Daaneela 7:1-28
7 Baabiloone Kawuwa Belshshazzara haaruwa koyro layttan, Daaneeli ba hiittan zinꞌꞌidi aymuwanne ajjuutata beꞌiis. Yaatidi I aymuwan beꞌido ubbabaa wurssi xaafiis.
2 Daaneeli hagaadan giis:
“Taani qammi ajjuutata beꞌaas; taani xeelliyo wode oyddu ginaappe carkkoy* carkkidi keehi aaho abbaa balbbuqiis.
3 Qassi issoy haraappe dummatiya oyddu gita doꞌati abbaappe kiyidosona.
4 “Koyroogee gaammuwa milatees, qassi ayyo argganttaa qefeti deꞌoosona. Taani xeellishin A qefeti shodettidosona, oonakko biittaappe A denttiisinne asadan naaꞌꞌu tohuwan eqqanaadan oottiis, qassi ayyo asa wozanay imettiis.
5 “Qassi beꞌa! hara doꞌay, naaꞌꞌanttoogee beeriya* milatees. I issi baggan pude denddiis, qassi heezzu gaylle meqettati A doonan, A achchaa giddon deꞌoosona; I ‘Denddada daro ashuwa ma’ geetettiis.
6 “Hegaappe simminkka taani xeellaas, qassi beꞌa! hara doꞌay maahe milatees; shin awu zokkuwan kafuwagaa milatiya oyddu qefeti deꞌoosona. Ha doꞌawu oyddu huupheti deꞌoosona, qassi haaranaayyo awu maatay imettiis.
7 “Hegaappe simminkka taani he qammi ajjuutata beꞌaas; taani yashshiya, daganttiyanne keehi mino oyddantto doꞌaa beꞌaas, qassi ayyo gita birata achchati deꞌoosona. I demmido ubbabaa gagaamettidi* miisinne mentterettiis, qassi attidabaa ba tohotun yererettiis. Appe kasetiya hara ubba doꞌatuppekka I dummatees, qassi awu tammu kaceti deꞌoosona.
8 Taani kaceta xeellaydda etabaa qoppishin hara guutta kacee eta giddon kiyi bayiis; koyro kacetuppe heezzati A sinttappe shodettidosona. Beꞌa! ha kaciyan asaagaa mala ayfeti deꞌoosona, qassi otorettidi* haasayiya doonaykka deꞌees.
9 “Taani xeellishin araatati giigi uttidosona, qassi Beniisappekka Deꞌiyagee uttiis. A maayoy shachchaadan bootta, qassi A huuphiya binnaanay mulxxuxxa suufe mala. A araatay tama laco; araataa irzzoti eexxiya tama.
10 Tamaa shaafay A sinttappe kiyidi goggees. Shaꞌutoo shaꞌati ubbatoo awu haggaazoosona, qassi tammu shaꞌutoo tammu shaꞌay A sinttan eqqees. Shilootay shiiqiis, qassi maxaafati dooyettidosona.
11 “Kacee otoro* qaalaa haasayishin taani xeellaydda takkaas; taani xeellaydda, doꞌaa woridi, A bollaa taman yeggi xuuggidi xayssana gakkanaashin beꞌaas.
12 Shin hara doꞌatuppe, eti haariyo maatay ekettiis, qassi eta baree wodiyawunne maacettida wodiyawu aduqqiis.
13 “Taani he qammi ajjuutata xeellishin, asa naꞌaa milatiya issoy saluwa shaaraara yiis; Beniisappekka Deꞌiyagaakko gelanaadan ayyo eeno geetettiis, yaatin eti A sintti A shiishshidosona.
14 Qassi asa zareti, deretinne dumma dumma doonata haasayiyageeti ubbay awu haggaazana mala, haariyo maatay, bonchchoynne kawotettay ayyo imettiis. A haaruwa maatay kichchenna merinaa maata, A kawotettaykka xayenna.
15 “Taani Daaneeli beꞌido ajjuutati tana yashshido gishshawu ta giddon unꞌꞌettaas.*
16 Taani hagawu tumu birshshettaa yan eqqidaageetuppe issuwa oychchanawu akko shiiqaas. Yaatin I zaariyo wode hageetu birshshettaa tawu erissiis.
17 “‘Ha oyddu gita doꞌati saꞌaappe denddana oyddu kawota.
18 Shin Ubbaappe Bolla Xoossaa geeshshati kawotettaa ekkana, qassi kawotettay merinawu, ee, meri merinawu etabaa gidana.’
19 “Hegaappe simmin, taani haratu ubbaappe dummatiya oyddantto doꞌaabaa gujjada eranawu koyaas; I birata achchatinne nahaase xugunttati deꞌiyo keehi yashshiyagaa, I demmido ubbabaa gagaamettidi miisinne mentterettiis, qassi attidabaa ba tohotun yererettiis;
20 taani A huuphiyan deꞌiya tammu kacetubaa, qassi ayfetinne otorettidi* haasayiya doonay deꞌiyonne haratuppe gitatidi beettiya, kiyi bayidanne A sinttan heezzati kunddido hinkko kaciyabaakka erana koyaas.
21 “Taani xeellishin, he kacee geeshshatu bolli olaa denttidi olettiyogaanne eta xooniyogaa beꞌaas;
22 yaanidoy Beniisappekka Deꞌiyagee yin, Ubbaappe Bolla Xoossaa geeshshatuyyo pirddettana gakkanaashiina; qassi geeshshatuyyo kawotettay imettiyo maacettida wodee gakkiis.
23 “I hagaadan giis: ‘Oyddantto doꞌabay hagaa, ha saꞌaa bolli oyddantto kawotettay yaana. I hankko kawotettatu ubbaappe dummatana, qassi I kumetta saꞌaa gagaamettidi maana, yererettananne mentterettana.
24 Tammu kaceti he kawotettaappe denddana tammu kawota; etappe simminkka haray denddana, I koyroogeetuppe dummatana, qassi heezzu kawota kawushshana.
25 I Ubbaappe Xoqqa Xoossaa eqettidi haasayananne Ubbaappe Bolla Xoossaa geeshshata muletoo naaqqana. I wodetanne higgiya laammanawu halchchana; qassi wodiyawu, wodetuyyonne wodiya baggawu* eti A kushiyawu imettana.
26 Shin A dippi oottidi muleera xayssanawu shilootay shiiqin, eti I haariyo maataa wotti ekkidosona.
27 “‘Qassi kawotettay, haariyo maataynne kumetta saluwappe garssan deꞌiya kawotettatu bonchchoy Ubbaappe Bolla Xoossaa geeshsha asatuyyo imettiis. Eta kawotettay merinaa kawotetta, qassi kawotettati ubbay etawu haggaazananne azazettana.’
28 “Allaalliyawu wurssettay hagaa. Taani Daaneeli qoppiyobay tana keehi daganttiis; yaatin taani hitti gaas;* shin allaalliya ta wozanan wottaas.”
