Daaneela 10:1-21
10 Parsse kawoy Qiiroosi kawotoosappe heezzantto layttan, Bilxxaasoora geetettiya Daaneelawu issi kiitay qoncciis; qassi he kiitay tuma, hegan odettidabay gita olaabaa. I kiitaa akeekiis, qassi beꞌidobaa xeelliyagan ayyo akeekay imettiis.
2 He wode, taani Daaneeli heezzu saaminttaa kumettaa kayyottaas.
3 Taani heezzu saamintta kumettaa loꞌꞌo quma mabeykke, ashoy woy woyne eessi ta doonaakko shiiqibeenna, qassi zayte mule tiyettabeykke.
4 Koyro aginawu 24tta gallassi, taani gita shaafaa Xegiroosa* doonan deꞌaydda,
5 taani tishshi ootta xeelliyo wode, liinuwa maayidanne Ufaza worqqaappe oosettida qabattuwa ba xeessan qachchida issi bitaniya beꞌaas.
6 A bollay kiristtiloobedan phoolees, A somꞌꞌoy wolqqanttaadan phaphalqqi gees, A ayfeti tamaadan eexxiya xomppe mala, A qesetinne A tohoti quccido nahaase milatoosona, qassi I haasayiyo wode cora asay haasayiyoba milatees.
7 Taani Daaneeli, ta xalaalay ajjuutaa beꞌaas; tanaara deꞌiya asati ajjuutaa beꞌibookkona. Shin eti yashshan kokkoridosonanne baqatidi qosettidosona.
8 Yaatin taani tarkka attaas, qassi taani ha gita ajjuutaa beꞌiyo wode, ta giddon wolqqi muleera xayiis, qassi ta bonchcho meraynne minotetta ubbay xayiis.
9 Hegaappe simmin, I haasayiyogaa siyaas; shin taani I haasayiyogaa siyaydda saꞌan gufannada xiskkaagaas.
10 Shin hegaappe guyyiyan, issi kushee tana bochchiis, qassi tana qaattidi ta kushiyaninne gulbbatan saꞌaa katanaadan maaddiis.
11 Hegaappe simmin I tawu hagaadan giis:
“Daaneelaa, keehi dosettidaagoo,* taani neeyyo yootana haniyobaa loytta ezgga. Taani neekko kiitettido gishshawu, ne deꞌiyosan haꞌꞌi dendda eqqa.”
I tawu hegaadan gin, taani kokkoraydda dendda eqqaas.
12 Yaatin I taayyo hagaadan giis: “Daaneelaa, yayyoppa. Neeni hageeta akeekanawunne ne Xoossaa sinttan nena kawushshanawu murttido koyro gallassaappe doommidi ne qaalay siyettiis, qassi taani ne qaalaappe denddidaagan yaas.
13 Gidoppe attin, Parsse kawotettaa daannay, tana 21 gallassawu eqettiis. Shin waannatiya daannatuppe issoy,* Mikaaꞌeeli,* tana maaddanawu yiis; qassi taani yan Parsse kawotu matan takkaas.
14 Ajjuutay sinttanaa wodiyaba gidiyo gishshawu, wurssetta gallassatun ne asaa gakkanabaa neeni akeekanaadan oottanawu taani yaas.”
15 I hegeeta taayyo yootido wode, taani saꞌaa xeellaasinne duude gidaas.
16 Hegaappe guyyiyan, asa milatiyagee ta menttershshaa bochchiis; yaatin taani ta sinttan eqqidaagaayyo hagaadan gaada haasayiyogaa doommaas: “Ta godawu, ajjuutaappe denddidaagan taani kokkorays, qassi wolqqa xayaas.
17 Yaanin ta godaa ashkkaray ta godaara waani haasayana danddayii? Ayssi giikko, haꞌꞌi taani wolqqa xayaas, qassi shemppanawu ta giddon ayba shemppoykka deꞌenna.”
18 Asa milatiyagee tana haranttuwa bochchidi minttettiis.
19 Yaatidi I hagaadan giis: “Keehi dosettidaagoo,* yayyoppa. Neeyyo saroy gido. Minna, ee, minna.” I tanaara haasayin taani minnada, “Ta godawu, neeni tana minttido gishshawu, taayyo yootana koyiyobaa yoota” yaagaas.
20 Hegaappe simmin I hagaadan giis: “Taani neekko ayssi yiidaakko eray? Haꞌꞌi taani Parsse daannaara olettanawu guyye baana. Taani ba simmin, Giriike daannay yaana.
21 Shin tumaa maxaafan xaafettidabata taani neeyyo yootana. Hageetun tana maaddiyay intte daannaa Mikaaꞌeelappe hari baawa.”
