira nga bumalik. 16  Kondi naghihingyap hira hin mas maopay nga lugar nga kanan langit. Salit diri hira iginkakaawod han Dios, nga tawagon hiya nga ira Dios, kay nag-andam hiya hin syudad para ha ira. 17  Tungod han pagtoo ni Abraham, sugad hin iginhalad niya hi Isaac han ginsarihan hiya; ini nga lalaki nga malipayon nga nagkarawat han mga saad andam gud maghalad han iya bugtong nga anak, 18  bisan kon ginsidngan hiya: “An tatawagon nga ‘imo binhi’ magtitikang kan Isaac.” 19  Pero nangatadongan hiya nga mababanhaw gud han Dios hi Isaac; ngan tikang didto nahibalik ha iya an iya anak ha simboliko nga paagi. 20  Tungod liwat han pagtoo ni Isaac, ginbendisyonan niya hira Jacob ngan Esau may kalabotan ha mga butang nga maabot. 21  Tungod han pagtoo ni Jacob, han hirani na hiya mamatay, ginbendisyonan niya an tagsa nga anak ni Jose ngan nagsingba ha Dios samtang natukod ha iya tungkod. 22  Tungod han pagtoo ni Jose, han hirani na hiya mamatay nag-unabi hiya han paggawas han mga anak ni Israel; ngan naghatag hiya hin mga instruksyon mahitungod han iya lubong.* 23  Tungod han pagtoo han mga kag-anak ni Moises, igintago nira hiya ha sulod hin tulo ka bulan katapos niya matawo, kay nakita nira nga gwapo an bata ngan waray hira mahadlok ha sugo han hadi. 24  Tungod han pagtoo ni Moises, han daku na hiya diniri hiya nga tawagon nga anak han kan Paraon anak nga babaye; 25  mas ginpili niya nga maltratuhon hiya kaupod han katawohan han Dios imbes nga pahimulsan an temporaryo nga kalipayan han sala, 26  kay an kaarawdan han Kristo iya ginhunahuna nga karikohan nga mas labaw kay han mga bahandi ha Ehipto; kay nakapokus hiya ha pagkarawat han premyo. 27  Tungod han iya pagtoo, binaya hiya ha Ehipto ngan waray mahadlok ha kasina han hadi, kay hiya padayon nga nagpailob nga sugad hin nakikita an Dios nga diri-nakikita. 28  Tungod han iya pagtoo, ginselebrar niya an paskua* ngan an pagpahid han dugo, basi diri patayon* han anghel han Dios an ira suhag nga mga anak. 29  Tungod han ira pagtoo, gintabok nira an Dagat nga Pula nga sugad hin natabok ha mamara nga tuna, pero han nagsari pagtabok an mga Ehiptohanon, ginlamoy hira han dagat. 30  Tungod han ira pagtoo, narumpag an mga pader han Jerico katapos nira magmartsa ha palibot hito hin pito ka adlaw. 31  Tungod han pagtoo ni Rahab nga puta, waray hiya mamatay upod han mga diri-masinugtanon, kay makisangkayon nga ginpasulod niya an mga espiya. 32  Ngan ano pa an akon masisiring? Kay kulang an panahon kon ig-istorya ko pa an mahitungod kanda Gideon, Barak, Samson, Jepte, David, sugad man kan Samuel ngan han iba pa nga mga propeta. 33  Tungod han pagtoo ginpirdi nira an mga ginhadian, ginbuhat an matadong, nakakarawat hin mga saad, gintak-om an baba han mga leon, 34  waray maapektohi han gahum han kalayo, nakapalagiw ha tarom han espada, tikang ha pagin maluya nagin gamhanan, nagin makusog ha pakig-away, ngan ginpirdi an nasulong nga mga sundalo. 35  Nakarawat han kababayin-an an ira namatay nga mga hinigugma nga ginbanhaw; pero an iba nga kalalakin-an ginpasakitan kay waray hira magkompromiso para han ira kagawasan, basi makarawat nira an mas maopay nga pagkabanhaw. 36  Oo, an iba inatubang hin pagsari pinaagi hin mga pagtamay ngan mga paglatigo, ngan diri la ito, ginkadenahan hira ngan ginpriso. 37  Ginbato hira, ginsarihan, gin-utod pinaagi hin sarutso, ginpatay pinaagi hin espada, nagsul-ot hira hin anit han karnero ngan anit han kanding samtang nagkukuri, nagsasakit, ngan ginmamaltrato; 38  ngan an kalibotan diri takos ha ira. Nagburobalhin hira ha mga disyerto, ha kabukiran, ha mga lungib, ngan ha mga buho han tuna. 39  Pero hira ngatanan, bisan kon nakakarawat hin maopay nga pamatuod tungod han ira pagtoo, waray makakarawat han katumanan han saad, 40  kay nakita nga daan han Dios an mas maopay para ha aton, basi diri hira magin perpekto nga bulag ha aton.

Mga footnote

^ O “an aton mga kaapoy-apoyan.”
^ Kitaa an footnote ha Heb 1:2.
^ O “arkitekto.”
^ Karuyag sidngon, magburod hin binhi.
^ Ha literal, “mga tul-an.”
^ Kitaa an “Paskua” ha Glossary.
^ Ha literal, “labtan.”