Daaneela 5:1-31
5 Kawoy Belshshazzari ba kawotettaa wodiyan, ba xoqqa maataawatuppe issi shaꞌatuyyo gibiraa kessiis; yaatidi woyniya eta sinttan uyees.
2 Kawoy Belshshazzari woyniya ushshay denttettin, inne A xoqqa maataawati, A kaadumatatinne* I dawuttido machchoti A aaway Nebukadanaxori Yerusalaamen deꞌiya Xoossaa keettaappe* ekkido worqqanne bira wanccatun uyana mala, eta ehaanaadan azaziis.
3 Yaatin Yerusalaamen deꞌiya Xoossaa keettaappe kase ekkido worqqa wanccata eti ehiidosona; ehin kawoynne A xoqqa maataawati, A kaadumatatinne I dawuttido machchoti etan uyidosona.
4 Eti woyniya uyidosonanne worqqaappe, biraappe, nahaasiyappe, birataappe, mittaappenne shuchchaappe merettida xoossata sabbidosona.
5 He wode sohuwara asa kushe biradhdheti beettidosonanne kawo garuwan xomppiya wottiyosaa sinttan deꞌiya godaa meeshuwa bolli xaafiyogaa doommidosona, qassi xaafishin kawoy kushiyawu zokko baggaa beꞌiis.
6 Yaatin kawuwa meray laamettiis, I qoppiyobay A yashshiis, A gaadee kokkoriis, qassi A gulbbatati issoy issuwara domꞌꞌettiyogaa doommidosona.
7 Kawoy shareechchota, Kaladatanne* xoolintteta xeellidi kaayiyageeta xeeganaadan ba qaalaa xoqqu oottidi azaziis. Kawoy Baabiloone eranchcha asatuyyo hagaadan giis: “Taani ha xaafettidabaa nabbabiyanne A birshshettaa tawu yootiya ay asanne ochchaa teeraa milatiya* maayuwa mayzzana, A qooriyan worqqa alleequwa wottana, qassi I kawotettan heezzantto asa gididi haarana.”
8 Yaatin eranchcha asati ubbay kawuwakko gelidosona, shin eti xaafettidabaa nabbabana woy A birshshettaa kawuwassi erissana danddayibookkona.
9 Yaanin Kawuwa Belshshazzari keehi yayyiisinne A meray laamettiis; qassi A xoqqa maataawati shabbirettidosona.
10 Kawoynne A xoqqa maataawati haasayiyobaa gaasuwan kawiya gibiraa miyo addaraashaa gelaasu. Kawiya hagaadan gaasu: “Bonchchettida kawuwawu, merinawu deꞌa. Neeni qoppiyobaa gaasuwan yayyoppa woy ne meray laamettanaadan oottoppa.
11 Geeshsha xoossatu ayyaanay an deꞌiyo issi asi* ne kawotettan deꞌees. Ne aawaa wode aaro eray, ciimma akeekaynne* xoossatuugaa mala hayyoy an beettiis. Ne aaway Kawuwa Nebukadanaxori murunniya kahinetu, shareechchotu, Kaladatunne* xoolintteta xeellidi kaayiyageetu gadaawa oottidi A sunttiis; bonchchettida kawuwawu, ee, ne aaway hegaa oottiis.
12 Ayssi giikko, kawoy Bilxxaasoora giido Daaneelawu aymota birshshiyo, akeekanawu metiyabata qonccissiyonne tuhettida metota birshshiyo,* oogaappenne leqqiya ayyaanay, qassi eraynne ciimma akeekay deꞌees. Haꞌꞌi Daaneeli xeegetto, yaatin I neeyyo birshshettaa yootana.”
13 Yaatiyo gishshawu, Daaneela kawuwa sintti ehiidosona. Kawoy Daaneela hagaadan giidi oychchiis: “Neeni ta aaway kawoy Yihudaappe ehiido, omooddettada yiida Daaneelee?
14 Xoossatu ayyaanay nenan deꞌiyogaanne aaro eray, ciimma akeekaynne oogaappenne leqqiya hayyoy nenan beettidoogaa taani nebaa siyaas.
15 Ha xaafettidabaa tawu nabbabanaadaaninne A birshshettaa tawu erissanaadan eranchcha asatanne shareechchota ta sintti ehiidosona, shin eti xaafettidabaa birshshettaa tawu yootana danddayibookkona.
