Hebreo 9:1-28
9 Mahitungod han nauna nga kasabotan, may mga balaud ito para ha sagrado nga pag-alagad ngan may baraan nga lugar dinhi ha tuna.
2 Kay ha siyahan nga dibisyon han tolda nga ginhimo aadto an burutangan han lampara, an lamesa, ngan an mga tinapay nga halad; ngan gintatawag ito nga “an Baraan nga Lugar.”
3 Pero an luyo han ikaduha nga kurtina amo an dibisyon han tolda nga gintatawag nga “an Pinakabaraan.”
4 Didto nakabutang an bulawan nga insensaryo ngan an arka han kasabotan nga ginpalitadahan hin bulawan, nga ginbutangan han bulawan nga tibod nga may sulod nga manna, ngan han namukad nga tungkod ni Aaron, ngan han mga papan nga bato han kasabotan;
5 ha bawbaw han kahon may mahimayaon nga mga kerubin nga nalambong ha taklob han pagpahiuli.* Pero diri yana panahon nga hisgotan hin detalyado ini nga mga butang.
6 Kahuman himoon ito nga mga butang ha sugad nga paagi, an mga saserdote nasulod kada adlaw ha siyahan nga dibisyon han tolda basi buhaton an sagrado nga pag-alagad;
7 pero an hitaas nga saserdote la an nasulod ha ikaduha nga dibisyon makausa kada tuig, dara an dugo nga iya ighahalad para ha iya kalugaringon ngan para ha mga sala nga nabuhat han mga tawo tungod ha kaignorante.
8 Hito nga paagi iginpapatin-aw han baraan nga espiritu nga an dalan tipakadto ha baraan nga lugar waray pa ipakita samtang nakada pa an siyahan nga tolda.
9 Ito mismo nga tolda nagsisimbolo han mga butang nga nahitatabo yana nga panahon, ngan uyon hini nga kahikayan, iginhahalad an mga regalo ngan mga halad. Kondi diri hito nahihimo nga perpekto an konsensya han tawo nga nagbubuhat han sagrado nga pag-alagad.
10 May kalabotan la ito ha mga pagkaon, mga irimnon, ngan iba-iba nga bawtismo. Mga iginpapatuman ito han balaud mahitungod han lawas ngan ginsunod ito tubtob ha itinanda nga panahon ha pagtadong han mga butang.
11 Pero pag-abot han Kristo sugad nga hitaas nga saserdote han maopay nga mga butang nga natuman na, sinulod hiya ha mas dungganon ngan mas maopay nga tolda nga diri hinimo han mga kamot, karuyag sidngon, diri bahin han mga hinimo han Dios dinhi ha tuna.
12 Sinulod hiya ha baraan nga lugar hin makausa la, dara an iya kalugaringon nga dugo, diri an dugo han mga kanding ngan nati nga mga baka nga lalakí, ngan gintalwas kita niya ha kadayonan.
13 Kay kon an dugo han mga kanding ngan han mga baka nga lalakí ngan an abo han nati nga baka nga babayé nga iginwisik ha mga nahugawan para ha paglimpyo han unod nakabaraan ha ira,
14 diri ba an dugo han Kristo, nga naghalad han iya kalugaringon ha Dios sugad nga perpekto nga halad pinaagi han waray kataposan nga espiritu, labi na gud nga makakalimpyo han aton mga konsensya tikang ha patay nga mga buhat basi makabuhat kita hin sagrado nga pag-alagad ha buhi nga Dios?
15 Salit hiya an tagapamutnga han bag-o nga kasabotan, basi an mga gintawag makakarawat han saad nga waray kataposan nga panurundon. Nagin posible ini ngatanan tungod han iya kamatayon, nga pinaagi hito ginlukat hira tikang ha mga pagtalapas ilarom han nauna nga kasabotan.
16 Kay kon may kasabotan, an tawo nga nakigsabot kinahanglan mamatay,
17 tungod kay an kasabotan nagigin marig-on la pinaagi han kamatayon han usa, kay waray ito pwersa samtang buhi pa an tawo nga nakigsabot.
18 Amo nga bisan an nauna nga kasabotan waray tikangi kon waray dugo.
19 Kay han iginsaysay ni Moises ha bug-os nga katawohan an tagsa nga sugo han Balaud, ginkuha niya an dugo han nati nga mga baka nga lalakí ngan han mga kanding ngan ginsalaktan ito hin tubig. Ngan nagsangbod hiya hin pula nga tela ha gutiay nga sanga han hisopo basi gamiton ha pagwisik han dugo dida ha basahon ngan ha bug-os nga katawohan,
20 ngan hiya nagsiring: “Ini an dugo han kasabotan nga iginpapatuman ha iyo han Dios.”
21 Ngan iya liwat ginwisikan han dugo an tolda ngan an ngatanan nga surudlan nga ginagamit ha sagrado nga pag-alagad.
22 Oo, sumala ha Balaud haros ngatanan nga butang nalilimpyohan pinaagi han dugo, ngan kon waray dugo nga igpaagay, waray kapasayloan han mga sala.
23 Salit an mga nagsisimbolo han mga butang ha langit kinahanglan nga malimpyohan ha sugad hini nga mga paagi, pero an langitnon nga mga butang nagkikinahanglan hin mas maopay nga mga halad.
24 Kay an Kristo waray sumulod ha baraan nga lugar nga hinimo han mga kamot, nga ginsubad ha reyalidad, lugod aadto na hiya yana ha langit basi magpakita ha atubangan han Dios para ha aton.
25 Ginbuhat niya ito diri basi ihalad an iya kalugaringon hin damu ka beses, pariho han hitaas nga saserdote nga nasulod kada tuig ha baraan nga lugar dara an dugo nga diri iya.
26 Kay kon sugad hito, mag-aantos hiya hin damu ka beses tikang ha tinikangan han kalibotan. Pero yana nagpakita hiya hin makausa la ha ikatarapos hini nga sistema basi wad-on an sala pinaagi ha paghalad han iya kalugaringon.
27 Ngan sugad la nga an mga tawo namamatay hin makausa la pero katapos hito nakarawat hin paghukom,
28 sugad man an Kristo iginhalad hin makausa la basi pas-anon an mga sala han damu; ngan ha iya ikaduha nga pagpakita, diri na ito tungod han sala, ngan makikita hiya han mga sinsero nga namimiling ha iya para ha ira katalwasan.
Mga footnote
^ Kitaa an “Taklob han pagpahiuli” ha Glossary.
