Daaneela 8:1-27
8 Kawuwa Belshshazzari kawotoosappe heezzantto layttan, taayyo Daaneelawu kase beꞌidoogaappe dummatiya issi ajjuutay beettiis.
2 Taani he ajjuutaa beꞌaas, qassi taani hegaa xeelliyo wode Elaama moottan* deꞌiya Shushana* qatuwan* deꞌays; taani he ajjuutaa beꞌaas, qassi taani Ulaya shaafaa* doonan deꞌays.
3 Taani xeelliyo wode, beꞌa! issi dorssa orggee shaafaa sinttan eqqiis, qassi ayyo naaꞌꞌu kaceti deꞌoosona. He naaꞌꞌu kaceti adussa gidikkokka, issoy hankkuwappe aduqqees, qassi aduqqiyagee guyyeppe kiyiis.
4 Dorssa orggee arggo baggi, qassi huuphessakkonne tohossakko domꞌꞌiyogaa taani beꞌaas; ay doꞌinne A sinttan eqqana danddayibeenna, qassi A kushiyappe* ashshana danddayiday baawa. I ba koyidoogaadan oottiisinne bana xoqqu xoqqu oottiis.
5 Taani xeellishin kumetta saꞌaara kanttidi biittaa bochchennan arggo baggaara* yiya issi deeshsha orggee deꞌees. Qassi he deeshshawu A ayfetuppe gidduwan borxxu gi beettiya issi kacee deꞌees.
6 I, shaafaa sinttan eqqidaashin taani beꞌido, naaꞌꞌu kaceti deꞌiyo dorssa orggiyakko yiis; I wolqqaama hanqquwa hanqqettidi akko woxxiis.
7 I keehi hanqqettidi dorssa orggiyakko shiiqishin taani beꞌaas. I dorssa orggiya qaycidi A naaꞌꞌu kaceta menttiis, qassi dorssa orggee A eqettanawu wolqqaa xayiis. I dorssa orggiya saꞌan onggidi yererettiis, qassi A kushiyappe* A ashshiyay xayiis.
8 Hegaappe simmin, deeshsha orggee bana keehi xoqqu xoqqu oottiis, shin I wolqqaama gidosaara gita kacee meqqiis; yaanin saluwa oyddu carkkotu ginan, he issuwa gishshaa borxxu gi beettiya oyddu kaceti kiyidosona.
9 Eta giddon issuwappe hara guutta kacee kiyiis, kiyidi I tohossakko, arshsho baggakkonne* Alleequwa* baggakko keehi dicciis.
10 I saluwan deꞌiyabata* gakkanaashin keehi dicciis, qassi I saluwan deꞌiyabatuppe amaridaageetinne xoolinttetuppe amaridaageeti saꞌan kunddanaadan oottiis, yaatidi eta yererettiis.
11 Haray atto I olanchchatu Gadaawaakka eqettidi bana xoqqu xoqqu oottiis, qassi paci baynnan yarshshettiya yarshshoy Gadaawaappe ekettiisinne I essido geeshsha sohoy saꞌan olettiis.
12 Higgiya kanttidoogaa gaasuwan, olanchchatinne paci baynnan yarshshettiya yarshshoy A kushiyan aadhdhidi imettidosona; qassi I tumaa saꞌan oliyogaa aggibeenna; I ba koyidoogaadan oottiisinne xooniis.
13 Issi geeshshay haasayishin taani siyaas, qassi haasayiyagaayyo hara geeshshay hagaadan giis: “Paci baynnan yarshshettiya yarshshuwara, bashshiya higgiya kanttuwaranne geeshsha sohuwanne olanchchata yererettiyogaara gayttida ajjuutan beettidabay ay keena wodiyawu takkanee?”
14 Yaagin I tawu hagaadan giis: “Hegee 2,300u omarssatinne maalladoti aadhdhana gakkanaashiina; yaanin geeshsha sohoy hanana bessiyasaa simmana.”
