Daaneela 11:1-45
11 I hagaadan giis: “Taani Meedooniya Dariyosa koyro layttan, A maaddanawunne minttanawu* denddaas.
2 Taani neeyyo haꞌꞌi yootanabay ammanettiyaba:
“Parssen hara heezzu kawoti denddana,* qassi oyddanttoogee hara ubbatuugaappe dariya duretaa shiishshana. I ba duretaappe denddidaagan minniyo wode, Giriike kawotettaara olettanawu ubbabaa denttana.
3 “Qassi wolqqaama kawoy denddidi daro biittata haarananne ba koyidoogaadan oottana.
4 Gidoppe attin, I denddin, A kawotettay meqqananne saluwa oyddu carkkotu ginan shaahettana; shin A zerettatuba* gidenna, eti haariyo biittatikka I haarido biittatu mala gidokkona; ayssi giikko, A kawotettay xoqolettidi hageetuppe haratussikka imettana.
5 “Tohossa kawoy, hegeekka, A daannatuppe issoy minnana; shin issoy appe minnidi haaruwa wolqqan appe aadhdhananne daro biittata haarana.
6 “Amarida layttaappe guyyiyan eti issoy issuwara hashetana, qassi maayettana mala, tohossa kawuwa naꞌiya huuphessa kawuwakko yaana. Shin A ba qesiya wolqqaara deꞌaagukku, qassi ikka A qeseekka eqqidi deꞌokkona; onne O ehiyageeta, A yelettanaadan oottidaagaanne he wode O minttiyagaa haratu wolqqawu aatti immana.
7 I xaphotuppe aacida issoy A sohuwan denddana, qassi I olanchchata eqettidi yaananne huuphessa kawuwa qatuwa eqettidi yaana, I etaara olettidi eta xoonana.
8 Hegaa bollikka, I eta xoossata, eti birataappe medhdhido misileta,* biraappenne worqqaappe oosettida eta alꞌꞌo* miishshatanne omooddettida eta asata ekkidi Gibxxe baana. Amarida layttawu I huuphessa kawuwakko shiiqenna,
9 huuphessa kawoy tohossa kawuwa kawotettaa olanawu yaana, shin guyye ba biitti simmana.
10 “A attuma naati olawu giigettidi keehi daro olanchchata shiishshana. I sinttawu sugidi biittaa diꞌuwadan meecciiddi kanttana. Shin I guyye simmidi ba qatuwa gakkanaashin ubbasan olettana.
11 “Qassi tohossa kawoy hanqquwa suullananne kiyi biidi aara, hegeekka, huuphessa kawuwara olettana; qassi ayyo cora olanchchati deꞌana, shin he corati hegaa kushiyan aadhdhi imettana.
12 Qassi I he corata efaana. I xoqqu xoqqu gaananne daro tammu shaꞌati kunddanaadan oottana; gidoppe attin, ba minotettan goꞌettenna.
13 “Huuphessa kawoy simmidi yaananne ayyo koyroogaappe dariya cora olanchchati deꞌana; qassi amarida wodee wurin, amarida layttaappe guyyiyan, I darobaa ekkidi cora olanchchatuura yaanaagee attenna.
14 He wodiyan tohossa kawuwa bolli daroti denddana.
“Qassi ajjuutay polettanaadan oottanawu malanaadan, ne asaa giddon deꞌiya danottiyageeta* efaana; shin eti xubettana.
15 “Qassi huuphessa kawoy yiidi biittaa dooriyan dooddananne mino qatoy deꞌiyo katamaa oyqqana. Yaatin tohossa kawuwa olanchchatikka,* doorettida A asatikka eqettokkona; qassi etawu eqettiyo wolqqi mule deꞌenna.
16 A eqettidi yiyagee ba koyidoogaadan oottana, qassi A sinttan ooninne eqqenna. I Alleeqo* biittan eqqana, qassi asaa muleera xayssiyo wolqqay ayyo deꞌana.
17 I ba kawotettaa kumetta wolqqaara yaanawu murttana,* qassi I aara maayettana; hegaa bollikka, I ba qoppidobaa oottana. Macca asatu naꞌiyo xayssiyo maatay ayyo imettana. A eqqada deꞌukku, qassi abaa gidada deꞌaagukku.
