Daaneela 2:1-49
-
Kawuwa Nebukadanaxori shabbiriya aymo aymottiis (1-4)
-
Eranchcha asi ooninne aymuwa yootana danddayibeenna (5-13)
-
Daaneeli Xoossaa maaduwa koyiis (14-18)
-
Geemmidabaa qonccissido gishshawu Xoossaa sabbidobaa (19-23)
-
Daaneeli aymuwa kawuwawu yootiis (24-35)
-
Aymuwa birshshettaa (36-45)
-
Kawotetta shuchchay misiliya kinchchana (44, 45)
-
-
Kawoy Daaneela bonchchiis (46-49)
2 Nebukadanaxori kawotoosappe naaꞌꞌantto layttan, unddenna aymuwa aymottiis, qassi I* keehi shabbirettido gishshawu xiskkana danddayibeenna.
2 Hegaa gishshawu, kawuwawu aymota yootanaadan murunniya kahineta, shareechchota, bitiyageetanne Kaladata* xeegana mala kawoy azaziis. Yaatin eti gelidi kawuwa sinttan eqqidosona.
3 He wode kawoy etayyo hagaadan giis: “Taani aymuwa aymottaas, qassi taani ay aymottidaakko eranawu koyiyo gishshawu shabbirettaas.”*
4 Kaladati Aramatto doonan* kawuwayyo hagaadan giidi zaaridosona: “Bonchchettida kawuwawu, merinawu deꞌa. Ne ashkkaratuyyo he aymuwa yoota; yaatin nuuni birshshettaa yootana.”
5 Kawoy Kaladatuyyo hagaadan giidi zaariis: “Taani maacidobay hagaa: Intte he aymuwanne A birshshettaa taayyo erissana xayikko, inttena busakkana, qassi intte keettati dere sheeshsha keetta* gidana.
6 Shin intte he aymuwanne A birshshettaa yootikko, taani intteyyo imotaa, woytuwanne gita bonchchuwa immana. Hegaa gishshawu, he aymuwanne A birshshettaa tawu yootite.”
7 Eti zaarettidikka hagaadan giidosona: “Kawoy ba ashkkaratuyyo he aymuwa yooto; yaatin nuuni A birshshettaa yootana.”
8 Kawoy hagaadan giis: “Intte taani maacidobaa akeekiyo gishshawu haganaa* suganawu maliyogaa taani loytta erays.
9 Intte taayyo he aymuwa erissana xayikko, taani inttena ubbaa qaxxayanabay issi mala. Shin hanotay laamettana gakkanaashin, intte worddobaanne cimobaa taayyo yootanawu maayettideta. Yaaniyo gishshawu, he aymuwa tawu yootite; yaatikko intte A birshshettaa qonccissana danddayiyogaa taani erana.”
10 Kaladati kawuwayyo hagaadan zaaridosona: “Kawoy oychchiyobata oottana danddayiya issi asinne saꞌan* baawa; ayssi giikko, ay gita kawoynne woy haariya ay asinne murunniya kahiniya woy shareechchuwa woy Kalade asa hagaa malabaa oychchi erenna.
11 Kawoy oychchiyobay keehi wayssiyaba, qassi hagaa kawuwayyo yootana danddayiyay asaara* deꞌenna xoossatappe attin, hari ooninne baawa.”
12 He wode kawoy hanqquwa suullidi, Baabiloone eranchchata ubbaa xayssanaadan azaziis.
13 Azazoy kiyin eranchchata woranawu matido wode, eti Daaneelanne A laggetakka woranawu koyidosona.
14 He wode Daaneeli Baabiloone eranchchata woranawu kiyida, kawuwa naagiyageetuppe waannatiya Ariyoka cinccanne akeeka qaalan haasayissiis.
15 I kawoy sunttido Ariyoka, “Kawoy hagaa mala pala azazuwa ayssi azazidee?” giidi oychchiis. Oychchin Ariyoki Daaneelawu he allaalliyabaa yootiis.
16 Yaatin Daaneeli kawuwakko gelidi, birshshettaa kawuwayyo yootanawu bawu wodiya immanaadan oychchiis.
17 Hegaappe simmin, Daaneeli ba soo biidi, ba laggetuyyo Hananiyawu, Mishaꞌeelawunne Azariyawu he allaalliyabaa yootiis.
18 Daaneeli bananne ba laggeta Baabiloone eranchcha asatu haratuura xayssenna mala, ha geemmidabaara gayttidaban saluwa Xoossay qarettanaadan* woossana mala eta oychchiis.