16 Gidoppe attin, neeni birshshettata yootananne tuhettida metota birshshana* danddayiyogaa taani nebaa siyaas. Haꞌꞌi neeni xaafettidabaa nabbabananne A birshshettaa tawu erissana danddayikko, taani nena ochchaa teeraa milatiya maayuwa mayzzana, ne qooriyan worqqa alleequwa wottana, qassi neeni kawotettan heezzantto asa gidada haarana.”
17 Yaagin Daaneeli kawuwayyo hagaadan giidi zaariis: “Ne imotay nebaa gido, ne woytuwakka haratuyyo immana danddayaasa. Shin taani xaafettidabaa kawuwayyo nabbabananne A birshshettaa erissana.
18 Bonchchettida kawuwawu, Ubbaappe Xoqqa Xoossay ne aawawu Nebukadanaxorawu kawotettaa, gitatettaa, bonchchuwanne anggaa immiis.
19 I ayyo immido gitatettaappe denddidaagan, asa zareti, deretinne dumma dumma doonata haasayiyageeti ubbay A sinttan yayyidi kokkoridosona. I ba koyido oonanne woriis woy deꞌanaadan aggi bayiis, qassi ba koyido oonanne xoqqu xoqqu oottiis woy kawushshiis.
20 Shin I ba wozanan axiraaridinne zozzu giidi otorobaa hanido wode ba kawotettaa araataappe wodhdhiis, qassi A bonchchoy appe qaarettiis.
21 I asaa giddoppe yedetettiis, A wozanay laamettidi doꞌaagaa mala gidiis, qassi I woraa haretuura deꞌiis. Ubbaappe Xoqqa Xoossay asa kawotettaa Haariyagaa gidiyogaanne ba koyido oonanne kawotettan sunttiyogaa I erana gakkanaashin, booratudan maataa miis, qassi A bollay saluwa akkan irxxiis.
22 “Shin neeni, A naꞌay Belshshazzari ha ubbabaa erikkokka, nena ziqqi oottabaakka.
23 Ubbakka, neeni saluwa Godaa eqettada nena xoqqu xoqqu oottadasanne A keettaa wanccata neeyyo ehiissadasa. Hegaappe simmin, neeninne ne xoqqa maataawati, ne kaadumatatinne neeni dawuttido machchoti etan woyniya uyideta, qassi biraappe, worqqaappe, nahaasiyappe, birataappe, mittaappenne shuchchaappe merettida, aybanne beꞌenna, aybanne siyennanne aybanne erenna xoossata sabbideta. Shin neeni shemppiyo shemppoynne ne oge ubbay A kushiyana gidiyo Xoossaa bonchchabaakka.
24 Yaatiyo gishshawu I kushiya kiittiis, qassi ha xaafettidaagaa I xaafissiis.
25 Xaafettidabay hagaa: MINI, MINI, TIQEL, qassi PARSSIN.
26 “Qaalatu birshshettay hagaa: MINI, Xoossay ne kawotettaa gallassata qoodiisinne wuranaadan oottiis giyogaa.
27 “TIQEL, neeni meezaanan likettada pacca beettadasa giyogaa.
28 “PEREES, ne kawotettay shaahettidi Meedoonatuyyonne Parssetuyyo imettiis giyogaa.”
29 Hegaappe guyyiyan Belshshazzari azazin, eti Daaneela ochchaa teeraa milatiya maayuwa maayzzidosonanne A qooriyan worqqa alleequwa wottidosona, qassi I kawotettan heezzantto asa gididi haaranaagaa eti abaa awaajjidosona.
30 He galla qammi Kaladatu kawuwa Belshshazzara woridosona.
31 Yaatin Meedooniya Dariyosi kawotettaa ekkiis; ayyo layttay 62 heera gidana.
Footnotes
^ Hegeekka, machcho mala aylleta.
^ Woykko “beeta maqidasiyappe; Xoossaa garuwappe.”
^ Hegeekka, shareechchiyonne xoolintteta xeellidi kaayiyo eray deꞌiyogeeta.
^ Ha meray kawo zariyara, duretaaranne bonchchuwara gayttidaba.
^ Woykko “danddayiya asi.”
^ Hegeekka, hanotawu humꞌꞌuwa xeelliyo hakkaa.
^ Hegeekka, shareechchiyonne xoolintteta xeellidi kaayiyo eray deꞌiyogeeta.
^ Mise, “tuhuwa birshshiyo.”
^ Mise, “tuhuwa birshshana.”
