Daaneela 12:1-13
12 “He wode, ne asaayyo* eqqiya, gita daannay Mikaaꞌeeli* denddana.* Qassi deree* merettoosappe he wode gakkanaashin hani erenna waayiya wodee yaana. He wode ne asay, hegeekka, maxaafan xaafetida ubbay attana.
2 Biittaa giddon xiskkidaageetuppe daroti denddana; amaridaageeti merinaa deꞌuwawu, qassi harati tooshiyawunne merinaa yeellawu denddana.
3 “Ciimma akeekay* deꞌiyogeeti saluwa micettaadan, qassi xillotettaa ogiyan hemettanaadan darota maaddiyageeti meri merinawu xoolinttetudan wagaggi giidi pooꞌana.
4 “Daaneelaa, ha qaalata gentta wotta, qassi wurssettaa wodee gakkanaashin maxaafaa attamada gordda. Daroti yaa haa buusana,* qassi tumu eray keehi darana.”
5 Hegaappe guyyiyan, taani Daaneeli xeelliyo wode, yan hara naaꞌꞌati, issoy shaafaa doonan ha baggan, qassi issoy shaafaa doonan hankko baggan eqqidaageeta beꞌaas.
6 Yaatin issoy shaafaa haattaa bolli qommoora eqqidanne liinuwa maayida bitaniyawu, “Ha malaaliyabati poletti wuranaashin ay keena wode gamꞌꞌanee?” yaagiis.
7 Yaatin shaafaa haattaa bolli qommoora eqqidanne liinuwa maayida bitanee ba ushachcha kushiyanne ba haddirssa kushiya saluwa pude denttidi merinawu deꞌiya Xoossan caaqqiiddi hagaadan giishin taani siyaas: “Hegee keerettida wodiya, keerettida wodetanne wodiya baggaa* gamꞌꞌana. Geeshsha asatu wolqqaa kinchchidi wurssosaara hageeti ubbay polettidi wurana.”
8 Hegaa taani siyidaba gidikkokka, akeekana danddayabeykke; yaatiyo gishshawu taani, “Ta godawu, ha ubbabaa wurssettan aybi hananee?” yaagaas.
9 Yaagin I hagaadan giis: “Daaneelaa, ba; ayssi giikko, wurssetta wodee gakkanaashin, ha qaalata gentti wottananne attamidi gorddana bessees.
10 Daroti banttana geeshshana, mulxxuxxissananne paacettidi kiyana. Iitati iitabaa oottana, qassi iitatuppe ooninne akeekenna; shin ciimma akeekay deꞌiyogeeti akeekana.
11 “Paci baynnan yarshshiyobay yarshshettennaadan digettiyo wodiyappe doommidi, bashshiya sheneyiyabaa essiyo wodiya gakkanaashin 1,290u gallassa gidana.
12 “Danddayan naagiiddi* 1,335u gallassaa gattiya uri ufayttana!
13 “Shin neeni wurssettaa gakkanaashin genccada ba. Neeni shemppana; shin gallassatu wurssettan neeni ne saamaa ekkanawu* denddana.”
Footnotes
^ Mise, “ne asaa naatuyyo.”
^ Birshshettay “Xoossaa Mali Ooni Deꞌii?”
^ Woykko “denddi eqqana.”
^ Woykko “deretetti.”
^ Hegeekka, hanotawu humꞌꞌuwa xeelliyo hakkay.
^ Woykko “hegaa [hegeekka, maxaafaa] akeekan pilggana.”
^ Hegeekka, heezzanne bagga wodeta.
^ Woykko “Yeemuwan naagiiddi.”
^ Woykko “neeyyo imettida sohuwan.”