19 Hegaappe simmin, geemmidabay Daaneelawu qammi ajjuutan qoncciis. Hegaa gishshawu, Daaneeli saluwa Xoossaa sabbiis.
20 Daaneeli hagaadan giis:
“Hayyoynne wolqqay A xalaalaaba gidiyo gishshawu,Xoossaa sunttay meri merinawu* sabetto.
21 I haniyabatu wodeta laammees,Kawota diggees, qassi kawota wottees,Hayyottiyageetuyyo hayyuwa, qassi akeekanchchatuyyo eraa immees.
22 I xuurabatanne geemmidabata qonccissees,I xuman deꞌiyabaa erees,Qassi A yuushuwan pooꞌoy deꞌees.
23 Ta mayzza aawatu Xoossawu, neeni taayyo hayyuwanne wolqqaa immido gishshawu,Taani nena galataysinne sabbays.
Qassi nuuni nena oychchidobaa neeni haꞌꞌi tawu erissadasa;Kawuwa qofissiyabaa neeni nuuyyo erissadasa.”
24 Hegaappe simmin, Daaneeli Baabiloone eranchcha asata xayssanaadan kawoy sunttido Ariyokakko biidi awu hagaadan giis: “Baabiloone eranchcha asatuppe oonanne xayssoppa. Tana kawuwa sintti gelissa, yaatin taani kawuwayyo birshshettaa yootana.”
25 Ariyoki eesuwan Daaneela kawuwa sintti gelissidi awu hagaadan giis: “Taani kawuwayyo birshshettaa erissana danddayiya issi asa Yihudaappe omooddettidi yiidaageetu giddon demmaas.”
26 Kawoy Bilxxaasoora geetettiya Daaneela, “Taani beꞌido aymuwanne A birshshettaa neeni tumu taayyo erissana danddayay?” yaagiis.
27 Daaneeli kawuwawu hagaadan giidi zaariis: “Eranchcha asatuppe, shareechchotuppe, murunniya kahinetuppe woy xoolintteta xeellidi kaayiyageetuppe ooninne kawoy oychchiyo geemmidabaa ayyo yootana danddayenna.
28 Shin geemmida yohota qonccissiya Xoossay saluwan deꞌees, qassi I wurssettaa gallassatun hananabaa Kawuwa Nebukadanaxorayyo erissiis. Ne aymoy hagaa, qassi neeni ne hiittan zinꞌꞌada beꞌido ajjuutati hageeta:
29 “Bonchchettida kawuwawu, neeni ne hiittan zinꞌꞌada sinttappe hananabaa qoppiyogaa doommadasa, qassi geemmida yohota qonccissiya Xoossay hananabaa neeyyo erissiis.
30 Ha geemmidabay taayyo qonccidoy taani paxa deꞌiya ooppenne aaruwan hayyo eriyo gishshataassa gidenna; shin neeni ne wozanan qoppiyobaa erana mala kawuwassi birshshettaa erissanaadan qoncciis.
31 “Bonchchettida kawuwawu, neeni xeellaydda gita misiliya* beꞌadasa. Ha keehi phooliya gita misilee ne sinttan eqqiis, qassi misilee nena keehi yashshiis.
32 Ha misiliya huuphee loꞌꞌo worqqaappe, A tiraynne A kusheti biraappe, A uloynne A wodiray nahaasiyappe oosettidosona;
33 A suyleti birataappe oosettidosona, qassi A tohotu yachchati oosettidobaappe amaridaagee birata, qassi attidaagee urqqa.*
34 Neeni xeellishin, asa kushiyana gidana xayikkonne, deriyappe xoqollettida shuchchay birataappenne urqqaappe oosettida, misiliya tohotu yachchatu bolli wodhdhidi kinchchiis.
35 He wode biratay, urqqay, nahaasee, biraynne worqqay ubbay issippe kinchchettidi, boniyan awudiyan deꞌiya dala* mala gidiis, qassi carkkoy etawu cirinne beettennaadan oottidi efiis. Shin misiliya bolli wodhdhida shuchchay gita dere gidiis, qassi hegee kumetta saꞌaa kammiis.
36 “Aymoy hegaa, qassi haꞌꞌi nuuni kawuwayyo A birshshettaa yootana.
