Hebreo 13:1-25
13 Ipadayon niyo an iyo minagburugto nga gugma.
2 Ayaw hingalimot ha pagin maabiabihon, kay ha pagbuhat hito an iba diri maaram nga mga anghel na ngay-an an ira gin-aabiabi.
3 Hinumdumi pirme an mga priso nga sugad hin ginpriso kamo upod nira, ngan an mga ginmamaltrato, kay kamo liwat bahin han lawas.*
4 Pasidunggan han ngatanan an pag-asawa, ngan diri paghugawan an higdaan han mag-asawa, kay huhukman han Dios an mga imoral* ngan mga nag-aadulteryo.*
5 An iyo pagkinabuhi mawaray unta gugma ha kwarta, samtang kontento na kamo ha mga butang nga aada. Kay hiya nagsiring: “Diri ko gud ikaw babayaan ngan diri ko gud ikaw papabay-an.”
6 Salit makakasarig gud kita ngan makakasiring: “Hi Jehova an akon parabulig, diri ako mahahadlok. Ano an mahihimo han tawo ha akon?”
7 Hinumdumi an mga nangunguna ha iyo, nga nagyayakan han pulong han Dios ha iyo, ngan samtang ginpapamalandong niyo an mag-opay nga resulta han ira panggawi, subara an ira pagtoo.
8 Hi Jesu-Kristo amo la gihapon tikang hadto ngan yana, ngan ha kadayonan.
9 Ayaw pasagdi nga mahisimang kamo han magkalain-lain ngan iba nga katutdoan; kay mas maopay nga an kasingkasing maparig-on han diri-matupngan nga pagkabuotan kay han mga pagkaon* nga diri nakakaopay ha mga naghahatag hin sobra nga importansya hito.
10 May halaran kita diin an mga nagbubuhat hin sagrado nga pag-alagad ha tolda waray awtoridad nga kaunon an aada hito.
11 Kay an dugo han mga hayop gindadara han hitaas nga saserdote ngadto ha baraan nga lugar sugad nga halad para han sala, ngan an mga lawas hito ginsusunog ha gawas han kampo.
12 Salit hi Jesus nag-antos liwat ha gawas han ganghaan basi mabaraan niya an katawohan pinaagi han iya dugo.
13 Kon sugad, kadto kita ha iya ha gawas han kampo, ngan ilubon naton an kaarawdan nga gin-ilob niya,
14 kay waray kita dinhi syudad nga permanente, pero ginpapamulat gud naton an syudad nga tiarabot.
15 Pinaagi ha iya pirme kita maghalad ha Dios hin halad han pagdayaw, nga amo an bunga han aton mga im-im, nga nagpapasamwak han iya ngaran ha publiko.
16 Labot pa, ayaw hingalimot ha pagbuhat han maopay ngan pagpaangbit ha iba han anoman nga may-ada ka, kay nalilipay gud an Dios ha sugad nga mga halad.
17 Magin masinugtanon kamo ha mga nangunguna ha iyo ngan magin mapinasakupon ha ira, kay padayon nga nagbabantay hira han iyo mga kalag sugad nga mga may baratunon; basi buhaton nira ito nga may kalipay ngan diri nanhahayhay, kay makakadaot ito ha iyo.
18 Padayon nga ig-ampo kami, kay natapod kami nga limpyo an amon konsensya, ngan karuyag namon gumawi hin tangkod ha ngatanan nga butang.
19 Pero labi na nga gin-aaghat ko kamo nga mag-ampo nga makabalik dayon ako ha iyo.
20 Yana hinaot an Dios han kamurayawan, nga nagbanhaw han aton Ginoo nga hi Jesus, an maopay gud nga paraataman han mga karnero pinaagi han dugo hin kasabotan nga waray kataposan,
21 maghatag ha iyo han tagsa nga maopay nga butang ha pagbuhat han iya kaburut-on. Pinaagi kan Jesu-Kristo iya kita ginpapagios nga buhaton an nakakalipay ha iya. Paghimayaon unta an Dios ha kadayonan. Amen.
22 Yana mga kabugtoan, gin-aaghat ko kamo nga pamatian hin mapailubon ini nga pulong ha pagparig-on, kay ha pagkamatuod, naghimo ako hin halipot nga surat para ha iyo.
23 Ginpapahibaro ko kamo nga an aton bugto nga hi Timoteo ginpagawas na. Kon kumadi dayon hiya, magkaupod kami nga magbibiyahe basi makigkita ha iyo.
24 Ipaabot an akon pangumusta ha ngatanan nga nangunguna ha iyo ngan ha ngatanan nga mga baraan. Nangungumusta ha iyo an kabugtoan ha Italya.
25 Makarawat unta niyo ngatanan an diri-matupngan nga pagkabuotan.
Mga footnote
^ Idiom ini nga nangangahulogan, “sugad hin nag-aantos kamo upod nira.”
^ Kitaa an footnote ha 1Co 5:9.
^ Kitaa an “Adulteryo” ha Glossary.
^ Karuyag sidngon, mga pagkaon nga igindidiri han Mosaiko nga Balaud.
