Hebreo 12:1-29
12 Salit tungod kay ginpapalibotan kita hin madakmol nga dampog hin mga saksi, kuhaon naton an bisan ano nga nakakabug-at ngan an sala nga masayon la makaulang ha aton, ngan mapailubon nga dalaganon naton an rumba nga iginbutang ha aton atubangan,
2 samtang ginkikita naton hin maopay an Lider ngan Maghiringpit han aton pagtoo, hi Jesus. Tungod han kalipay nga iginbutang ha iya atubangan gin-ilob niya an pasakitan nga kahoy,* ginbalewaray an pakaalo, ngan liningkod ha too han trono han Dios.
3 Tagda gud hin maopay hiya nga nag-ilob han maraot nga panyakan han magpakasasala nga nagdadaot ha ira mismo kaopayan, basi diri kamo kapuyon ngan diri masubo an iyo kasingkasing.*
4 Ha iyo pakig-away ha sala, waray pa gud kamo umato tubtob nga umawas an iyo dugo,
5 ngan nahingalimtan gud niyo ini nga sinsero nga sagdon diin gintatawag kamo nga mga anak: “Anak ko, ayaw pagminosa an disiplina ni Jehova, ngan ayaw kasubo kon ginsasaway ka niya;
6 kay gindidisiplina ni Jehova an iya hinigugma; ha pagkamatuod iya ginlalatigo* an bisan hin-o nga ginkakarawat niya sugad nga anak.”
7 Kinahanglan mag-ilob kamo kay upod ito han disiplina* ha iyo. Gintatratar kamo han Dios sugad nga mga anak. Kay hin-o nga anak an diri gindidisiplina han iya amay?
8 Pero kon diri kamo ngatanan iupod hini nga pagdisiplina, diri kamo totoo nga mga anak, lugod mga anak kamo ha gawas.
9 Dugang pa, natural la nga disiplinahon kita han aton tawhanon nga amay, ngan ginrirespeto naton hira. Diri ba sadang kita magin mas andam gud ha pagpasakop ha aton espirituwal* nga Amay basi mabuhi?
10 Kay ira kita gindidisiplina ha halipot nga panahon uyon ha kon ano an maopay para ha ira, pero gindidisiplina kita han Dios para ha aton kaopayan basi magin baraan kita pariho ha iya.
11 Oo, waray disiplina nga makalilipay samtang iginpapadapat, lugod masakit ito;* pero katapos, nagbubunga ito hin kamurayawan ngan katadongan ha mga nabansay hito.
12 Salit parig-ona an mga kamot nga naluyloy ngan an mga tuhod nga maluya,
13 ngan padayon nga tadonga an mga dalan para ha imo mga tiil, basi kon ano an napiang diri malisa ha kaluluthan, lugod matambal ito.
14 Pangalimbasugi pirme nga makigmurayaw ha ngatanan nga tawo, ngan an pagkabaraan, kay kon an tawo diri magin baraan diri niya makikita an Ginoo.
15 Pagbantay hin maopay nga waray bisan usa nga diri makakarawat han diri-matupngan nga pagkabuotan han Dios, ngan waray gamot nga makahirilo nga tumubo ngan magin hinungdan han kasamok, basi diri hito mahugawan an damu;
16 ngan waray bisan hin-o ha iyo an sadang magin imoral* o waray apresasyon ha sagrado nga mga butang, pariho kan Esau nga an katungod ha pagkasuhag iginbalyo ha usa nga pagkaon.
17 Kay maaram kamo nga kahuman hito, han karuyag na niya makarawat an bendisyon iginsalikway hiya, kay bisan kon nagtangis pa gud hiya ha panalinguha nga mabag-o an hunahuna han iya amay, waray na hiya nahimo.
18 Kay waray kamo dumaop ha usa nga butang nga puydi kaptan ngan naglalaga ha kalayo, ngan ha madulom nga dampog ngan madakmol nga kasisidman ngan ha bagyo,
19 ngan may tunog han trumpeta ngan tingog nga nagyayakan hin mga pulong. Pakabati hito han mga tawo, nanginyupo hira nga waray na dugang nga igyakan ha ira.
20 Tungod kay diri nira mailob an sugo: “Bisan kon hayop la an tumamak ha bukid kinahanglan batuhon ito.”
21 Dugang pa, makaharadlok gud an kiritaon salit hi Moises nagsiring: “Nahahadlok ako ngan nangungurog.”
22 Pero dinaop kamo ha Bukid Sion ngan ha syudad han buhi nga Dios, an langitnon nga Jerusalem, ngan ha yinukot-yukot nga anghel
23 nga nagkakatirok, ngan ha kongregasyon han suhag nga an mga ngaran nakasurat didto ha langit, ngan ha Dios nga hukom han ngatanan, ngan ha espirituwal nga kinabuhi han mga matadong nga ginhimo na nga perpekto,
24 ngan kan Jesus nga tagapamutnga han bag-o nga kasabotan, ngan ha iginwisik nga dugo nga mas maopay magyakan kay ha dugo ni Abel.
25 Siguroha nga diri kamo mapakyas ha pagpamati* ha iya nga nagyayakan. Kay kon waray makapalagiw an mga waray mamati ha naghatag han pahamangno han Dios ha tuna, labi na nga diri kita makakapalagiw kon bayaan naton hiya nga nagyayakan tikang ha langit.
26 Hito nga panahon nabay-og an tuna tungod han iya tingog, pero yana nagsasaad hiya: “Makausa pa, babay-ugon ko diri la an tuna kondi pati an langit.”
27 Yana an mga pulong nga “Makausa pa” nagpapasabot hin pagkuha han mga butang nga nababay-og—mga butang nga ginhimo*—basi magpabilin an mga butang nga diri nababay-og.
28 Salit tungod kay makarawat kita hin Ginhadian nga diri mababay-og, padayon nga pahimulosan naton an diri-matupngan nga pagkabuotan, nga pinaagi hito makakabuhat kita hin sagrado nga pag-alagad nga kinakarawat han Dios, nga may kahadlok ngan pagpasidungog ha iya.
29 Kay an aton Dios nakakaugtang gud pariho hin kalayo.
Mga footnote
^ Kitaa an Apendise 6.
^ O “manluya an iyo kalag.”
^ O “ginsisirotan.”
^ O “pagbansay.”
^ O “Amay han aton espirituwal nga kinabuhi.”
^ O “makasurubo.”
^ Kitaa an footnote ha 1Co 5:9.
^ O “maghimo hin mga pasangil.”
^ Karuyag sidngon, mga butang nga ginhimo han iba, diri han Dios.