18 I ba somꞌꞌuwa abbaa doona biittatukko guyye zaaridi daro biittata oyqqana. Shin azaziya issoy hegee kawushshido kawushshay attanaadan oottana, yaatin he kawushshay deꞌenna. I hegee awu guyye simmanaadan oottana.
19 Hegaappe simmin, I ba biittaa qatotukko ba somꞌꞌuwa guyye zaarana, qassi I xubettidi kunddananne xayana.
20 “Qassi A sohuwan, giiraa giirissiyagee* gita kawotettan ubbasaara kanttanaadan oottiya uri denddana; shin hanqquwan woy olan gidana xayikkonne, I amarida gallassatun meqqana.
21 “Karettidaagee* A sohuwan denddana, qassi asay kawuwawu bessiya bonchcho A bonchchenna; I hirggi baynna wodiyan* yiidi cimuwan* kawotettaa oyqqana.
22 Wolqqaama diꞌo mala olanchchata* I xoonana, qassi eti meqqana; maachchaa Gadaawaykka* meqqana.
23 Eti aara hashetidoogaa gaasuwan I cimmiiddi deꞌana, qassi denddidi guutta deree maaddin wolqqaama gidana.
24 Hirggi baynna wodiyan,* I moottaa* giddon keehi injjetiya sohota* gelana, qassi I ba aawatinne eta aawati oottibeennabaa oottana. Bonqqidobaa, omooddidobaanne dumma dumma miishshata I etayyo gishana; qassi I qatotu bolli iitabaa maqqana, shin guutta wode xallaassa.
25 “Qassi I cora olanchchata ekkidi tohossa kawuwa bolli ba wolqqaanne ba wozanaa denttettana; tohossa kawoykka zawi baynna coranne wolqqaama olanchchata ekkidi olawu giigettana. Shin I eqqidi deꞌenna; ayssi giikko, eti A bolli maqettana.
26 Qassi A loꞌꞌo qumaa miyageeti I kunddanaadan oottana.
“A olanchchati pitettana,* qassi daroti asi worin kunddana.
27 “Ha naaꞌꞌu kawotu wozanay iitabaa oottanawu qoppana, qassi eti issi xaraphpheezaa matan uttidi issoy issuwawu wordduwa yootana. Shin eta halchchoy polettenna; ayssi giikko, wurssettay keerettida wodiyan guyyeppe yaana.
28 “Qassi I keehi darobaa ekkidi ba biitti guyye simmananne A wozanay geeshsha maachchaa bolli denddana. I ba qoppidobaa oottananne ba biitti guyye simmana.
29 “Keerettida wodiyan I guyye simmidi, tohossa kawuwa bolli denddana. Shin he wode kaseegaadan hanenna;
30 ayssi giikko, Kittima markkabeti A bolli yaana; yaatin I kawuyyana.
“I guyye simmana; yaatidi geeshsha maachchaa bolli ba wolqqaama hanqquwa* yeddi bayananne ba qoppidobaa oottana; qassi I guyye simmidi geeshsha maachchaa aggiyageeta qoppana.
31 Appe kiyiya olanchchati* denddana; qassi eti qatuwa, hegeekka, geeshsha sohuwa tunissananne paci baynnan yarshshiyobay yarshshettennaadan diggana.
“Qassi eti bashshiya sheneyiyabaa essana.
32 “I ba cimo qaalan,* iitabaa oottiyanne maachchaa koliya asati kaddanaadan oottana. Shin bantta Xoossaa eriya asati minnananne ushachchiyabaa oottana.
33 Asaa giddon ciimma akeekay* deꞌiyogeeti daro asaa tamaarissana. Qassi eti bisuwaninne taman, omoodduwaninne bonqqiyan qohettidi, amarida gallassawu xubettana.
34 Shin eti xubettiyo wode, guutta maado ekkana; qassi daroti cimobaa haasayidi* etaara hashetana.
35 Wurssettaa wodee gakkanaashin, paacci kessiyo, geeshshiyonne mulxxuxxissiyo oosoy etappe denddidaagan oosettana mala, ciimma akeekay deꞌiyogeetuppe amaridaageeti xubettana; ayssi giikko, hegee keerettida wodiyan guyyeppe yaana.
