Hebreo 2:1-18
2 Salit importante nga tagan naton hin labaw ha kasagaran nga atensyon an mga butang nga aton hinbatian, basi diri gud kita ig-anod pahirayo.
2 Kay kon an pulong nga ginyakan pinaagi han mga anghel napamatud-an nga marig-on gud, ngan an tagsa nga sala ngan pagtalapas may sirot uyon ha hustisya;
3 paonan-o kita makakalikay kon ginbabalewaray naton an sugad kaimportante nga katalwasan nga iginpahayag siyahan pinaagi han aton Ginoo ngan ginpamatud-an ha aton han mga nakabati ha iya?
4 Ngan an Dios nagpamatuod liwat pinaagi hin mga tigaman ngan urusahon nga mga butang ngan gamhanan nga mga buhat* ngan pinaagi han baraan nga espiritu nga iginhatag uyon ha iya kaburut-on.
5 Kay waray niya igpasakop ha mga anghel an tiarabot nga kalibotan,* nga amon iginpapahayag.
6 Pero may saksi nga nagpamatuod nga nasiring: “Ano ba an tawo nga pirme mo hiya nahinunumdoman, o an anak han tawo nga imo hiya ginmamangnoan?
7 Ginhimo mo hiya nga uroubos la hin gutiay ha mga anghel; ginkoronahan mo hiya hin himaya ngan dungog, ngan igintapod ha iya an mga buhat han imo mga kamot.
8 An ngatanan nga butang imo iginpasakop ha ilarom han iya mga tiil.” Tungod kay iginpasakop na ha iya an ngatanan nga butang, waray butang nga waray igpasakop ha iya han Dios. Pero yana, diri pa naton nakikita nga sakop na niya an ngatanan nga butang.
9 Kondi nakikita gud naton nga hi Jesus, nga ginhimo nga uroubos la hin gutiay ha mga anghel, ginkoronahan na yana hin himaya ngan dungog tungod ha pag-antos hin kamatayon. Pinaagi han diri-matupngan nga pagkabuotan han Dios, naeksperyensyahan niya an kamatayon para ha ngatanan.
10 An ngatanan nga butang nahimo para ha himaya han Dios ngan nagkahihimo ito pinaagi ha iya. Salit basi mahimaya an damu nga anak, angay la nga itugot Niya nga mag-antos an Lider, nga nakahimo ha iya nga magin kwalipikado ha pagtalwas ha ira.
11 Kay hiya nga nagbabaraan ngan an mga ginbabaraan usa la an gintikangan, ngan tungod hini waray hiya maawod pagtawag ha ira nga “kabugtoan,”
12 han hiya nagsiring: “Ipapasamwak ko an imo ngaran ha akon kabugtoan; pagdadayawon ko ikaw ha kongregasyon pinaagi hin mga kanta.”
13 Nagsiring liwat hiya: “Masarig ako ha iya.” Ngan nagsiring liwat: “Kitaa! Ako ngan an kabataan nga iginhatag ha akon ni Jehova.”
14 Kon sugad, tungod kay an “kabataan” may dugo ngan unod, hiya liwat nagin pariho ha ira, basi pinaagi han iya kamatayon mabungkag niya an usa nga may kapas ha pagpahinabo han kamatayon, nga amo an Yawa;
15 ngan basi matagan niya hin kagawasan an ngatanan nga nagin uripon ha bug-os nira nga kinabuhi tungod han kahadlok ha kamatayon.
16 Kay ha pagkamatuod, diri mga anghel an iya ginbubuligan kondi an katulinan* ni Abraham.
17 Tungod hito kinahanglan magin pariho hiya ha iya “kabugtoan” ha ngatanan nga paagi, basi hiya magin maloloy-on ngan matinumanon nga hitaas nga saserdote ha mga butang nga may kalabotan ha Dios, ngan basi makahatag hiya hin halad ha pagpahiuli tungod han mga sala han katawohan.
18 Tungod kay hiya mismo nag-antos han ginsarihan hiya, makakabulig hiya ha mga ginsasarihan.
