Hebreo 6:1-20
6 Salit yana nga hinbaroan na naton an nangunguna nga doktrina mahitungod han Kristo, mangalimbasog kita nga mag-uswag ngadto ha pagkahamtong, ngan diri na magbutang utro hin pundasyon, nga amo an pagbasol tikang ha patay nga mga buhat, ngan pagtoo ha Dios,
2 an katutdoan mahitungod han mga bawtismo ngan an pagtungbaw han mga kamot, an pagkabanhaw han mga patay ngan an paghukom nga waray kataposan.
3 Ini an aton bubuhaton, kon itugot gud han Dios.
4 Kay imposible mabuligan nga magbasol utro an mga nalamragan na, ngan nakakarawat na han waray bayad nga regalo tikang ha langit, ngan nagin mga umarangbit han baraan nga espiritu,
5 ngan nakatilaw na han maopay nga pulong han Dios ngan han gamhanan nga mga butang may kalabotan han tiarabot nga sistema,
6 pero binaya ha pagtoo, kay ira mismo iginraraysang utro ha kahoy an Anak han Dios ngan ginpapakaalohan hiya ha publiko.
7 Kay an tuna nga nainom han uran nga agsob tumuro ngada hito ngan katapos nakakapatubo hin mga tanom nga napapahimulsan han mga nagkukultibar hito, nakarawat hin bendisyon tikang ha Dios.
8 Pero kon nakakapatubo ito hin katunokan ngan mga banwa, ginpapabay-an ito ngan haros isumpa; ngan ha kataposan susunugon ito.
9 Kondi mahitungod ha iyo, mga hinigugma, kombinsido kami nga may-ada mas maopay nga mga butang—mga butang nga nagriresulta ha katalwasan—bisan kon nagyayakan kami ha sugad hini nga paagi.
10 Kay an Dios diri kay diri-matadong nga kalimtan niya an iyo mga buhat ngan an gugma nga iyo iginpakita para ha iya ngaran, kay nagserbi kamo ngan padayon nga nagsiserbi ha mga baraan.
11 Pero hingyap namon nga an tagsa ha iyo padayon nga magmaduruto tubtob ha kataposan basi bug-os nga makasiguro han paglaom,
12 basi diri kamo magin hubya, lugod magsubad kamo ha mga nakakarawat han mga saad tungod han pagtoo ngan pagpailob.
13 Han nagsaad an Dios kan Abraham, nanumpa hiya ha iya kalugaringon, kay waray na mas labaw pa ha iya nga iya mapapanumpaan.
14 Nagsiring hiya: “Bibendisyonan ko gud ikaw ngan padadamuon ko gud ikaw.”
15 Salit katapos ni Abraham magpakita hin pagpailob, nakarawat niya ito nga saad.
16 An mga tawo nanunumpa ha usa nga mas labaw ha ira, ngan an ira panumpa amo an kataposan han ngatanan nga pagdiskusyon, kay legal nga garantiya ito ha ira.
17 Ha sugad hini nga paagi, han nagdesisyon an Dios nga ipahayag hin mas matin-aw ha mga manurunod han saad an pagin diri nababag-o han iya katuyoan, ginparig-on niya ito pinaagi hin panumpa,
18 basi pinaagi han duha nga butang nga diri nababag-o nga tungod hito imposible gud magbuwa an Dios, kita nga pinalagiw ngadto ha arayopan maaghat gud nga kaptan hin marig-on an paglaom nga iginbutang ha aton atubangan.
19 Ini nga aton paglaom pariho hin angkla han kalag, nga sigurado ngan marig-on, ngan nagdadara ito ha aton ngadto ha luyo han kurtina,*
20 diin sinulod an nag-una para ha aton nga amo hi Jesus, nga nagin hitaas nga saserdote pariho kan Melkisedek ngan magigin waray kataposan an iya pagin saserdote.
Mga footnote
^ Karuyag sidngon, an kurtina nga nakakatabon ha Pinakabaraan.
