Hebreo 5:1-14
5 An tagsa nga hitaas nga saserdote tikang ha katawohan ginpili ha pag-asikaso han mga butang may kalabotan ha Dios, basi maghalad para ha katawohan hin mga regalo ngan mga halad tungod han mga sala.
2 Mapinairon* hiya magtratar ha mga ignorante ngan ha mga nagsasayop kay hiya liwat may kaluyahan,
3 ngan tungod hito kinahanglan maghalad hiya para ha iya kalugaringon nga mga sala sugad han iya ginbubuhat para ha katawohan.
4 Dugang pa, waray bisan hin-o nga nagpipili han iya kalugaringon para hini nga kadungganan, gawas la kon ginpili hiya han Dios, pariho kan Aaron.
5 Sugad man an Kristo waray magpasidungog ha iya kalugaringon han nagin hitaas nga saserdote hiya, kondi ginpasidunggan hiya han usa nga nagsiring ha iya: “Ikaw an akon anak; ako, yana nga adlaw, ako nagin imo amay.”
6 Nagsiring liwat hiya ha lain nga teksto han Kasuratan: “Usa ka nga saserdote pariho kan Melkisedek, ngan magigin waray kataposan an imo pagin saserdote.”
7 Han nagkikinabuhi pa an Kristo dinhi ha tuna* naghalad hiya hin mga pangamuyo ngan mga hangyo ha Dios nga nagtalwas ha iya tikang ha kamatayon, nga may mga araba ngan mga pagtangis, ngan ginpamatian gud an iya mga pag-ampo kay may kahadlok hiya ha Dios.
8 Bisan kon Anak hiya, nahibaro hiya han pagkamasinugtanon tikang ha mga butang nga iya gin-antos;
9 ngan han nagin perpekto* na hiya, an ngatanan nga nasugot ha iya mahimo na kumarawat han katalwasan ha kadayonan pinaagi ha iya,
10 kay ginpili hiya han Dios nga magin hitaas nga saserdote pariho kan Melkisedek.
11 Damu pa an amon masisiring mahitungod ha Iya, pero makuri ito iesplikar kay nagin maluya an iyo pagpamati.
12 Kay bisan kon yana angay na unta kamo magin mga magturutdo, kinahanglan may magtutdo na liwat ha iyo tikang ha tinikangan han basihan nga mga prinsipyo mahitungod han sagrado nga mga kapahayagan han Dios; ngan nagkikinahanglan na liwat kamo han gatas, diri han matig-a nga pagkaon.
13 Kay an tagsa nga tawo nga gatas la gihapon an gin-iinom diri nahibabaro han matadong nga pulong han Dios, kay bata pa hiya.
14 Kondi an matig-a nga pagkaon kanan hamtong nga mga tawo, ha mga nagbabansay han ira abilidad ha pagsabot pinaagi ha paggamit hito basi makakilala han husto ngan sayop.
Mga footnote
^ O “makatadunganon.”
^ Ha literal, “Han panahon nga unod pa hiya.”
^ O “nagin bug-os nga kwalipikado.”
