Daaneela 1:1-21
1 Yihudaa kawoy Yihoꞌaqimi kawotoosappe heezzantto layttan, Baabiloone kawoy Nebukadanaxori Yerusalaame yiidi O dooddiis.
2 Guyyeppe Yihoowi Yihudaa kawuwa Yihoꞌaqimanne tumu Xoossaa keettaa* miishshatuppe amaridaageeta A kushiyan aatti immiis, qassi I he miishshata Sanaꞌora* biitti, ba xoossaa keetti* efiis. I hegeeta ba xoossaa buquraa wottiyosan wottiis.
3 Hegaappe guyyiyan, kawoy ba garuwa sunttatuppe waannatiya Ashipenazi Israaꞌeelatuppe* amaridaageeta, kawo naatuuranne gita asatu naatuura ehanaadan azaziis.
4 Eti hayyoy, eraynne akeekay deꞌiyo, qassi kawo keettan haggaazana danddayiya, sankki baynna loꞌꞌiya yelagata* gidana koshshees. I eta Kaladatu xaafuwanne doonaa tamaarissanaadan sunttettiis.
5 Hegaa bollikka, kawoy ba loꞌꞌo qumaappenne ba uyiyo woyniyappe etayyo mooddidobay ubba galla imettanaadan azaziis. Eti heezzu layttawu loohana* bessees, qassi he wodee wurin eti kawuwa oosuwa doommana bessees.
6 Yihudaa yaraappe* amaridaageeti eta giddon deꞌoosona; hegeetikka, Daaneela,* Hananiya,* Mishaꞌeelanne* Azariya.*
7 Qassi kawo garuwa sunttatu gadaaway eta hara sunttatun* sunttiis; Daaneela Bilxxaasoora* giidi, Hananiya Sidiraaqa* giidi, Mishaꞌeela Misaaqa* giidi, qassi Azariya Abddanaaga* giidi sunttiis.
8 Shin Daaneeli kawuwa loꞌꞌo quman woy I uyiyo woyniyan bana tunissennaadan ba wozanan murttiis; yaatiyo gishshawu I hegan bana tunissennaadan kawo garuwa sunttatu gadaaway eeno gaana mala oychchiis.
9 Yaatin kawo garuwa sunttatu gadaaway Daaneelawu kehanaadaaninne qarettanaadan* tumu Xoossay oottiis.
10 Shin kawo garuwa sunttatu gadaaway Daaneelawu hagaadan giis: “Intteyyo miyobaanne uyiyobaa mooddida ta godaa kawuwayyo taani yayyays. Layttan inttenaara laggetiya hara yelagatuppe* intte laafin I beꞌikko shin? Intte tana* kawuwa sinttan mooranchcha kessana.”
11 Shin Daaneela, Hananiya, Mishaꞌeelanne Azariya naaganaadan kawo garuwa sunttatu gadaaway sunttidoogawu Daaneeli hagaadan giis:
12 “Hayyanaa ne ashkkarata tammu gallassawu paacca, qassi nuuyyo maanawu ataakilttee,* uyanawu haattay imettanaadan ootta;
13 yaatada nu qottaa* kawuwa loꞌꞌo qumaa miya yelagatu* qottaara geeddarissa, qassi ne ashkkaratuyyo neeni nu hanotaa beꞌiyogaadan ootta.”
14 Hegaa gishshawu, I eti yootidoban maayidi, eta tammu gallassawu paacciis.
15 Tammu gallassay wurin, eti kawuwa loꞌꞌo qumaa miida yelagatu* ubbaappe aaruwan qottan loꞌꞌonne payya* gididosona.
16 Yaatiyo gishshawu naagiyagee etayyo kawuwa loꞌꞌo qumaanne A woyniya immiyogaa aggidi, ubbatoo ataakilttiya immiis.
17 Tumu Xoossay ha oyddu yelagatuyyo* ubba qommo xaafuwaninne hayyuwan, eraanne ciimma akeekaa* immiis, qassi Daaneeli ubba qommo ajjuutatanne aymota akeekanaadan oottiis.
18 Kawoy Nebukadanaxori eta ba sintti ehanaadan keerido wodee wurin, kawo garuwa sunttatu gadaaway eta A sintti ehiis.
19 Kawoy etaara haasayido wode, kumetta citaa giddon Daaneela, Hananiya, Mishaꞌeelanne Azariya mali beettibeenna; hegaa gishshawu eti kawuwayyo haggaaziiddi yan attidosona.
20 Kawoy eta oychchido, hayyoynne akeekay koshshiyo allaalletu ubban, eti A kumetta haaruwan deꞌiya murunniya kahinetunne shareechchotu ubbaappe tammu kushe aadhdhiyogaa I akeekiis.
21 Qassi Daaneeli Kawuwa Qiiroosa koyro layttaa gakkanawu yan takkiis.
Footnotes
^ Woykko “beeta maqidasiya; Xoossaa garuwa.”
^ Hegeekka, Baabiloone.
^ Woykko “beeta maqidasiya; garuwa.”
^ Mise, “Israaꞌeela naatuppe.”
^ Mise, “naata.”
^ Woykko geella, “dichchawu koshshiyabaa demmana.”
^ Mise, “naatuppe.”
^ Birshshettay “Ta Daannay Xoossaa.”
^ Birshshettay “Yihoowi Kehiis.”
^ Birshshettay “Xoossaa Mali Ooni Deꞌii?” giyogaa gidana danddayees.
^ Birshshettay “Yihoowi Maaddiis.”
^ Mise, “Beltteshazzara.”
^ Mise, “Abedinega.”
^ Mise, “Meshaqa.”
^ Mise, “Shadiraqa.”
^ Hegeekka, Baabiloone sunttata.
^ Woykko “maaranaadan.” Qonccissuwa xeella.
^ Mise, “naatuppe.”
^ Mise, “ta huuphiya.”
^ Ibraawetto qaalay asho meennaageeti miyo qumaa bessiyaba gidana danddayees.
^ Woykko “milatiyobaa.”
^ Mise, “naatu.”
^ Mise, “naatu.”
^ Mise, “ashuwan modhdho.”
^ Mise, “naatuyyo.”
^ Hegeekka, hanotawu humꞌꞌuwa xeelliyo hakkaa.