15 Taani Daaneeli ajjuutaa xeelliyonne hegaa akeekanawu koyiyo wode, asa milatiya issoy ta sinttan kiyi wodhdhidi eqqidaagaa beꞌaas.
16 Yaanin taani Ulaya shaafaa* giddoppe asa cenggurssaa siyaas, qassi I ba qaalaa xoqqu oottidi, “Gabreelaa, I beꞌidobaa akeekanaadan hegaa maadda” yaagiis.
17 Yaatin I taani eqqidosaa mati yiis, shin I yiido wode taani keehi yayyido gishshawu gufannaas. I tawu, “Asa naꞌawu, ajjuutay wurssettaa wodiyaba gidiyogaa akeeka” yaagiis.
18 Shin I tanaara haasayiyo wode, taani saꞌan gufannosan xiskkaagaas. Yaanin I tana bochchiisinne taani kase eqqosan tana essiis.
19 Hegaappe guyyiyan, I hagaadan giis: “Hegee maacettida wurssettaa wodiyan haniyo gishshawu, hanqquwa wodiyawu wurssettan hananabaa taani neeyyo erissana hanays.
20 “Neeni beꞌido, naaꞌꞌu kaceti deꞌiyo dorssa orggee Meedoonanne Parsse kawotu malaata.
21 Ikisaama deeshsha orggee Giriike kawuwa malaata; qassi A naaꞌꞌu ayfetuppe gidduwan deꞌiya gita kacee koyro kawuwa malaata.
22 I meqqin A gishshaa oyddati kiyido kaciya xeelliyagan, aagaa keena wolqqaama gidana xayikkonne, A deriyan oyddu kawotettati denddana.
23 “Eta kawotettaa wurssettan, higgiya kanttiyageeti bantta oottiyobaa poliyo wode,* kalkkoyiya* haasayata akeekiya,* meqettaa iita kawoy denddana.
24 I oottidobaa gaasuwan gidana xayikkonne, A wolqqay gita gidana. I malaaliya xayso* xayssana, qassi I oottiyobay ayyo ushachchana. I wolqqaamatanne geeshsha asata bashshana.
25 Qassi I ba cinccatettan cimmiyogan ba halchchuwa polana, ba wozanan bana xoqqu xoqqu oottananne hirggi baynna wodiyan* darota bashshana. Haray atto I daannatu Daannaa bollikka denddana, shin I asa kushee bochchennan meqqana.
26 “Ajjuutan omarssatubaynne maalladotubay odettidaagee tuma, shin ajjuutay daro wodetuppe* guyyiyan hananabaa bessiyo gishshawu, neeni hegaa gentta wottana bessees.”
27 Taani Daaneeli daafuraasinne unddenna gallassawu sahettaas. Hegaappe simmin denddada kawuwa oosuwa oottaas; shin taani beꞌidobay tana jollu oottiis, qassi ajjuutaa ooninne akeekana danddayibeenna.
Footnotes
^ Woykko “awuraajjan.”
^ Woykko “Susa.”
^ Woykko “kawo garuwan,”
^ Woykko “waaruwa.”
^ Woykko “wolqqaappe.”
^ Woykko “away wulliyosaara.”
^ Woykko “wolqqaappe.”
^ Woykko “Puulaa.”
^ Woykko “away kiyiyosaakkonne.”
^ Woykko “saluwa olanchchata”; Geeshsha Maxaafan hegee saluwan deꞌiya xoolinttetu malabaa, woy kiitanchchata, woy asaa qonccissiyaba gidana danddayees.
^ Woykko “waaruwa.”
^ Woykko “bantta zawaa gattiyo wode.”
^ Woykko “balettiya.”
^ Woykko “maqquwan gooba.”
^ Woykko “hanttaara xayso.”
^ Woykko geella, “yeꞌꞌe geennan.”
^ Woykko “keehi daro wodeppe.”