36 “Kawoy ba koyidoogaadan oottana, qassi bana xoossatu ubbaappe xoqqu xoqqu oottananne gitayana; I xoossatu Xoossaa eqettidi malaaliyabata haasayana. Qassi hanqquwa wodee wurana gakkanaashin ubbabay ayyo injjetana; ayssi giikko, maacettidabay hanana bessees.
37 I ba aawatu xoossaa bonchchenna; qassi I macca asay koyiyobaa woy hara ay xoossakka xaasayana, shin bana ubbaappe gitayana.
38 I hegaa aggidi* qatotu xoossaa bonchchana; I worqqaa, biraa, alꞌꞌo shuchchatanne loꞌꞌiyabata* immiyogan A aawati erenna xoossaa bonchchana.
39 I allaga xoossaara issippe* ubbaappe minniya qatotu bolli ba qoppidobaa oottana. I bana bonchchiyageetussi* gita bonchchuwa immana; qassi I eti darota haaranaadan oottananne miishshaa ekkidi biittaa shaakki immana.*
40 “Wurssettaa wodiyan tohossa kawoy aara sugettana;* huuphessa kawoy para gaareta, paraasatanne daro markkabeta ekkidi wolqqaama carkkuwadan A bolli yaana, qassi I daro biittata gelananne diꞌuwadan meecciiddi kanttana.
41 I Alleeqo* biittaakka gelana, qassi daro biittati kunddana. Shin A kushiyappe attanaageeti hageeta: Edoma, Moꞌabanne Ammonatuppe waannatiyageeta.
42 I biittatu bolli ba kushiya aggennan yeddana; qassi Gibxxe biittay kessi ekkenna.
43 Gibxxe geemmida buqurata, worqqaa, biraanne loꞌꞌiyabata* ubbaa I haarana. Qassi Liibiya asatinne Toophphiya asati A kaallana.*
44 “Shin arshsho baggappenne* huuphessa baggappe yiya odoy A shabbirana, qassi muleera xayssanawunne darota bashshanawu I wolqqaama hanqquwan kiyana.
45 I gita abbaappenne Alleequwa* geeshsha deriyappe gidduwan ba kawo* dunkkaaneta tolana; qassi I xayana, A maaddanay deꞌenna.
Footnotes
^ Woykko “ayyo qato gidanawu.”
^ Woykko “eqqana.”
^ Woykko “naatuba.”
^ Woykko “seerissidi medhdhido hawultteta.”
^ Woykko “loꞌꞌiya.”
^ Woykko “bonqqiyageeta.”
^ Mise, “qesetikka.”
^ Woykko “Loꞌꞌiya.”
^ Woykko “ba somꞌꞌuwa zaarana.”
^ Woykko “asaa wotaaddaratettawu mazggafiyagee; kaabboy.”
^ Woykko “Pattennaagee.”
^ Woykko geella, “eti hegaa naagennan deꞌishin.”
^ Woykko “maqquwan.”
^ Woykko “qeseta.”
^ Woykko “Kaalettiyageekka.”
^ Mise, “moottaa modhdhotettaa.”
^ Woykko geella, “Eti hegaa naagennan deꞌishin.”
^ Woykko “awuraajjaa.”
^ Woykko “shoketti baana.”
^ Woykko “qanggettaa.”
^ Woykko “qeseti.”
^ Woykko “heebboyiyogan; sholloorettidi.”
^ Hegeekka, hanotawu humꞌꞌuwa xeelliyo hakkaa.
^ Woykko “heebboyidi; sholloorettidi.”
^ Woykko “A sohuwan.”
^ Woykko “alꞌꞌobata.”
^ Woykko “allaga xoossay maaddin.”
^ Woykko “gishana.”
^ Woykko geella, “I bonchchiyo ooyyonne.”
^ Woykko “aara kaceta xambbixallana.”
^ Woykko “Loꞌꞌiya.”
^ Woykko “alꞌꞌobata.”
^ Woykko “kottiya kaallana.”
^ Woykko “away kiyiyosaappenne.”
^ Woykko “Loꞌꞌiya.”
^ Woykko “kawo garuwa mala.”
