Daaneela 4:1-37
4 “Kawuwa Nebukadanaxori asa zaretuyyo, deretuyyonne dumma dumma doonata haasayiyageetuyyo ubbawu kiittido kiitaa: Intte sarotettay kumi palaho!
2 Ubbaappe Xoqqa Xoossay taban oottido malaatatanne malaaliyabata yootiyogee tana ufayssees.
3 I oottiyo malaatati ayba gitee, qassi malaaliyabati ayba wolqqaamee! A kawotettay merinaa kawotetta, qassi I yeletaappe yeletan haarees.
4 “Taani Nebukadanaxori ta keettan woppu gaada, qassi ta garuwan hirattin deꞌays.
5 Tana yashshida issi aymuwa beꞌaas. Taani ta hiittan zinꞌꞌada beꞌido misiletinne ajjuutati tana yashshidosona.
6 Hegaa gishshawu Baabiloone eranchcha asati ubbay aymuwa birshshettaa taayyo erissana mala, eta ta sintti ehaanaadan taani azazuwa kessaas.
7 “He wode, murunniya kahineti, shareechchoti, Kaladatinne* xoolintteta xeellidi kaayiyageeti gelidosona. Taani etawu aymuwa yootin eti taayyo A birshshettaa erissana danddayibookkona.
8 Wurssettan, ta xoossaa sunttaadan Bilxxaasoora geetetti xeegettiyanne geeshsha xoossatu ayyaanay an deꞌiyo Daaneeli ta sintti yiis; yaatin taani aymuwa ayyo yootaas:
9 “‘Murunniya kahinetu gadaawaa Bilxxaasooraa, taani geeshsha xoossatu ayyaanay ne giddon deꞌiyogaanne neeyyo danddayettenna geemmida yohoy mule baynnaagaa loytta erays. Yaaniyo gishshawu, taani aymuwan beꞌido ajjuutatanne eta birshshettaa tawu qonccissa.
10 “‘Taani ta hiittan zinꞌꞌada beꞌido ajjuutatun saꞌaayyo gidduwan issi mittaa beꞌaas; qassi A geesay keehi adussa.
11 He mittay diccidi mino gidiis, A xeeray saluwa gakkiis, qassi I kumetta saꞌaa gaxaa gakkanaashin beettees.
12 A bonccoti loꞌꞌoosona, A ayfeti keehi daro, qassi an ubbawu miyobay deꞌees. Woraa doꞌati A kuwan shemppoosona, saluwa kafotikka A daashshatun deꞌoosona, qassi meretati ubbay* appe moosona.
13 “‘Taani ta hiittan zinꞌꞌada ajjuutata xeellaydda, naagiyagee, geeshshay saluwappe wodhdhishin beꞌaas.
14 I cenggurssaa xoqqu oottidi hagaadan giis: “Mittaa qanxxite, A tashetakka karite, A bonccota qoqqofite, A ayfiyakka laalite! Doꞌati A garssappe, qassi saluwa kafoti A daashshatuppe baqatona.
15 Shin durumaa birataaninne nahaasiyan qachchidi dembban deꞌiya maataa giddon, biittaa giddon deꞌiya A xaphotuura aggi bayite.* I saluwa akkan irxxo, qassi A gakkiya shaahoy saꞌan mokkiyabaa giddon doꞌatuura gido.
16 A wozanay asaagaappe laamettonne awu doꞌaa wozanay imetto; qassi ayyo laappun wodeti aadhdhona.
17 Ubbaappe Xoqqa Xoossay asa kawotettaa Haariyagaa gidiyogaa, I ba koyido ooyyonne hegaa immiyogaanne haray atto asa ubbaappe ziqqiyagaa kawotettan sunttiyogaa paxa deꞌiya asay erana mala, hegaa naagiyageeti awaajjidosona, qassi geeshshati azazidosona.”
18 “‘Taani kawoy Nebukadanaxori beꞌido aymoy hagaa; ta kawotettan deꞌiya eranchcha asati ubbay A birshshettaa tawu erissana danddayibeenna gishshawu, Bilxxaasooraa, neeni haꞌꞌi hegaa birshshettaa yoota. Geeshsha xoossatu ayyaanay nenan deꞌiyo gishshawu neeni yootana danddayaasa.’
19 “He wode, Bilxxaasoora geetettiya Daaneeli guutta wodiyawu dagammiis, qassi I qoppiyobay A yashshiyogaa doommiis.
“Kawoy, ‘Bilxxaasooraa, aymuwanne A birshshettaa yayyoppa’ yaagiis.
“Bilxxaasoori hagaadan giis: ‘Ta godawu, aymoy nena ixxiyageetuyyo, A birshshettaykka ne morkketuyyo gido.
20 “‘Diccidi gitanne mino gidida, A xeeray saluwa gakkidonne kumetta saꞌan beettiya neeni beꞌido mittay,
21 loꞌꞌiya bonccoti, keehi daro ayfeenne ubbawu miyobay deꞌiyogee, A garssan woraa doꞌati deꞌiyogeenne saluwa kafoti A daashshatun deꞌiyogee,
22 bonchchettida kawuwawu, hegee nena; ayssi giikko, neeni gitanne mino gidadasa, qassi ne gitatettay xoqqidi saluwa gakkiis, ne haaroykka saꞌaa gaxaa gakkiis.