37 Bonchchettida kawuwawu, saluwa Xoossay kawotettaa, wolqqaa, minotettaanne gitatettaa neeyyo immido kawotu kawuwawu,
38 hegaadankka awaaninne deꞌiya asaa, woraa doꞌatanne saluwa kafota I ne kushiyan immidoogoo, qassi eta ubbaa haariyagaa oottidoogoo, worqqa huuphee nena.
39 “Shin neeppe simmin, gitatettay neegaa keena gidenna hara kawotettay denddana; hegaappe simmin misiliyawu nahaase baggay, hara heezzantto kawotettay kumetta saꞌaa haarana.
40 “Oyddantto kawotettay biratadan minnana. Biratay hara ubbabaa kinchcherettiyogaadaaninne liiqissiyogaadan, ee, mentterettiya biratadan I eta ubbaa mentterettananne kinchcherettana.
41 “Tohotu yachchatinne biradhdheti oosettidobaappe amaridaagee urqqa, qassi attidaagee birata gidiyogaa neeni beꞌidoogaadan, he kawotettay shaahettana, shin birataynne shugo urqqay walahettidaagaa neeni beꞌidoogaadan, birataa minotettaappe amaridaagee ayyo deꞌana.
42 Tohuwa biradhdheti oosettidobaappe amaridaagee birata, qassi attidaagee urqqa gidiyogaadan, he kawotettay mino gidikkonne, laafakka gidana.
43 Biratay shugo urqqaara walahettidoogaa neeni beꞌidoogaadan, eti asaara* walahettana; shin biratay urqqaara oyqettennaagaadan, eti issoy issuwara issippe oyqettokkona.
44 “He kawotu wodiyan saluwa Xoossay mulekka xayenna kawotettaa essana. Qassi he kawotettay hara ay asawukka imettenna. I he kawotettata ubbaa kinchchidi xayssana, qassi A xalaalay merinawu eqqidi deꞌana;
45 asa kushiyana gidana xayikkonne, issi shuchchay deriyappe xoqollettiyogaanne birataa, nahaasiya, urqqaa, biraanne worqqaa kinchcherettiyogaa neeni beꞌidoogaadan hegee hanana. Gita Xoossay sinttappe hananabaa kawuwayyo erissiis. Aymoy tuma, qassi A birshshettay ammanttiyaba.”
46 Yaagin Kawuwa Nebukadanaxori Daaneela sinttan saꞌan gufanniisinne A bonchchiis. Qassi awu imotaa immanaadaaninne tonggu giyabaa cuwayanaadan I azaziis.
47 Kawoy Daaneelawu hagaadan giis: “Neeni ha geemmidabaa qonccissido gishshawu, tumukka intte Xoossay xoossatu Xoossaa, kawotu Godaanne geemmida yohota Qonccissiyagaa.”
48 Hegaappe simmin, kawoy Daaneela xoqqu xoqqu oottiisinne loꞌꞌo daro imotata awu immiis, qassi A Baabiloone mootta* ubban haariyagaanne Baabiloone eranchcha asatu ubbaa bolli kawotettay sunttidoogeetuppe waannatiyagaa ootti sunttiis.
49 Qassi Daaneeli oychchidoogaadan, kawoy Sidiraaqa, Misaaqanne Abddanaaga Baabiloone moottaa* aysuwan maaddiyageeta gidanaadan sunttiis, shin Daaneeli kawuwa garuwan haggaaziis.
Footnotes
^ Mise, “A ayyaanay.”
^ Hegeekka, shareechchiyonne xoolintteta xeellidi kaayiyo eray deꞌiyogeeta.
^ Mise, “ta ayyaanay shabbirettiis.”
^ Dnl 2:4bppe 7:28 gakkanawu koyro Aramattuwan xaafettiis.
^ Woykko geella, “buuraa oliyosa; oshaa duunne.”
^ Woykko “wodiya.”
^ Woykko “mela biittan.”
^ Mise, “ashuwara.”
^ Woykko “maaranaadan.” Qonccissuwa xeella.
^ Woykko “merinaappe merinaa gakkanawu.”
^ Woykko “hawulttiya.”
^ Woykko “xuuggido (giigissido) urqqa.”
^ Woykko “utula.”
^ Woykko “asa sheeshshaara,” hegeekka, coo asaa.
^ Woykko “awuraajja.”
^ Woykko “awuraajjaa.”
