Daaneela 9:1-27
9 Kaladatu kawotettan kawoyido, Meedoonatu zeretta gidida Ahashuresa naꞌaa Dariyosa koyro layttan,
2 A haaruwa koyro layttan, hiraagaa* yootiya Ermmaasa baggaara Yihoowi yootido, Yerusalaama baysa gida uttiyo wodee polettiyo layttatu qoodaa, hegeekka, 70u layttaa taani Daaneeli maxaafatuppe* akeekaas.
3 Yaatiyo gishshawu, taani ta somꞌꞌuwa tumu Xoossaa Yihoowakko zaaraas; waaruwa* maayadanne bidinttaa ta bolli laalada A awuddashaas, woossaasinne xoomaas.
4 Taani ta Xoossaa Yihoowa woossayddanne paaxaydda hagaadan gaas:
“Tumu Xoossawu, Godaa Yihoowaa, nena siiqiyanne ne azazota naagiyageeta ne tasenna siiquwan siiqiyanne etawu ne maachchaa naagiya, gitanne hoola giyo Xoossawu,
5 nuuni nagaraa oottida, moorida, iitabaa oottidanne makkalida; qassi nuuni ne azazotuppenne ne pirddidobatuppe wora simmida.
6 Nu kawotuyyo, nu daannatuyyo, nu mayzza aawatuyyonne biittaa asa ubbawu ne sunttan yootida, neeyyo haggaaziya hiraagaa yootiyageeti odidobaa nuuni siyibookko.
7 Godaa Yihoowaa, neeni xillo, shin neeyyo ammanettibeenna gishshawu neeni biitta ubban, mataaninne haahuwan laalido Yihudaa asati, Yerusalaamen deꞌiyageetinne Israaꞌeela asay ubbay, nuuni hachchiigaadan yeellaa* maayida.
8 “Godaa Yihoowaa, nu kawoti, nu daannatinne nu mayzza aawati nuuni ne bolli nagaraa oottido gishshawu yeellaa* maayida.
9 Nu Xoossawu Yihoowaa, neeni maariyagaanne* atto giyagaa, shin nuuni ne bolli makkalida.
10 Nuuni nu Xoossaa Yihoowi baayyo haggaaziya, hiraagaa yootiyageetu baggaara nuuyyo immido A higgeta kaallennan aggidi, I yootiyobaa azazettibookko.
11 Israaꞌeelati ubbay ne higgiya kanttidosonanne neeni yootiyobaa azazettennan aggiyogan wora simmidosona; hegaappe denddidaagan, tumu Xoossaayyo haggaaziya Muuse Higgiyan xaafettida, caaquwan qanggido qanggettaa nu bolli gussadasa; ayssi giikko, nuuni ne bolli nagaraa oottida.
12 I nu bolli gita bashshaa ehiyogan, nu bollinne nuna haarida asatu* bolli haasayidobaa poliis; Yerusalaamen hanidabaa mali saloppe garssan awudekka hani erenna.
13 Muuse Higgiyan xaafettidoogaadan, ha bashshay ubbay nu bolli gakkiis, shin nu Xoossawu Yihoowaa, nuuni nu nagaraappe simmennan aggiyogaaninne ne tumaa* akeekennan aggiyogan, neeni nuuyyo kehanaadan* woossibookko.
14 “Hegaa gishshawu, Yihoowi loytti xeelliiddi takkidi nu bolli bashshaa ehiis; ayssi giikko, nu Xoossay Yihoowi ba oottido ooso ubban xillo; shin nuuni I yootidobaa azazettibookko.
15 “Simi nu Xoossawu Yihoowaa, ne asaa Gibxxe biittaappe wolqqaama kushiyan kessada, hachchi gakkanawu ne sunttay loytti erettanaadan oottidaagoo, nuuni nagaraanne iitabaa oottida.
16 Godaa Yihoowaa, ne xillo ooso ubbaa maaran hayyanaa ne geeshsha deriyappe, Yerusalaame katameeppe ne wolqqaama yiilluwanne hanqquwa guyye zaara; ayssi giikko, nu nagaraanne nu mayzza aawatu nagaraa gaasuwan Yerusalaamanne ne asay nu yuushuwan deꞌiyageeti ubbay qilliicciyoba gididosona.
17 Qassi nu Xoossawu, ne ashkkaraa woosaanne A awuddashiya haꞌꞌi siyarkkii, qassi Godaa Yihoowaa, baysa gidida ne geeshsha sohuwa bolli ne sunttaa gishshawu ne somꞌꞌuwa pooꞌissa.