23 “‘Naagiyagee, geeshshay hagaadan giiddi saluwappe wodhdhishin kawoy beꞌiis: “Mittaa qanxxidi xayssite, shin durumaa birataaninne nahaasiyan qachchidi dembban deꞌiya maataa giddon, biittaa giddon deꞌiya A xaphotuura aggi bayite.* Saluwa akkay A irxxisso, ayyo laappun wodeti aadhdhana gakkanaashin A gakkiya shaahoy woraa doꞌatuura gido.”
24 Bonchchettida kawuwawu, aymuwa birshshettay hagaa; hagee Ubbaappe Xoqqa Xoossay ta godaa kawuwa bolli gakkanaagee attenna giidi maacidoba.
25 Ubbaappe Xoqqa Xoossay asa kawotettaa Haariyagaa gidiyogaanne I ba koyido ooyyonne hegaa immiyogaa erana gakkanaashin, neeni asaa gidoppe yedetettada woraa doꞌatuura deꞌana, booratudan maataa maana, qassi saluwa akkay nena irxxissananne neeyyo laappun wodeti aadhdhana.
26 “‘Shin eti mittaa durumaa A xaphotuura* aggi bayanaadan yootido gishshawu, neeni Haariyagee saluwan deꞌiyogaa era simmin ne kawotettay zaarettidi nebaa gidana.
27 Hegaa gishshawu bonchchettida kawuwawu, hayyanaa ta zoriya ekka. Neeni suurebaa oottiyogan ne nagaraa aggidoogaa bessa, qassi hiyyeesatuyyo qarettiyogan* naaqqiyogaa aggidoogaa bessa. Yaatikko ne ishaluwa wodee aduqqana danddayees.’”
28 Ha ubbabay Kawuwa Nebukadanaxora bolli gakkiis.
29 Tammanne naaꞌꞌu aginaappe guyyiyan, I Baabiloone kawo keettaa huuphiyan hemettees.
30 He wode kawoy hagaadan giis: “Hanna taani ta huuphen ta minotettaaninne wolqqan kawo garuwawunne ta gitatettaa bonchchuwawu keexxido Gita Baabiloono gidekkee?”
31 Kawoy hegaa haasayishin saluwappe hagaadan giyogee siyettiis: “Kawuwa Nebukadanaxoraa, neeyyo hagaadan geetettiis, ‘Kawotettay neeppe ekettiichchiis,
32 qassi neeni asaa giddoppe yedetettana. Ubbaappe Xoqqa Xoossay asa kawotettaa Haariyagaa gidiyogaanne I ba koyido ooyyonne hegaa immiyogaa erana gakkaashin, neeni woraa doꞌatuura deꞌana, qassi booratudan maataa maananne neeyyo laappun wodeti aadhdhana.’”
33 He qaalay Nebukadanaxora bolli sohuwara polettiis. I asaa giddoppe yedetettiis, booratudan maataa miyogaa doommiisinne A bollay saluwa akkan irxxiis, qassi A huuphiya binnaanay argganttatu baalliyadan dicciisinne A xugunttati kafotu xugunttaa mala gididosona.
34 “He wodee wurin, taani Nebukadanaxori saluwa pude xeellaas, qassi ta akeekay tawu simmiis; taani Ubbaappe Xoqqa Xoossaa sabbaas, merinawu deꞌiyagaa sabbaasinne bonchchaas; ayssi giikko, A haaroy merinaa haaro, qassi A kawotettay yeletaappe yeletan deꞌees.
35 Saꞌan deꞌiyageeta ubbaa aara geeddarissiyo wode eti pattennaageeta, saluwa olanchchatu giddooninne saꞌan deꞌiyageetu giddon I ba koyidoogaadan oottees. Qassi ooninne A diggana* woy ‘Ne oottiyobay aybee?’ gaana danddayenna.
36 “He wode ta akeekay tawu simmiis, qassi ta kawotettaa bonchchoy, ta gitatettaynne ta puulay tawu simmiis. Ta xoqqa sunttatinne xoqqa maataawati tana keehi koyidosona, taani ta kawotettawu simmaas, ubba qassi taani kaseegaappe aaruwan gitataas.
37 “Haꞌꞌi taani Nebukadanaxori saluwa Kawuwa sabbays, xoqqu xoqqu oottaysinne bonchchays; ayssi giikko, A oosoti ubbay tuma, A ogeti suure, qassi I otorettiyageeta* kawushshana danddayees.”
Footnotes
^ Hegeekka, shareechchiyonne xoolintteta xeellidi kaayiyo eray deꞌiyogeeta.
^ Mise, “asho ubbay.”
^ Woykko “xaphota aggi bayite.”
^ Woykko “xaphota aggi bayite.”
^ Woykko “mittaa xaphota.”
^ Woykko “hiyyeesata maariyogan.” Qonccissuwa xeella.
^ Woykko “A kushiya teqqana.”
^ Woykko “otoruwan hemettiyageeta.”