18 Nu Xoossawu ne hayttaa nuukko zaarada ezgga, ne ayfiya dooyada nuuninne ne sunttan xeegettiya katamiya bayi uttidoogaa beꞌa; ayssi giikko, nuuni awuddashiyoy ne gita maarotaappe* denddidaagaanappe attin, nuuni xillobaa oottiyo gishshaassa gidenna.
19 Godaa Yihoowaa, ezgga. Godaa Yihoowaa, atto ga. Godaa Yihoowaa, nubaa siyada nuna maadda! Ne katameeninne ne asan ne sunttay xeegettido gishshawu, ta Xoossawu, ne sunttaa gishshawu takkoppa.”
20 Taani haasayishin, woossishin, ta nagaraanne ta asaa Israaꞌeela nagaraa paaxishiininne ta Xoossaa geeshsha deriya gishshaa ta Xoossaa Yihoowa sinttan awuddashishin,
21 ee, taani biron woossishin, omarssa imotaa yarshshuwa wodiya heeran taani hitti ga uttidaashin, ajjuutan kase ta beꞌido bitanee Gabreeli taakko yiis.
22 Qassi I taani akeekanaadan tana maaddiis, hagaadan giis:
“Daaneelaa, hananabaa neeni yuushsha qoppanaadaaninne* akeekanaadan haꞌꞌi ta nena maaddanawu yaas.
23 Neeni awuddashiya doommido wode, taani Xoossaappe kiitaa ekkada, hegaa neeyyo odanawu yaas; ayssi giikko, neeni keehi dosettida* asa. Yaatiyo gishshawu hagaa loytta ezgga, qassi ajjuutaa akeeka.
24 “Higgiya kanttoy attanaadan oottanawu, nagaraa muleera xayssanawu, mooruwa kammanawu, merinaa xillotettaa ehaanawu, ajjuutaanne hiraagaa* bolli maatafaa wottanawunne Geeshshatu Geeshshaa* tiyanawu ne asaayyonne ne geeshsha katameeyyo 70u saaminttati* maacettidosona.
25 Yerusalaamo kasesaa zaaranawunne zaaretti keexxanawu azazoy kiyiyo wodiyappe doommidi, Kaalettiyagee, Masee* yaana gakkanaashin 7 saaminttatinne 62u saaminttati aadhdhanaagaa neeni erananne akeekana bessees. A kasesawu simmananne zaaretta keexettana, I dabaabaynne O yuuyi aadhdhida boohoykka* hegaadan hanana; shin hegee unꞌꞌo wodiyan hanana.
26 “Qassi 62u saaminttatuppe guyyiyan, bawu aybinne attennan Masee qanxxettana.*
“Qassi kaalettiya uri ba olanchchatuura yaana; eti yiidi katamiyonne geeshsha sohuwa xayssana. Qassi A wurssettay wolqqaama diꞌuwan xayiyogaa mala gidana. Hegaa bollikka, he wurssettay gakkanaashin olay deꞌana; Xoossay maacidobay bashshaa.
27 “I darotu gishshawu maachchay issi saaminttawu takkanaadan oottana; qassi I saaminttawu baggan mehiya yarshshoynne imotaa yarshshoy attanaadan oottana.
“Hegaa bollikka, sheneyiyabatu qefiyan bashshiyagee deꞌana; qassi muleera xayssiyo wodee gakkanaashin, maacettidabay baysa attidaagaa bollikka gukkana.”
Footnotes
^ Woykko “Xoossay erissidobaa.”
^ Hegeekka, geeshsha maxaafatuppe.
^ Hegeekka, azzano maayuwa.
^ Mise, “somꞌꞌo yeellaa.”
^ Mise, “somꞌꞌo yeellaa.”
^ Qonccissuwa xeella.
^ Mise, “nuna pirddida nu daannatu.”
^ Woykko “somꞌꞌuwa tukkennaadan oottanawu.”
^ Woykko “ammanettiyagaa gidiyogaa.”
^ Qonccissuwa xeella.
^ Woykko “hananabawu humꞌꞌuwa xeellanaadaaninne.”
^ Woykko “alꞌꞌobadan xeelliyo; keehi nashshiyo.”
^ Mise, “hiraagaa yootiyagaa.”
^ Woykko “Aybippekka Aadhdhiya Geeshshaa.”
^ Hegeekka, layttatu saaminttata.
^ Woykko “Tiyettidaagee.”
^ Woykko “ollaykka.”
^ Woykko “Masiya worana.”
